Read Kahua 2 SIHONGA 14 Bible Online

2 SIHONGA 14 - Kahua bible

2 SIHONGA 14

¹Matena i maneraha o Asa igê, i Juta ki oga igê na marapeha.

²O Asa ki hagakoro obana na Araha God iana, suria i tanugi na tarani ga koro ma ka oto.

³Ngaia ki hagamagahurugi na bea ni vogasiha ni ataro iata na enoni mahuara henigi na agua ga vogasi igê. Ngaia ki kumukumugigi na u na hê ni ataro ma ki tapi barugigi na u na girarana ka Asera na ataro.

⁴Ngaia ki bonasira na ai ni Juta ka toto suria maninga na Araha God iata na êvarita ma ka marupegi na hagesuringa ma na ramata iana.

⁵Suria ngaia ki hagamagahurugi na agua ni vogasiha ni ataro ma na bea ga sungigi igê na marâ i sigini koro tangara na ataro tenigi na hinua hato i Juta. I Juta i marungia, ki oga igê na marapeha.

⁶Matena i maneraha, ngaia ki pararihigi na hinua i Juta, ma ki mareha rârâ na hearihatana surigi tani na harisi, suria na Araha ki katoa ki oga suri parongana.

⁷O Asa ki vi tangara na ai ni Juta, ki vi: “Nika, ge pararihigi na hinua, ke tagarahigi na bebetehe ma na maani para, ga girara ga purusigi ma ka raburigi. Igia ka taua gatagata na agua suria igia ka râ surigi na obaniha iana na Araha God iaka. Ngaia ki anumasigia ma ki katogia ka oga suri parongaka surigi na ara ni pereperegana na apanena iaka.” Vikê ngaira ka tagara ma ka tavoraha maninga na ara ni marâ tangara.

⁸Na maneraha ki nahunira na 300,000 na mane ni me tenia na varo ninuni iana o Juta, ga tangaru renigi na bêata ma na ora, ma na 280,000 na mane ni me tenia na varo ninuni iana o Benamino, ga tangaru renigi na bêata ma na epage. Ngaira hato ka na mane ni me ramo ga manisingenia na hearihatana.

⁹O Seraga ni Sutane henira na bera na mane ni me iana henigi na tangarê na kati ni me, ki sugaria i Juta, ki rârâ ma ki tariha i Maresa.

¹⁰O Asa ki râ ki meheariha, ma ngairerua karu pu hetanga igê na maruguna i Sepata hagarangia i Maresa.

¹¹O Asa ki avarasia na Araha God iana, ki vi: “Araha, igo ko girara go tamanira nikâ na mane ni me ga pe rako, hanana ga teharira na mane ni me ga rako. Hoi, Araha God iamami, gu tamanigami i ngekê, suria igami kami hagêguritogo renigo. Igami kami râ me ikê, hanana mi meraheariha urusigo na bera na mane ni me. Araha, igo nga ka na God iamami. I mareha rârâ ta na enoni ge girara vige teharigo.”

¹²Na Araha ki teharira na mane ni me ni Sutana, matena o Asa ma na mane ni me ni Juta ka taharira. Na mane ni me ni Sutana ka gava.

¹³Ma o Asa ma na mane ni me iana ka tarigenira rârâ ma ka tariha i Gerare. Rako teha na mane ni Sutana ka me. Tahema ki bara tangara vige meraheariha nikâ na mane ni me ni Juta. Na Araha ma na mane ni me iana ni Juta ka tê hunira ngavê na mane ni Sutana ma ka raugi rako ngavê na marâ tenira.

¹⁴Nikâ ngaira ka girara ga henahuraugi na hinua hagarangia i Gerare, suria na enoni igê ka magutenia ngavê na Araha. Na mane ni me ni Juta ka rurugu tenigi na hinua ngegana ma ka toregi rako era na marâ tenigi.

¹⁵Nikâ ngaira ka taharigi na tênga iata na mane ga nahuni togoha ma ka raura vê rako na sipi na goti ma na kamelo. Ma hemuri ngaira ka aporo tanga i Jerusaleme.