Read Kahua 2 SIHONGA 10 Bible Online

2 SIHONGA 10 - Kahua bible

2 SIHONGA 10

¹O Regabeama ki râ i Sigeme, suria na Isiraelita hato ka bani haku i ngekana, ka kasia igê ki maneraha.

²Matena o Jerobeama karena o Nebata ki rongo vikana, ngaia ki aporo me tenia i Esipito, na agua i bani gava tanga tenia na maneraha o Salomo.

³Na Isiraelita ka unia me ma ngaira hato ka tage râ tanga o Regabeama. Ngaira ka vi tanga, ka vi:

⁴“O Salomo o vaemamu ki hagamahagami ma ko katoa ki mataku na ogaha iamami, hoi, vikana igami kami page tototo surigo maninga.”

⁵O Regabeama ki arami, ki vi: “Mu nakê, kê takotako renia surigi noga na tangiani gi oru ma kamu kahu aporo me.” Hoi, ma na enoni ka râ.

⁶Na maneraha o Regabeama ki gari takoha tenira na meraha, na mane ni hagaotonga iana o Salomo o vaemana. Ngaia ki hagatera, ki vi: “Na aramiha ta kanimu takusia, vigê page aramira na enoni ngegana renia?”

⁷Ngaira ka arami, ka vi: “Manga igo ma ko korokoro tangara na enoni ngegana ma ko uhungia ko hagakoro obata renia na aramiha i takegi na aitangihata, hoi, ngaira ka page tototo surigo maninga tare.”

⁸Ma ngaia ki usitenia na hagaotonga iata na meraha ma ki gari takoha hete tenira na mane na gapu haoru, ga tage raha haku, ma ka vora re na mane ni hagaotonga iana i ngekê.

⁹Ngaia ki hagate, ki vi: “Na hagaotonga ta kani iami tangê? Gê vivi bâ hega tangara na enoni, ga nungiê, vigê hagamahagi na ogaha iata?”

¹⁰Ngaira ka arami, ka vi: “Hoi, go vi tangara, ko vivi vikê: ‘Na kere kakêku i akere ki upupuga teharia na gupina o vaemaku.’

¹¹Go vi tangara, ko vivi: ‘O vaemaku ki hagamamasiagagamu bâraha, ma inê kê page hagamamasiagagamu teha ngavê. Ngaia ki ramusigamu renigi ma na varo gonari, ma inê kê page ramusigamu nga renigi na varo ga tâ igê na gavi.’”

¹²I hato na tangiani gi oru, o Jerobeama ma na enoni hato ka aporo tanga na maneraha o Regabeama, manga i bani vi tangara.

¹³Na maneraha ki pe râ suria hete na hagaotonga iata na meraha, ma ki ramonira na enoni,

¹⁴manga ga bani vi tanga na mane na gapu haoru. Ngaia ki vi: “O vaemaku ki hagamamasiagagamu bâraha, ma inê kê page hagamamasiagagamu teha ngavê. Ngaia ki ramusigamu renigi na varo gonari, ma inê kê page ramusigamu nga renigi na varo ga tâ igê na gavi!”

¹⁵Vikana na Araha God ki hagamonaria na tamasinga iana i harana o Agia na poropete i Silo tanga o Jerobeama karena o Nebata. Tahema na maneraha ki pe aganaria rârâ na obaniha iata na enoni.

¹⁶Matena na enoni ka tahetara, vi na maneraha ki pe rongo ringeta, ngaira ka ngere raha, ka vi: “Nakara vê ngaira getera mareta o Tavite ma na raraha iana! Na ta kaniga katoa noga tangagia? Isiraelita, nika, ge aporo. Naka vê o Regabeama ngaia getea marena!” Vikê na Isiraelita ka hura pania o Regabeama,

¹⁷ki maneraha tangara ma na enoni ga oga i na apanena i Juta.

¹⁸Hoi, na maneraha o Regabeama ki hagatorangenia o Hatorama i bâsurira na enoni rakuraku, ki râ i pasita na Isiraelita, ma ngaira ka arihahunia. Ngekana o Regabeama ki hatani gaha râ ki tage igê na kati ni me iana ma ki gava tanga i Jerusaleme.

¹⁹Haganega tenia ngekana na Isiraelita ka kahu merongasira na raraha iana o Tavite.