Read Kahua 2 SIHONGA 11 Bible Online

2 SIHONGA 11 - Kahua bible

2 SIHONGA 11

¹Matena na maneraha o Regabeama ki ata i Jerusaleme, ngaia ki unira haku na 180, 000 na mane ni me ramo tenirerua na varo ninuni iaterua hegitigi o Benamino mo Juta. Ngaia ki kato, vi meraheariha na Isiraelita, hanana vi nakara aporo i marungana.

²Ma God ki bonasia na poropete o Semaia,

³ki râ ki tamasi tangara o Regabeama ma na enoni hato tenirerua na varo ninuni iaterua hegitigi o Juta mo Benamino. Ngaia ki vi:

⁴“Siana kamu taharira na goami na Isiraelita. Mu aporo, igamu hato. Na tarana i akê me ki na obaniha iaku ma inê.” Ngaira ka tê viteana na Araha ma ka pe meheariha o Jerobeama.

⁵O Regabeama ki oga tonge i Jerusaleme ma ki pararihigi na hinua igê i Juta me Benamino:

⁶i Beteleheme, i Etama, i Tekoa,

⁷i Betesure, i Soko, i Atulama,

⁸i Gata, i Maresa, i Sipe,

⁹i Atoraimi, i Lakisi, i Aseka,

¹⁰i Sora, i Aialone, ma i Heberone.

¹¹Ngaia ki pararihigi ki nganganihaga ngavê, ma ki kasira na mane ni me ka oga tonganigi, ma ki tonganigi renigi na ngauha, na oile ni olive ma na vaini,

¹²henigi na bêata ma na ora. Vikana ngaia ki girara i marungirerua i Juta me Benamino.

¹³Ma mane ni vogasiha ma na mane ni hagarahenga ka pania i Isiraele hagenani ma ka râ tanga i Juta.

¹⁴Na mane ni hagarahenga ka panigi na bena ni go ma na mako iata ma ka râ ka oga i Juta me Jerusaleme, suria o Jerobeama na maneraha i Isiraele ma na ani ga heheuri ka urusia na maneraha, ngaira ka manimanira, vige tagara mangara na mane ni vogasiha tanga na Araha.

¹⁵O Jerobeama ki atera so marena na mane ni vogasiha, hanana ga tagara igê na agua ni vogasiha ni ataro ma ka vogasira na ataro ma na nunuta i tagarahigi ki bâ manga na kere puruka mane.

¹⁶Na enoni hato i Isiraele hagenani, ga obania monari viga rahesia na Araha God iata na Isiraelita, ngaira ka râ nogata tanga i Jerusaleme mangara na mane ni hagarahenga, hanana ga vogasia na Araha God iata na êvarita.

¹⁷Vikana ngaira ka katoa ki kahu nganganihaga ngavê na marungiha iana o Regabeama i Juta surigi na harisi gi oru. Ngaira ka pane henia o Regabeama karena o Salomo, ma ka oga manga i nago i marungaterua na maneraha o Tavite mo Salomo.

¹⁸O Regabeama ki êragia ka Magalata ka kareterua o Jerimote karena o Tavite, ma ka Abigaile ka karena o Eliaba ma kesina o Jese.

¹⁹Ngairerua karu aparara na kare mane gi oru: o Jeusa, o Semaria ma o Sahama.

²⁰Ma hemuri ngaia ki êragia nikâ ka Maaka ka karena o Abasalome. Ngairerua karu aparara na kare mane ge he: o Abia, o Atai, o Sisa mo Selomiti.

²¹Ngaira haku, o Regabeama ki nahunira na gete iana tangahuru matare varu henira na tangahuru ge ono na gete râ me iana, ma ki aparara na tangahuru gi rua matare varu na kare mane ma na tangahuru ge ono na kare hehene. Ngaia ki takuia bâraha ka Maaka teharira na ani getera na gete iana ma na gete râ ma iana.

²²Ma ngaia ki takuia o Abia karena ka Maaka teharira na ani getera hato na karena ngaia. Ngaia ki atea, hanana i page maneraha urusia.

²³O Regabeama ki tako bâkoro ma ki tonganira o karena renigi na tagaraha ma ki kasira ka oga surigi na hinua i bani pararihigi i Juta me Benamino ma ka bâsurigi. Ngaia ki votongira ngavê renigi na marâ ga obanigi ma ki hagauragingenira henira rako era na gete.