Read Kahua 1 SIHONGA 5 Bible Online

1 SIHONGA 5 - Kahua bible

1 SIHONGA 5

¹Na raraha iana o Rubeni na bêbê ni kare iana o Jakobo kani igê. Suria ngaia ki memêru ta na hitangita na gete râ ma iana o vaemana, tahema na takoha ni bêbê ni kare ki hato tenia ma ki râ tanga o Josepo o vesina. Vikana o Rubeni ki hato vigê bêbê ni kare.

²Henaka i manga ngekana, ma na varo ninuni iana o Juta ki raramohaga teharira na varo ninuni iata hehegitigi o vesina, ma ta na raraha iana o Juta ki vora re na maneraha ma ki marungira.

³O Rubeni na bêbê ni kare iana o Jakobo ki aparara o karena ge he: o Ganoke, o Palu, o Geserone mo Karami.

⁴Tenia o Joele ta na raraha iata, ka râ me na voraha hehegitigi igê: o Semaia, o Gogo, o Simi, o Mika, o Reaia, o Bala, ma o Bera. O Tigilata Pilisere na maneraha i Asure ki henahuraua o Bera na bêna na varo ninuni iana o Rubeni tanga i Asiria.

⁷Igê na pepa renira na raraha iana o Rubeni ka oga igê na bêni na hagosi ninuni igê: o Jeiele, o Sekaria mo Bela.

⁸O vaemana o Bela ka no Asasa karena o Sema tenia na hagosi ninuni iana o Joele. Na hagosi ninuni ngekana ki oga i Aroere ma igê na apanena i ngekana ki râ ki tariha i Nebo me Bala Meone.

⁹Ngaira ka nahunigi na totoha raha i Gileata. Ma suria i Gileata ki sisite ki pe ararira, tahema ngaira ka parênia na agua bêkê ki râ ki tariha igê na bagamasusu raha, i râ tare ki tariha i ve i Uparatesi.

¹⁰Na matena i maneraha igê o Saulu, ngaira ka meraheariha na Hagarita ma ka mutera igê na hearihatana. Ngaira ka oga parera igê na mako iata i na apanena bêkê i Gileata.

¹¹Na raraha iana o Gata ka oga hetanga na raraha iana o Rubeni ma ngaira ka oga i Basani ki râ bêkê i Salaka.

¹²O Joele ki na bêna hagenago na hagosi ninuni mo Sapane ka na ruata vê tanga. O Janai mo Sapata ngairerua ka na bêta hagenago na hagosi ninuni gi pi getigi i Basani.

¹³Na bêni na hagosi ninuni hehegitigi ngegana ka no Mikaele, o Mesulama, o Seba, o Jorai, o Jakane, o Sia mo Ebere.

¹⁴Ngaira ka na raraha iana o Abigaile, o Gure, o Jaroaga, o Gileata, o Mikaele, o Jesisai, o Jagato mo Busu,

¹⁵O Agi karena o Abatiele ki na bêni na hagosi ninuni ngegana. O virana ka no Guni.

¹⁶Ngaira ka oga igê na apanena i Basani me Gileata ma surigi na hinua igê ma surigi na bena ni go i Sarone.

¹⁷Na pepa renira ka segegi igê na mateni iaterua o Jotama na maneraha i Juta mo Jerobeama na maneraha i Isiraele.

¹⁸Ngaira hato haku na mane ni me iata na varo ninuni iata hehegitigi o Rubeni, o Gata ma na apapana na varo ninuni iana o Manase bêkê i Jotano ka vora na 44,760. Ngaira ka manisingenigi na bêata, na tatapa borahu ma na epage.

¹⁹Ngaira ka râ ka meraheariha na Hagarita, na varo ninuni iata hehegitigi o Jeture, o Napisi mo Notaba.

²⁰Ngaira ka hagêguritogo renia God ma ka avarasia. God ki aganarigi na avarasiha iata ma ki tamanira ka teharira na Hagarita ma na ani ga tamanira.

²¹Ngaira ka henahuraura na 50,000 na kamelo, na 250,000 na sipi ma na 2,000 na tonki tenira na merongata. Ngaira ka henahuraura nikâ na 100,000 na enoni.

²²Ngaira ka mutera rako na merongata, suria God ki tamanira. Ngaira ka oga parera mataro me na matena ga henahuraura vê na me ni Asiria igê.

²³Na raraha iana o Manase bêkê i Jotano ka ogasia i Basani ki râ ki tariha i Bala Heremone. Ngaira ka ama ni tataka nga.

²⁴Na bêni na hagosi ninuni hehegitigi kani igê: o Epere, o Jisi, o Eliele, o Asariele, o Jirimea, o Hotavia, ma o Jagatiele. Ngaira hato ka na mane ni me ramo. I asa vige magu. Na enoni hato igê na hagosi ninuni iata hehegitigi ka hagahigasira ngavê.

²⁵Ma na enoni ka haritohea God iata na êvarita ma ka murisigea, hanana ga vogasira na ataro iata na enoni, God ki bani tarigenira hura tarata.

²⁶Tahema God ki katoa o Pule ni Asure, ga hêtana nikâ vi o Tigilata Pilesere ki taharira. O Pule ki henahuraura vê na varo ninuni iata hehegitigi o Rubeni, o Gata ma na apapana na varo ninuni iana o Manase bêkê i Jotano ma ki tugurira ka ogasigi hagahu i Galaga, i Gabore, i Hara ma i ve i Gosana.