Read Kahua 2 SIHONGA 18 Bible Online

2 SIHONGA 18 - Kahua bible

2 SIHONGA 18

¹Matena o Josapata na maneraha i Juta ki ruruguha ma ki rongo raha na atana, ngaia ki hagauragingenia o karena henia ka karena o Agaba na maneraha i Isiraele.

²Ki rârâ tani na harisi i muri me, o Josapata ki râ tanga na hinua raha i Samaria, hanana i vatugia o Agaba. O Agaba ki magoto renira rako era na sipi na goti ma na puruka, hanana i hagahigasira o Josapata ma na kariana. Ngaia ki uhungia bâraha o Josapata, hanana vi tamania karu taharia i Ramote i Gileata.

³Ngaia ki hagatea, ki vi: “I hega, igo ko obania vigo tamaniê, karu taharia i Ramote?” O Josapata ki arami, ki vi: “Mako! Inê kê naasigo ma igo ma na mane ni me iaku nogata.”

⁴Ma ngaia ki vi nikâ: “Garu gari takoha hagenago tenia na Araha.”

⁵Vikê o Agaba ki unira banu na poropete, na ararina na tangarê ge he. Ngaia ki hagatera, ki vi: “I hega, i koro ma vari, vi inê kê arâ kê taharia i Ramote se mareha?” Ngaira ka arami, ka vi: “Gu taharia. God ki page katogo ko tehateha.”

⁶Ma o Josapata ki hagate, ki vi: “I hega, i mareha ta na poropete râ nikâ, hanana vige hagatea na Araha tangagia?”

⁷O Agaba ki arami, ki vi: “Ua, na ani gi tage kani goga mênga. O Migaiehu karena o Jimila. Ma inê kê usitenia, suria ngaia ki pe tamasi poropete noga renigi na tarani vige koro tangê, ma na tarani ma ga era tangê.” O Josapata ki arami, ki vi: “Siana ko vi vikana!”

⁸Ngekana o Agaba ki unia banu na mane ni hagaotonga ma ki bonasia ki râ ki merâ me ototo râ nga o Migaiehu karena o Jimila.

⁹Na maneraha gi rua karu tuguni renigi na tuguni i marisiterua vi na maneraha. Ngairerua karu oga so igê na atohaterua igê na agua ni hatanga i metara igê na maani para i Samaria. Na poropete hato ka tamasi poropete i maaterua.

¹⁰O Sitekia karena o Kenana na hitangita ki nakagi na aiani na honi na puruka i bêna ma ki tamasi tanga o Agaba, ki vi: “Na Araha ki vi, ‘Renigi na honi ngegê igo ko page meraheariha re na ai ni Siria ma ko page teharira ngavê.’”

¹¹Na poropete hato getera ka tamasi vikana nogata, ka vi: “Taharia i Ramote ma ko page teharia. Na Araha ki page katogo ko tehateha!”

¹²Ngekana na mane ni hagaotonga, i bani merâ me o Migaiehu, ki vi tanga o Migaiehu, ki vi: “Na poropete hato getera ka tamasi poropete renigi na ara ni marâ hato, viga page tavoraha bâkoro ma tanga na maneraha. I ararigo, vigo tamasi vikana nogamu.”

¹³Ma o Migaiehu ki arami, ki vi: “Inê kê tohe renia na Araha mamauri, vi inê kê page tamasi ma renigi na marâ na God iaku i hagatorê renigi!”

¹⁴Matena i ura i maana na maneraha o Agaba, o Agaba ki hagatea, ki vi: “Migaiehu, i hega, i arari ma vari, vi igamirua na maneraha o Josapata menê vigamuru arâ kamuru taharia i Ramote se mareha?” O Migaiehu ki arami, ki vi: “Mako, taharia! Igamurua kamuru page tehateha. Na Araha ki page katogamurua kamuru tehateha.”

¹⁵Ma o Agaba ki arami, ki vi: “Go tamasi nga igê na monariha, matena go tamasi urusia na Araha. Hagarako inê kê bani tamasi tangago vikana!”

¹⁶O Migaiehu ki arami, ki vi: “Inê kê bâsia, vi na mane ni me na Isiraelita ngaira ka totoko surigi na hungani mangara na sipi i mareha na avanuta, hanana vige bâbâsurira. Ma na Araha ki tamasi, ki vi: ‘Na me ngegana ki mareha na ani, hanana vige bêngenira. Nakara ke aporo suri parongata i pasita.’”

