Read Kahua 2 SIHONGA 16 Bible Online

2 SIHONGA 16 - Kahua bible

2 SIHONGA 16

¹Matena o Asa ki maneraha i Juta surigi noga na tangahuru gi oru matare ono na harisi, o Basa na maneraha i Isiraele ki sugaria i Juta ma ki haganega ki pararihia na hinua i Rama, hanana i hagabarasigi na ara ni tara râ tanga ma tenia i Juta.

²Vikê o Asa ki tavogi hura na siliva ma na golo tenigi na kiboru ni ruruguha i ruma ni rotu ma i ruma raha iana, ma ki hagatorangenigi tanga i Tamasiko, tanga o Benihatata na maneraha i Siria.

³Ngaia ki vi tanga o Benihatata ki vi: “Naka karu suruheri nogaterua mangarerua o vaemakerua. Na siliva ma na golo ngegê ka na mahatanga tangago. Hoi, gu naka vê na suruheri iamu henia o Basa na maneraha i Isiraele, hanana ngaia ki torera hura na mane ni me iana tenia na apanena iaku.”

⁴O Benihatata ki aganaria na katoha iana o Asa ma ki hagatorangenira na mane ga bêngenira na mane ni me iana henira na mane ni me iata, hanana ga taharigi na hinua i Isiraele. Ngaira ka henahuraugi na hinua i Ione, i Tane, i Abele Maimi ma na hinua hato i na apanena i Napatali, ga rurugi igê na marâ tangara na mane ni me.

⁵Matena na maneraha o Basa ki rongo vikana, ngaia ki naka vê noga vige pararihia i Rama ma ki naka so na tagaraha.

⁶Hemuri na maneraha o Asa ki hagahakura na mane tenia i Juta hagenani, hanana ga toregi râ na hê ma na bagorani na apinige, o Basa i obanigi tanga vi parapararihia na hinua i Rama, ma ngaira ka pararihirerua na hinua i Geba me Misipa hete renigi.

⁷I na matena ngekana na poropete o Ganani ki râ i pasina na maneraha o Asa ma ki vi: “Suria igo ko hagêguritogo renia na maneraha i Siria ma ko pe hagêguritogo hete renia na Araha God iamu, tahema na mane ni me ma na maneraha i Isiraele ka gava tenigo.

⁸I hega, ga pe rako ngavê vari na mane ni me ni Sutana me Libia henigi rako na kati ni me ma henira na mane ni me igê na hosi? Ma suria igo ko hagêguritogo renia na Araha, tahema ngaia ki katogo ko teharira.

⁹Na Araha ki hahutugia na maveta hagenani, hanana i tamanira na ani ga toto suria i mêrihata hagenani. Igo ko kato bangago. Tahema tenia i ngekê ki page tarahugo tare na hearihatana.”

¹⁰Na tamasinga vikana ki hagamangaria ngavê o Asa. O Asa ki rakua na poropete renigi na seni. Igê nga na matena ngekana o Asa ki haganega ki hagamamasiagara bâraha na enoni.

¹¹Na ara ni tarani ga vora me, haganega me tenia na matena o Asa ki maneraha mataro me ki me, ka bani segegi so igê na buka na sihonga renira na maneraha i Juta me Isiraele.

¹²Igê na tangahuruta matare siva na harisi i maneraha surigi o Asa, ngaia ki tavi na êgana, suria na mera raha ki tarahua. Henaka vikana, ma ngaia ki pe avarasia rârâ hete na Araha, ma ki hagêguritogo ma renira na mane mangata.

¹³Ma ngaia ki me i muriterua na harisi gi rua.

¹⁴Ngaira ka bagia igê na vaba i bani karua tanga marena i hinua iana o Tavite. Ngaira ka monea na gahuana renia na oile ga toraria henigi na marâ i sigini koro, hanana viga bagia. Ngaira ka tanga na apena na bagagi raha ni angiha maramara, hanana ga hagahigasia.