Read Kahua 2 SIHONGA 1 Bible Online

2 SIHONGA 1 - Kahua bible

2 SIHONGA 1

¹O Salomo, o karena na maneraha o Tavite, ki marungia gatagata nga i Isiraele, i maneraha igê. Na Araha God ki koro tanga ma ki katoa ki raramohaga ngavê.

²Na maneraha o Salomo ki bonasira ngaira hato na mane ga bêngenira na rehagaro na mane ni me, ma na ani ga bêngenira na tangarê na mane ni me, ma ngaira hato na enoni raha igê na gavumane, ma ngaira hato na bêni na varo ninuni ma na hagosi ninuni ma ngaira hato na enoni,

³hanana viga arâ henia tanga na agua ni vogasiha i Gibeone. Ngaira ka râ i ngekana, suria i ngekana ki oga igê na ruma na gahu apuna iana na Araha, o Moise na kariana God i bani tagarahia i nago igê na bagamasusu raha.

⁴Na bokesi na suruheri ki bani oga i Jerusaleme i rarona na ruma na gahu, na maneraha o Tavite ki bani hagêrasia, matena i torea na bokesi na suruheri tenia i Kiriata Jearimi.

⁵Na bea na kapa higa ni vogasiha, o Besalele, karena o Uri ma o vesina o Gure o virana ki bani tagarahia, ngaia ki bani oga nikâ i Gibeone i maana na ruma apuna na gahu iana na Araha. Na maneraha o Salomo ma na enoni hato ka rahesia na Araha i ngekana.

⁶Na maneraha ki rahesia na Araha, ma ki vogasia igê na bea na kapa higa ni vogasiha i maana na ruma apuna na gahu iana na Araha. Ngaia ki nahuira na rehagaro na sipi, na puruka ma na marâ vigana, ma ki sungigi hagenani igê tanga na Araha.

⁷Igê na bungiana ngekana God ki vora tanga o Salomo ma ki hagatea, ki vi: “Na ta ko obaniê vigê vatego?”

⁸O Salomo ki arami, ki vi: “Igo ko takuia bâraha tare o vaemaku o Tavite, ma i ngekê igo ko kasiê kê maneraha urusia.

⁹Araha God, gu hagamonaria na suruha iamu tanga o vaemaku. Igo ko katoê kê maneraha tangara rako era na enoni, i asa vige tomanira.

¹⁰Hoi, gu haganahuniê renigi na takoha mataha ma na giraraha, gê obanigi tanga gê marungira. Manga i mareha, inê ki bara tangê, vi ve marungira na kariamu ga gahu.”

¹¹God ki aramia o Salomo, ki vi: “Na tarana go atea ki komani oto ngavê. Suria igo ko pe nungigi tangago maremu na ruruguha se vi na nahuninga, se vige rongo raha na atamu, se vige meme na merongamu, se vigu mauri arihu, ma ko nungigi hete na takoha mataha ma na giraraha, hanana go girara vigo marungira na kariaku, gê kasigo ko maneraha tangara,

¹²hoi, inê be haganahunigo renigi na takoha mataha ma na giraraha. Ma nikâ inê be haganahunigo renigi na ruruguha, na nahuninga ma ke rongo raha na atamu. Vikana ki mareha rârâ vi ta na maneraha i nago ma i hemuri vige maratoramu.”

¹³Hoi, o Salomo ki pania na agua i Gibeone i oga igê na ruma na gahu apuna iana na Araha, ma ki aporo tanga i Jerusaleme. Ngaia ki oga i ngekana ma ki marungia i Isiraele.

¹⁴Ngaia ki nahunigi na 1400 na kati ni me ma ki nahunira nikâ na 12,000 na hosi ni me. Tani ka oga i Jerusaleme ma tani ka oga surigi na hinua raha getigi i Isiraele.

¹⁵Na matena i maneraha igê o Salomo, na siliva ma na golo ka manga ma taigini ma na hata ka rako mangagi na apinige na fiki igê na bena i Sepela.

¹⁶Na mane hagatora iana na maneraha ka vurira na hosi i Misiraimi me Kewe

¹⁷ma ka vurigi na kati ni me i Esipito. Ngaira ka hagavuringenira na hosi ni me tangara na maneraha iata na Hitita ma tangara na maneraha i Siria henigi na kati ni me. Na mena na ani gi tage na kati ni me ki 6 kilo na siliva ma na mena na hosi ni me gi tage ki 1 kilo na siliva ma na apapana.