Read Kahua 2 SIHONGA 12 Bible Online

2 SIHONGA 12 - Kahua bible

2 SIHONGA 12

¹Matena i ura gatagata manga i marisina vi ngaia ki na maneraha, o Regabeama henira na kariana hato ka parama ma ka rumakaka renigi na ramata iana na Araha.

²Igê na rimata na harisi i maneraha surigi o Regabeama, na hagaitangiha ki tarahura, suria ngaira ka pe toto suria na Araha. O Sisake na maneraha i Esipito ki taharia i Jerusaleme

³henigi na 1200 na kati ni me, henira na 60,000 na mane ni me igê na hosi ma rako era na mane ni me nikâ, i asa vige tomanira. I berarogata ka na mane ni me ni Libia, ni Suke ma ni Sutane.

⁴Ngaia ki henahuraugi na hinua i Juta ga pararihigi, ki rârâ ma ki tariha i Jerusaleme.

⁵O Semaia na poropete ki râ i pasita na maneraha o Regabeama ma na enoni raha i Juta ga bani haku i Jerusaleme hanana ga gavatenia o Sisake. Ngaia ki vi tangara, ki vi: “Na Araha ki tamasi vikê tangagamu: ‘Igamu kamu bani kasi reniê. Tahema inê kê kasi renigamu tanga o Sisake.’”

⁶Na maneraha ma na enoni raha ka tangahurira, vi ngaira ka tasi, ma ka vi: “Na tarana i katoa na Araha, ki oto.”

⁷Matena na Araha ki girara vikana, ngaia ki tamasi nikâ tanga o Semaia, ki vi: “Suria ngaira ka tangahurira renigi na tasi iata, inê kê page mutera nga noga ma na mêrihata, matena o Sisake ki taharira. Na mangariaganiha iaku tanga i Jerusaleme inê kê tako rugu sisite.

⁸Henaka, ma o Sisake ki page henahuraura. Vikana ngaira ka page tahetara renia vi na têha ni viteaku ma na têha ni viteata na maneraha i maveta karu tora hegitigi.”

⁹Na maneraha o Sisake ki taharia i Jerusaleme ma ki rurugu tenirerua na ruma ni rotu ma na ruma raha iana na maneraha. Ngaia ki rêgi na ara ni marâ hato henigi na bêata na golo, i tagarahigi na maneraha o Salomo.

¹⁰O Regabeama ki urusigi na bêata ngegana renigi na ani na kapa ma ki tagarenigi tangara na mane ni me ga bêngenira na mane ni anumasiha, ga anumasigi na maani ruma na ruma raha iana na maneraha.

¹¹I na ara ni mateni na maneraha ki arâ i ruma ni rotu, na mane ni anumasiha ka toregi na bêata ma hemuri ka bêbagi aporo igê na kiboru iata.

¹²Suria o Regabeama ki tangahuria, matena na Araha ki pe tê erasia igê na mangariaganiha iana, na marâ ka tavoraha bâkoro i Juta.

¹³O Regabeama ki oga i Jerusaleme ma ki kahu akê me mave, vi ngaia ka na maneraha raramohaga. Ngaia ki tonga na harisi tangahuru ge he matare tage iana, matena i vora re na maneraha. Ngaia ki maneraha surigi na harisi tangahuru matare pi ma ki oga i Jerusaleme, na hinua na Araha i bani atea i berarogani na hinua i Isiraele hagenani, hanana i tuguhira na enoni, viga rahesia nga igê. Kenana o Regabeama kani ka Naama ni Amone.

¹⁴O Regabeama ki bagaparongana, suria i pe toto suria na Araha.

¹⁵Na ogaha hagenani iana o Regabeama ma na sihonga renia na ahemata iana ka bani segegi so igê na buka na sihonga renia o Semaia na poropete, ma igê na buka na sihonga renia o Ito na poropete. O Regabeama ma o Jerobeama karu hearihaheri tare.

¹⁶O Regabeama ki me ma ka bagia igê na matahuta na maneraha i hinua iana o Tavite, ma o Abia o karena ki maneraha urusia.