Read Kahua 2 SIHONGA 17 Bible Online

2 SIHONGA 17 - Kahua bible

2 SIHONGA 17

¹O Josapata ki maneraha urusia o Asa o vaemana ma ki ama ni raramohaga nga, hanana i ura pusira na Isiraelita.

²Ngaia ki kasira na mane ni me ka oga surigi na hinua, o Asa i bani henahuraugi i na apanena i Eparaimi.

³Na Araha ki tamania o Josapata, suria ngaia ki amaka surigi na parongana o vaemana igê na harisi i hagenago ki maneraha igê. O Josapata ki pe hagarapea o Bala na ataro.

⁴Ngaia ki toto suria hete na God iana o vaemana. Ngaia ki marupegi na ramata iana God ma ki pe maratorata na maneraha i Isiraele.

⁵Na Araha ki katoa i Juta ki oga nganganihaga i ruguhana na maneraha o Josapata. Na enoni hato kaniga migirâ me na mahatanga tanga. Vikana ngaia ki ruruguha ngavê ma ka hagahigasia ngavê.

⁶Ngaia ki ageagesia na totosuriana na Araha. Ngaia ki hagamagahurugi tenia i Juta na agua ni vogasiha ni ataro ma na nununa ka Asera na ataro.

⁷Igê na oruta na harisi i maneraha igê, ngaia ki kasira na enoni raha igê na gavumane iana ka râ ka hagesurira na enoni surigi na hinua i Juta renigi na ramata iana God. Ngaira ka no Benigaile, o Obatia, o Sekaria, o Netanele mo Mikaia.

⁸Na vere siva na mane ni hagarahenga ma na mane ni vogasiha gi rua ka râ henira. Na mane ni hagarahenga ka no Semaia, o Netania, o Sebatia, o Asaele, o Semiramote, o Jonatana, o Atonia, o Tobia mo Tobatonia. Na mane ni vogasiha gi rua ka no Elisama mo Jorama.

⁹Ngaira ka tora na buka ni ramata iana na Araha ma ka râhigi na hinua hato i Juta, hanana ga hagesurira igê na enoni renigi na ramata iana God.

¹⁰Na Araha ki katora na maneraha igê na agua rihia i Juta ka magu, hanana vige meheariha na maneraha o Josapata.

¹¹Tani na ai ni Pilisitia ka mahata tanga o Josapata renigi rako era na siliva ma na ani getegi na mahatanga, ma tani na ai ni Arabia ka merarâ me tanga na 7,700 na sipi ma na 7,700 na goti.

¹²Ngekana o Josapata ki kahu ama ni raramohaga ngavê. Ngaia ki tagarahigi na ruma nganganihaga ma na hinua suria i Juta hagenani,

¹³hanana i nakagi nanê igê rako era na marâ. I Jerusaleme ngaia ki nakara igê na mane ga bêngenira na mane ni me, ga manisingenia na hearihatana.

¹⁴Na atata ma na raraha iata ma gi hita na mane ni me ga bêngenira hegitigi kani igê. O Atena ki bêngenira na mane ni me tenia na varo ninuni iana o Juta. Ngaia ki bêngenira na 300,000 na mane ni me.

¹⁵Na ruata me tanga o Atena ka no Joganana, i bêngenira na 280,000 na mane ni me.

¹⁶Na oruta me tanga o Atena ka no Amasia karena o Sikiri, i bêngenira na 200,000 na mane ni me. O Amasia ki bani hagapunaria marena tanga na Araha.

¹⁷Na ani i bêngenira na mane ni me tenia na varo ninuni o Benamino ka no Eliata, i manisingenia ngavê na hearihatana. Ngaia ki bêngenira na 200,000 na mane ni me ga tangaru renigi na bêata ma na epage.

¹⁸Na ruata me tanga o Eliata ka no Josabata i bêngenira na 180,000 na mane ni me, ga tangaru bâkoro renigi na tangaruha.

¹⁹Na maneraha ki nakara nga i Jerusaleme na mane ni me ngegê ma ki nakara nikâ na mane ni me surigi na hinua nganganihaga i Juta.