Read Kahua 1 SIHONGA 28 Bible Online

1 SIHONGA 28 - Kahua bible

1 SIHONGA 28

¹Na maneraha o Tavite ki unihakura me i Jerusaleme na enoni raha hato: na bêni na varo ninuni, na enoni raha igê na gavumane, na mane ni me, na ani ga bêngenira na rehagaro gi tage na mane ni me ma na ani ga bêngenira na tangarê gi tage na mane ni me, na mane ga bâsurigi na nahuninga ma na togoha iata na maneraha mo karena, na mane hato ga tagara i ruma raha iana na maneraha, na mane ni me ramo, ma na ani getera na enoni raha.

²O Tavite ki ura i maata ma ki tamasi tangara, ki vi: “Goaku, mu karingê. Inê mareku kê obania vi ve torea na ruma, hanana ge gâga tare igê na bokesi na suruheri, na uguga iana na Araha God iaka. Inê kê bani hagarêa me na tagarahiana na ruma ni rotu tanga viga hagarahasia igê na Araha.

³Ma na Araha ki manimaniê, vi siana kê tagarahia, suria inê ki na mane ni me ma kê mutera rako era na enoni.

⁴Na Araha God iata na Isiraelita ngaia ki ategami, inê ma na apaparaha iaku, hanana mi heheuri kami marungia i Isiraele tare ki bê ki arâ. Ngaia ki atea na varo ninuni iana o Juta, hanana ga bêngenira na Isiraelita. Ma tenia na varo ninuni iana o Juta ngaia ki atea na ruma iana o vaemaku. Ma tenia na ruma ngekê ngaia ki ateê inê hete ma ki kasiê kê maneraha tanga i Isiraele hagenani.

⁵Ngaia ki haganahuniê renira rako o kareku. Ma i berarogata ngaia ki atea o Salomo ki maneraha i Isiraele i ruguhana na Araha.

⁶Na Araha ki vi tangê, ki vi: ‘O Salomo o karemu ngaia nga kani page torea na ruma ni rotu iaku. Inê kê bani atea ki manga o kareku ma inê kê manga o vaemana.

⁷Inê be katoa na arahanga iana ke oga hagahu manga vi ngaia ma ki ama ni marupegi maninga nga na ramata ma na hagesuringa hato iaku, manga i râ surigi i ngekê.’

⁸Hoita goaku, i maana God iaka ma i maami na Isiraelita mu haku me ikê, inê kê bonasigamu, hanana mu marupegi maninga na marâ hato na Araha God iaka i bani bonasigia renigi, hanana mu nahunia hagahu na agua na mako koro ikê, ma hanana na raraha iami ka heheuri ka nahunia tare ki bê ki arâ.”

⁹Ma tanga o Salomo ngaia ki vi: “O kareku, gu naka God iaku inê o vaemamu ke bêngenigo. Gu tagara nga tanga i mêrihamu hagenani. Ngaia ki giraragi na aitangihaka ma na obaniha iaka. Manga go aharia, ngaia ki page aganarigo, ma ki manga go murisigea, ngaia ki page rumakaka renigo tare ki bê ki arâ.

¹⁰Gu takusia tare nga, vi na Araha kani atego, hanana go torea na ruma apuna ni rotu iana. Hoita, gu togeaga ku tagara hagahatungia.”

¹¹O Tavite ki tagarenigi tanga o Salomo na pepa ga hagabângenia, vi manga i he ki tuguhira viga tagarahigi na ruma ni rotu ma na ruma hato getigi, na kiboru ni ruruguha, na kiboru i haha, na kiboru i rarona, na kiboru apuna teha ngavê tanga i bonotenigi igê na tasi iata na kariana.

¹²Ngaia ki vatea renia nikâ na pepa ga hagabângenia, vi manga i he ki takusia manga hanana viga tagarahigi na mahera henigi na kiboru rihigi, ma na kiboru ga nakanaka igê na marâ tanga na hagarahenga i ruma ni rotu, ma na votovoto ga tagarenigi tanga na Araha.

¹³O Tavite ki vatea renigi nikâ na pepa i hagagarara igê na mane ni hagarahenga ma na mane ni vogasiha, hanana ga tanugi maninga na tagaraha iata ma ka tagara maninga i ruma ni rotu ma ka bâbâsurigi maninga na ara ni marâ tanga na hagarahenga i ruma ni rotu.

¹⁴Ngaia ki segegi so, vi gi hita na siliva ma na golo kaniga tagarahigi renigi na marâ tanga na hagarahenga:

¹⁵na golo ma na siliva tangagi na laiti ma na atohani;

¹⁶na siliva tangagi na bea ma na golo tanga na bea ga nakanaka igê na guani na bereti ga tagarenigi tanga God, ma na siliva tangagi na ani getigi na bea.

¹⁷Ngaia ki segea so nikâ, vi gi hita ka na golo taranini ga tagarahigi renigi na eahi, na apira, na pi, ma vi gi hita na siliva ma na golo ga tagarahigi renigi na apira sisite;

¹⁸ma gi hita na golo taranina ga tagarahia renigi na bea tanga ga sungigi igê na marâ i sigini koro, ma gi hita na golo taranina ga tagarahia renigi na kati tangara na marâ ga tonga re na gagahata ga gasigi i avorana na bokesi na suruheri iana na Araha.

¹⁹Na maneraha o Tavite ki vi: “Ngaia nga na Araha kani hagatakusiê renigi na hagararinga hato ngegê ma inê kê segegi so ma.”

²⁰Na maneraha o Tavite ki vi tanga o Salomo o karena, ki vi: “Gu ramo ma ku togeaga ku tagara hagahatungia. Siana ko magu. Siana ko magutenia o vati. Na Araha God gê tagara tanga, ki page ngahisigo. Ngaia ki asa vige rumakaka renigo, ma ki page tamanigo hete mataro me ko hagahatungia na ruma ni rotu iana.

²¹Na mane ni vogasiha ma na mane ni hagarahenga ka bani nahunigi na tagaraha iata i ruma ni rotu. Na mane tagara ga manisingenigi na ani mavê na tagaraha ngaira ka agana ka tamanigo ma na enoni hato henira na enoni raha iata ka page têtê viteamu.”