¹⁷O Agaba ki vi tanga o Josapata ki vi: “I hega, inê kê pe bani vi tangago, vi ngaia ki mareha rârâ vige tamasi poropete renigi na tarani ge koro tangê? Tarema na tarani ga pe koro tangê!”

¹⁸Ma o Migaiehu ki vi: “Karinga na tamasinga iana na Araha. Inê kê bâsia na Araha i oga igê na atohana i pasina. Na angero hato iana ka ura hetangenia.

¹⁹Na Araha ki hagatera, ki vi: “Ti na hitangimi kani page hagabekasia o Agaba, hanana vi arâ i Ramote ka nahuia ki meme igê? ‘Tani na angero ka visia ta na marâ ma tani ka visia ta na marâ getea.

²⁰Rârâ ma ta na angero ki ura râ tanga na Araha ma ki vi, ‘Inê be hagabekasia.’ Na Araha ki hagatea, ki vi, ‘God ki hagabekasia hega?’

²¹Na angero ki arami, ki vi, ‘Gê page arâ, kê katora na poropete hato iana o Agaba ka hagaparu.’ Na Araha ki vi, ‘Gu râ ma ku hagabekasia. I girara ma.’”

²²O Migaiehu ki hatungia na tamasinga iana, ki vi: “Nga hanana ngekana! Na Araha ki katora na poropete iamu ngegana ka hagabekasigo, suria ngaia marena ki bani naka, vi na bagabevoana ki page tarahugo.”

²³Hoi, na poropete o Sitikia ki râ tanga o Migaiehu ki bahitaria ma ki hagatea, ki vi: “I tanu hega? Na raramohana na Araha ki hato teniê vari inê, ma ki angarigo vari igo, hanana go tamasi poropete?”

²⁴O Migaiehu ki arami, ki vi: “I ta na tangiana igo ko page ahiahi i murina banu ta na ruma ma ko kahu girarago.”

²⁵Na maneraha o Agaba ki haribona, ki vi: “Hagatotongoa o Migaiehu ma torea tangarerua o Amone, i bâsuria na hinua, ma o Joasi o kareku.

²⁶Vi tangarerua karu kasia i ruma ni hagaitangiha ma karu hagangêa renigi ma na bereti ma na ve mataro me kê aporo me purupurunguniaga.”

²⁷O Migaiehu ki vi: “Manga go aporo me purupurunguniaga, ngekana ki vi, vi na Araha ki pe tamasi i haraku!” Ma ngaia ki vi nikâ: “Igamu hato mu karinga na tamasinga iaku!”

²⁸Hemuri o Agaba na maneraha i Isiraele mo Josapata na maneraha i Juta karu râ karu taharia i hinua i Ramote i Gileata.

²⁹O Agaba ki vi tanga o Josapata, ki vi: “Matena garu arâ igê na hearihatana, inê kê page atani gahugahu mavê, hanana siana ka bâbâgirarê na enoni. Ma igo ma kanigo tuguni nga manga na maneraha.” Vikê na maneraha i Isiraele ki atani tuguni ngavê matena i râ tanga na hearihatana.

³⁰Na maneraha i Siria ki bani bonasira na mane ga bêngenira na mane ni me igê na kati ni me, hanana ga taharia na maneraha i Isiraele, mareha rârâ vi tani getea râ nikâ.

³¹Tahema matena ga bâsia na maneraha o Josapata, ngaira hato ka vi ma, vi ngaia ki na maneraha i Isiraele ma ka ahoro tanga ka taharia. Ma o Josapata ki ngere ma na Araha God ki hagatahia ma ki pariria bê aporo na tahariha tenia.

³²Na mane ga bêngenira na mane ni me igê na kati ka kahu bâgirara, vi ngaia ki mareha vi na maneraha i Isiraele. Vikê ngaira ka naka vê, vige tarigenia.

³³Ma ki akê me, na mane ni me ni Siria ki hanatenia na mage. Na mage ki tarabanu igê ne berarogani na ênahina na tuguni ni hearihatana iana o Agaba na maneraha. O Agaba ki ngere tanga na mane i torea na kati ni me iana, ki vi: “Inê kê mamari! Gu kariarigu. Toreê hura tenia na hearihatana.”

³⁴Matena i akê me bâraha ngavê na hearihatana, na maneraha o Agaba ki ama ni têa nga ki ura igê na kati ni me iana, ki maatira na ai ni Siria. Matena i su noga na arito ma ngaia ki me.