Read Kahua 2 SIHONGA 2 Bible Online

2 SIHONGA 2 - Kahua bible

2 SIHONGA 2

¹Na maneraha o Salomo ki kato vi tagarahia na ruma ni rotu, hanana ga rahesia igê na Araha, ma ki kato nikâ vi tagarahia na ruma raha iana marena.

²Ngaia ki atera na 70,000 na mane tanga ga toregi me na marâ tanga ga tagarahirerua re, ma nikâ na 80,000 na mane tanga ga ninigi na hê. Ngaia ki kasira na 3,600 na mane ga bâsurira igê na tagaraha iata.

³O Salomo ki kasi tamasinga tanga o Girama na maneraha i Taire, ki vi: “Igo ko hagavuringenigi na hata tanga o vaemaku na maneraha o Tavite tanga i tagarahia re na ruma raha iana. Hoi, go katokato vikana nikâ tangê nogaku.

⁴Inê kê obania vigê tagarahia na ruma ni rotu, hanana gê hagahigasia igê na Araha God iaku. Ngaia ki page vora re na ruma apuna iana God, hanana igami, na kariaku ma inê, kami rahesia igê. Igami kami page sungigi igê na marâ ni sungiha i sigini koro. Igami kami page tagarenigi igê tanga tare ki bê ki arâ na bereti apuna ma kami page susu tanga i na ara ni mavoraro, i na ara ni manurahi, i na ara ni tangiani ni mamaroha, i na ara ni tangiani raha ni hageha haoru, ma igê na ani getigi na tangiani raha ni rotu, hanana mi hagarahasia igê na Araha God iamami. Ngaia ki bani bonasira na Isiraelita ka katokato hagahu vikana.

⁵Inê kê obania ve tagarahia na ruma ni rotu i raharaha, suria God iamami ki raha teharira na ataro hato.

⁶Henaka i manga ngekana, ma ki monari i bara, vi ve tagarahia na ruma ni rotu ge araria God, suria henaka vi na vavearo ki raha teha ngavê, ma ngaia nikâ ki pe araria. Inê kê pe takusia vikana ma kê obania ma hete vigê tagarahia na ruma ni rotu tanga ma ga sungigi igê na marâ ni sungiha i sigini koro tanga God.

⁷Hoita, gu kasia me ta na mane, i aitangisigi na tagarahiani na marâ renigi na golo, na siliva, na kapa higa ma na aioni, i aitangisia i karugi na mahe igê, ma ki aitangisia i tagarahigi na gahu ka maravarava, ka rotorotoaga memera ma ka memera. Ngaia ki page tagara henira na mane i Juta me i Jerusaleme, ga aitangisigi na tagaraha ngegana, o vaemaku o Tavite i bani atera.

⁸Inê kê bani girara, vi na mane iamu ka aitangisia na tapiha ni apinige. Tahema gu hagatora me tangê na hata ma na apinige getigi i Libanone. Inê kê nanê, vigê kasira vê na mane tagara iaku, hanana ga tamanira na animu,

⁹hanana ga hagananêgi rako era na apinige, suria na ruma ni rotu, gê obania vigê page tagarahia, ki page raharaha ngavê ma ki page bâkoro ngavê.

¹⁰Inê be hagangêra na mane tagara iamu, ga tapigi na apinige. Inê be hagatorangenigi vê tangago na 90,000 na paike na koni, na 90,000 na paike na palaua, na 900,000 lita na vaini ma na 900,000 na lita na oile ni olive.”

¹¹Na maneraha o Girama ki barua aporo na tamasinga iana o Salomo, ki vi: “Suria na Araha ki takuira na kariana, tahema i atego ko maneraha iata.

¹²Ge hagarahasia na Araha God iata na Isiraelita, i hagavorarerua na vavearo ma na ano. Ngaia ki haganahunia na maneraha o Tavite renia o karena, i nahuni takoha mataha, na aitangisiha ma na giraraha, ma ki obania vi tagarahirerua na ruma ni rotu tanga na Araha ma na ruma raha iana marena.

¹³Tahema inê kê kasia vê tangago o Gurama na mane tagara i tako mataha ma ki aitangisigi ngavê na tagaraha go obanigi.

¹⁴Kenana kani tenia na varo ninuni iana o Tani. O vaemana kani tenia i Taire. Ngaia ki aitangisigi na tagarahiani na marâ renigi na golo, na siliva, na kapa higa, na aioni, na hê, na apinige, na gahu ga maravarava, rotorotoaga memera, memera ma ka siki. Ngaia ki girara i karugi na mahe ma ki tagarahigi na ani mavê na nununi na marâ, ga hagabângenigi tanga. Ngaia ke tagara henira na mane iamu, ga aitangisigi na tagaraha ngegana ma henira na ani, ga bani tagara tanga o vaemamu na maneraha o Tavite.

¹⁵Hoi, gu hagatorangenigi me tangagami na koni, na palaua, na vaini ma na oile ni olive, go bani visigi me tangagami.

¹⁶Igê na hungani i Libanone igami kami page tapigi so igê na hata hato go ohanigi, kami page harugi haku mangagi na paparagê na hata hato go ohanigi, ma kami page hagatarigi i asi tanga i Jopa. Tenia i Jopa igo ko kahu girara go toregi tanga i Jerusaleme.”

¹⁷Na maneraha o Salomo ki tomanira na enoni hato ga mamahuara Isiraele, manga i bani kato vikana o vaemana o Tavite. Ngaira hato haku ka vora na 153,600.

¹⁸Ngaia ki atera na 70,000 na hitangita, hanana ga toregi na marâ tanga ga tagarahirerua re na ruma, ma na 80,000 tanga ga ninigi na hê igê na hungani, ma na 3,600 tanga ga bâbâsurira ka tagara maninga.