Read Kahua 1 SIHONGA 29 Bible Online

1 SIHONGA 29 - Kahua bible

1 SIHONGA 29

¹Na maneraha o Tavite ki tamasi tanga na hakuta hagenani, ki vi: “O kareku o Salomo ki na ani God i bani atea, ma ngaia ki kere mane mênga ma ki pe nahuni takoha bâkoro mênga. Na tagaraha i tuguhia, ki raha teha ngavê, suria na ruma ngekê ki mareha vi na ruma raha tangara na enoni ma na ruma ni rotu tanga hete na Araha God.

²Tahema inê kê bani tagara raha, hanana gê rurugi haku na marâ tanga na ruma ni rotu: na golo, na siliva, na kapa higa, na aiani, na apinige, na hê i raha na meni, na hê bâkoro tanga na paru ma ka rako na hê mora aberabera.

³Mareha vi nga noga ma vigana, ma inê kê mahatangenigi nikâ hete na siliva ma na golo iaku mareku, suria na ruma ni rotu iana God ki râ me i mangataku.

⁴Inê kê mahatangenigi na 90,000 kilo na golo taranini ma na 210,000 kilo na siliva taranini, hanana ga hagamahegi renigi na apê i ruma ni rotu,

⁵ma hanana na mane ga girara ka tagarahigi renigi na marâ na golo ma na siliva. Hoi, ti nikâ ki agana hanana i mahata tanga na Araha?”

⁶Hoita, na bêni na apaparaha ma na bêni na varo ninuni, na mane ga bêngenira na mane ni me ma na ani ga bâsurigi na nahuninga iana na maneraha, ngaira ka agana.

⁷Ngaira ka mahatangenigi na 150,000 kilo na golo, na 10,000 na maani na golo, na 300,000 kilo na siliva, na 540,000 kilo na kapa higa ma na 3,000,000 kilo na aiani tanga na ruma ni rotu.

⁸Na ani ga nahunigi na hê ga raha na meni ka mahatangenigi tangagi na ruruguha na ruma ni rotu, o Jehiele na raraha iana o Geresone kani bâsurigi.

⁹Na enoni ka agana ka mahata tanga na Araha ma ka vagevagesigi na mahatanga iata ga tagarenigi. Na maneraha o Tavite ki obakoro ngavê nogana.

¹⁰Hoi, o Tavite ki hagarahasia na Araha i maata na enoni hato ga haku i ngekana. Ngaia ki vi: “Araha God iana o Jakobo na êvarimami, ge hagarahasigo tare ki bê ki arâ!

¹¹Igo ko raha ma ko raramohaga hunigo. Igo ko bagararaha ma ko bâ hahanetaga ma ko Araha. Na ara ni marâ i vavearo ma i maveta ka na animu. Igo nga ko Araha raha teha ngavê.

¹²Na ara ni ruruguha ma na ramoha hato ka râ me tenigo igo. Igo ko marungigi na ara ni marâ, suria go raramohaga hunigo. Igo ko nahuni ramoha, hanana go katoa na anima na enoni, ki raha ma ki ramo.

¹³Tahema igami kami visigo koro God iamami ma kami hagarahasia na atamu i rongo raha.

¹⁴I monari, na kariaku menê ki asa vigami mahata tangago renia na anima na marâ, suria na ara ni marâ ki na mahatanga tenigo igo, ma igami kami vatego aporo ma renigi.

¹⁵Araha, igo ko bani girara, vi igami kami oga hagatora ma ikê i maveta. Igami kami mangara na enoni ga henahuraura se mi mamarugana na vaha i riri tare. Igami ki bara, vigami tahi tenia na mera.

¹⁶Araha God iamami igami kami toregi me na ruruguha hato igê, kami tagarahia na ruma ni rotu renigi, hanana mi hagahigasigo. Ma na ara ni marâ ngegana ka râ me tenigo. Ngaigi hato ka na animu.

¹⁷Inê kê bani girara, vi igo ko uhungigi na aitangihata na enoni, ma ko obakoro renira na enoni ga pe pinihigi na aitangihata. Inê kê pe hagaparu. Inê kê pe pinihia na aitangihaku. Inê kê agana hanana gê tagarenigi na marâ hato ngegê tangago, ma kê bâsira na kariamu ga oga ikê ka vagevagesigi na mahatanga iata tangago.

¹⁸Araha God iata na êvarimami o Abarahamo, o Isako mo Jakobo, go katora na kariamu, ka ama ni takuigo nga vikana ma ka toto surigo tare ki bê ki arâ.

¹⁹Gu katoa o kareku o Salomo ke agana i mêrihana hagenani ke têtê viteamu tare ma ke torea na ruma ni rotu, gê bani hagarê me tanga.”

²⁰Hemuri o Tavite ki bonasira na enoni, ki vi: “Mu hagarahasia na Araha God iami.” Ma na hakuta hagenani ka hagarahasia na Araha God iata na êvarita ma ka susure ka tubê so ma ka hagahigasia na Araha, ma tanga nikâ na maneraha.

²¹I na tangiana i muri ngaira ka vogasia na Araha ma ka susu tanga. Ngaira ka nahuira na rehagaro na puruka mane, ma na rehagaro na sipi mane ma ka sungira igê na bea ni vogasiha, matena ga karangigi na vaini tanga na vogasiha. Ngaira ka nahuira rako na ganiani tangara na Isiraelita.

²²Ngekana ngaira ka ngê ma ka totono i maana na Araha ma ka vagevage bâraha. Igê na tangiana ngekana ngaira ka hagahârungia aporo, ka vi, vi o Salomo o karena o Tavite ki maneraha iata. Ngaira ka monea o Salomo ki maneraha iata ma ka monea o Satoke ki mane ni vogasiha, hanana garu tagara tanga na Araha.

²³Vikê o Salomo ki urusia o Tavite o vaemana ki maneraha i ruguhana na Araha. Ngaia ki na maneraha i tavoraha bâkoro igê na tagaraha iana ma na Isiraelita hato ka tê viteana.

²⁴Na gavumane hagenani ma na mane ni me hato ma ngaira hato nogata o karena getera o Tavite ka suru viga tototo suria na maneraha o Salomo.

²⁵Na Araha ki katoa o Salomo ki raramohaga ngavê. Tahema na Isiraelita hato ka hagahigasia bâraha. Ngaia ki bâ hahanetaga teharira na maneraha getera hato ga marungia i Isiraele hagenago tarana.

²⁶O Tavite karena o Isai ki marungia i Isiraele hagenani.

²⁷Ngaia ki maneraha surigi na tangahuri harisi ge he: na harisi gi pi ngaia ki oga i Heberoni ma na tangahuru gi oru matara gi oru na harisi i Jerusaleme.

²⁸Ngaia ki me suri parongana, matena i gemêa ngavê. Ngaia ki ruruguha ngavê ma na enoni ka hagahigasia bâraha, ma o Salomo o karena ki maneraha urusia.

²⁹Na sihonga hagenani renia na maneraha o Tavite ka segea so igê na buka renira na poropete gi oru: o Samuele, o Natane mo Gata.

³⁰Ngaigi ka tamasi renia na arahanga iana, renia na ramoha iana ma renigi na ara ni marâ hato i tarahura ngaia ma na Isiraelita ma na maneraha ga marungigi na agua hagarangia i Isiraele.