Read Kahua 2 SIHONGA 15 Bible Online

2 SIHONGA 15 - Kahua bible

2 SIHONGA 15

¹Na raramohana God ki angaria o Asaria karena o Otete,

²ki râ ki mehetarahu na maneraha o Asa. O Asaria ki tamasi raha, ki vi: “Mu karingê, igo na maneraha o Asa ma igamu hato na enoni ni Juta me Benamino. Na Araha ki ngahisigamu manga vi igamu ma kamu tototo suria. Manga i mareha, ki mareha. Manga mu garia, ngaia ki page katogamu kamu tarahua. Ma ki manga mu rumakaka renia ngaia, hoi, ngaia ki page rumakaka renigamu igamu.

³I arihu me noga na Isiraelita ka pe rahesia rârâ na God monari, ma ka pe nahunira rârâ na mane ni vogasiha, hanana vige hagesurira renigi na ramata. Ngaira ka oga bono bê ma.

⁴Ma na matena i tarahura na bagabevoana, hoi, ngaira ka kahu takusia aporo na Araha God iata na Isiraelita. Ngaira ka garia ma ka tarahua.

⁵Igê na matena ngekana na enoni ki bara vige arâ purunguni, suria na perenga ma na sutaganiha ka aharêsigi na ara ni agua.

⁶Na hemerongeana ki oga i berarogata na ara ni apane ninuni ma i berarogani na hinua, suria God ki nakagi na bagabevoani ma na mamasiaganiha ka tarahura.

⁷Ma igamu, mu ramoramo ma siana kamu rumakaka. Igamu kamu page bâsigi na meni na tagaraha iami.

⁸Matena o Asa ki rongoa hato o Asaria karena o Otete i tamasi poropete, ngaia ki kahu tako gatagata. Ngaia ki hagamagahurugi na nunuta na ataro tenirerua na apaneni i Juta me Benamino ma tenigi na hinua i henahuraugi i na apanena huhunganiga i Eparaimi. Ngaia ki tagarahia aporo na bea ni vogasiha tanga na Araha igê na mahera na ruma ni rotu.

⁹Rako na enoni tenigi na varo ninuni iata hehegitigi o Eparaimi, o Manase mo Simeone ka haku henira na kariana o Asa ma ka oga i Juta, suria ngaira ka bâsia, vi na Araha ki tamania. O Asa ki bonasira ka haku me ngaira hato ma na ai ni Juta me Benamino.

¹⁰Ngaira ka haku i Jerusaleme igê na oruta na hageha igê na tangahuru matara na rimata na harisi i maneraha surigi o Asa.

¹¹Igê na tangiana ngekana ngaira ka vogasia na Araha renira na tangarê gi pi na puruka ma na rehagaro gi pi na sipi ma na goti i berarogani na marâ ga bani henahuraugi me.

¹²Ngaira ka suru, vi ngaira ka rahesia na Araha God i mêrihata hagenani suria na suruheri God i bani naka henira na êvarita.

¹³Na ani mavê na enoni, henaka na gapu haoru se gemêa, na mane se na gete, i pe rahesia God, hoi, i tuguhia ga nahuia ki meme.

¹⁴Ngaira ka tamasi raha ka tohe renia na atana na Araha, viga hagahigasia na suruheri. Hemuri ngaira ka ngere vagevage ma ka uhigi na ahuri.

¹⁵Na ai ni Juta hagenani ka vagevagesia na heaganariha ga katoa i mêrihata hagenani. Ngaira ka obakoro ngavê ka rahesia na Araha, ma na Araha ki aganarira ma ki haganahunira renia na marapeha surigi na ara ni pereperegani na apanena iata.

¹⁶Na maneraha o Asa ki hatungia ka Maaka kirana tenia na âgâga iana vi kenana na geteraha, suria ngaia ki tagarahia na nununa ka Asera na ataro ni rakoniha i katokato bera. O Asa ki tapia so na u na nununa ngekana, ki metametaria, ma ki sungigi na ameameagani igê na maruguna i Kiterone.

¹⁷Henaka o Asa ki pe hagamagahurugi na ara ni agua hato ni vogasiha ni ataro igê na agua, ma ngaia ki toto suria nga na Araha igê na ogaha iana hagenani.

¹⁸Ngaia ki nakagi i ruma ni rotu na mahatanga hato, o Abia o vaemana i bani hagapunarigi tanga God henigi na marâ tanga na hagarahenga, ga tagarahigi renigi na golo ma na siliva, i hagapunarigi marena tanga God.

¹⁹Na hearihatana ki mareha rârâ mataro me na tangahuru gi oru matara na rimata na harisi i maneraha surigi.