Read Kahua 2 SIHONGA 19 Bible Online

2 SIHONGA 19 - Kahua bible

2 SIHONGA 19

¹O Josapata na maneraha i Juta ki aporo purupurunguniaga i ruma raha iana i Jerusaleme.

²Na poropete o Jehu, karena o Ganani, ki râ vurusia na maneraha, ma ki vi tanga, ki vi: “I hega? Go takusia vi i koro vari, kani viga tamanira na enoni era ma ka panepane henira na ani ga pe botage renia na Araha? Na tarana go akê me igê ngekana, ki katoa na Araha ki mangariaga tangago.

³Henaka, ma igo ko koro igê tani na tarani. Igo ko bani hagamagahurugi na nununa ka Asera na ataro, henaka na enoni ka vogasia, ma igo ko uhungia, hanana vigo arâ suria hete na obaniha iana God.

⁴Henaka na maneraha o Josapata ki oga i Jerusaleme, ma ngaia ki arâhira hagarako na enoni, haganega i Bereseba i Negeve ki tariha igê na pereperegana hagatê na apanena huhunganiga i Eperaimi, hanana i katora na enoni ka aharia aporo na Araha God iata na êvarita.

⁵Ngaia ki kasira na mane ni suriha surigi na hinua nganganihaga i Juta.

⁶Ngaia ki hagaotora, ki vi: “Mu takusia maninga tare, vi igamu ki mareha vigamu surira na enoni urusira na enoni ma urusia hete na Araha. Ma ngaia ki ngahisigamu matena mu visia mataha na hagakitana iami.

⁷Mu hagahigasia nga na Araha. Mu katogi nga na morani na tagaraha iami, suria na Araha God iaka ki page hagaitangigamu, manga vigamu hagahagaparu, se vigamu têtê henira tani na enoni, se vigamu aganarigi na vatevateha.”

⁸I Jerusaleme o Josapata ki kasira igê na mane ni hagarahenga, na mane ni vogasiha ma tani na enoni raha ni hinua, hanana ga surira na enoni, ga aharê igê na ramata iana na Araha, se na enoni i Jerusaleme ga hepupusi.

⁹Ngaia ki hagaotora vikê: “Matena mu katogi na tagaraha iami, mu hagahigasia nga na Araha ma kamu têtê viteana maninga i na ara ni tagaraha iami.

¹⁰Manga na tamami tenia na hitangini na hinua ma ka tagarenia me tangagamu na nahunga ninuni, se na aharêngiana na ramata henigi na tamasinga igê, mu hagaotora maninga, hanana ga ototo surira mareta igê na suriha ninuni, hanana siana ka tasitasi, ma ka hagahigasia hete na Araha. Manga i mareha, na mangariaganiha iana na Araha ki page tarahugamu, igamu ma na tamami. Manga mu tagara maninga, igamu ki asa vigamu page tasi.

¹¹O Amaria, na mane ni vogasiha i teha, ki katoa na hatongina na hagakitakitana renigi na marâ igê na apanena igê na rotu. O Sebatia karena o Isimaele na bêta na raraha iana o Juta, ngaia ki katoa na hatongina na hagakitakitana renigi na marâ hato, ga mareha igê na apanena igê na rotu. Na mane ni hagarahenga ki tuguhira, viga hagamonarigi na hagakitakitana iami. Mu ramoramo kamu arâ surigi na tamasinga ngegê, hanana na Araha ki panepane henigamu.”