Read Kahua 2 SIHONGA 20 Bible Online

2 SIHONGA 20 - Kahua bible

2 SIHONGA 20

¹Ki rârâ ma na mane ni me ni Moaba ma ni Amone henira na Meunita ga haku henira, ngaira hato ka sugaria i Juta.

²Tani na mane tora tamasinga ka râ ka hagarongoa na maneraha o Josapata, ka vi: “Na mane ni me rako teha ngavê tenia i Etome ka bani pane tarê me igê na Asime, hanana ga taharigo. Ngaira ka bani henahuraua i Gasesone Tamare.” Ta atana nikâ i Engeti.

³O Josapata ki magu, ki nunginungi ki gari takoha tenia na Araha. Hemuri ngaia ki bonasira i Juta hagenani ka hari.

⁴Tenigi na ara ni hinua i Juta na enoni ka hatani arâ tanga i Jerusaleme, hanana ga garigari takoha igê tenia na Araha.

⁵Ngaira ma na ai ni Jerusaleme ka haku me igê na mahera haoru na ruma ni rotu. Na maneraha o Josapata ki râ ki ura i maata.

⁶Ngaia ki nunginungi raha, ki vi: “Araha God iata na êvarimami. Tenia i pasimu igo ko marungira na apaneni hato na enoni i maveta. Igo ko raramohaga hunigo. Na raramohamu ki raha teha ngavê. I mareha rârâ tani vige maratoramu.

⁷Igo nga ka na God iamami. Matena na kariamu na Isiraelita ka parênia na agua ikê, igo ko tarigenira hura na enoni ga oga igê, ma ko haganahunira na raraha iana o Abarahamo na kariamu koro renia, hanana ga nahunia hagahu.

⁸Haganega tenia i ngekana ngaira ka oga ikê ma ka bani tagarahia na ruma ni rotu, hanana ga hagahigasigo.

⁹Ngaira ka tako ka henaka vi na anima na bagabevoana, na hearihatana, na ringa, se na magêha, ma ki tarahura suria vi na hagaitangiha tangara, ngaira ka girara ma ga hakuhaku me i maana na ruma ni rotu iana na Araha God iata ma ka avarasia igê na mamasiaganiha iata. Ma ngaia ki page aganarira ma ki page hagatahira.

¹⁰Hoi, na mane ni me ni Amone ma i Moaba me Etome ka taharigami. Matena na êvarimami ka hura pania i Esipito, igo ko manimanira vi siana ka aharêvoro igê na apaneni iata na enoni ngegana. Tahema na êvarimami ka susu pane tenira ma ka pe mutera.

¹¹Ma ku bâsira. Ngaira ka bê me tangagami. Ngaira ka râ me ka paigami hura tenia na agua, go bani haganahunigami renia.

¹²Igo nga ka na God iamami. Gu hagaitangira, suria i bara tangagami, renia na mane ni me ga taharigami ka rako teha ngavê. Igami kami tugupu, ma kami hagêguritogo renigo, vigo tamanigami.”

¹³Na mane hato i Juta henira na gete iata ma na kareta, ngaira ka ura i ngekana i maana na ruma ni rotu.

¹⁴Na raramohana na Araha ki angaria ta na mane ni hagarahenga i oga i berarogata na enoni. Na atana ka no Jagasiele karena o Sekaria. Ngaia ka na raraha iana o Asapa surira o Matania, o Jeiele ma o Benaia.

¹⁵O Jagasiele ki vi: “Maneraha, ma igamu hato na ai ni Jerusaleme me Juta, na Araha ki vi: ‘Siana kamu bagahagêguri. Siana kamu magutenira na mane ni me gahu ngegana. Na hearihatana ngekê ki mareha vi i berarogami ngaira ma igamu, ma i berarogamami hete, ngaira ma inê God.

¹⁶Mu taharira i gomaha, matena ga akê ka taratara me igê na teha i Sisi. Igamu kamu merahetarahu igê na hatungina na maruguna hagarangia na bagamasusu raha i Jeruele.

¹⁷Mareha vi igamu kani vigamu meraheariha. Mu rêra harahara ma, ma kamu bâbâ, manga i he kani inê na Araha kê teharira kê hagatahigamu. Ai ni Juta me Jerusaleme, mu ramoramo. Siana kamu magu. Mu tavo uga kamu meraheariha. Inê na Araha kê page ngahisigamu.’”

¹⁸Hemuri na maneraha o Josapata ki susure, ki maroro so ki puru i ano, ma ki rahesia na Araha, ma na enoni hato ka rahesia nogata na Araha.

¹⁹Na mane ni hagarahenga tonganirerua na hagosi ninuni iaterua hegitigi o Kehata mo Koraga ka aharaga ma ka ngere ka hagarahasia na Araha God iata na Isiraelita.

²⁰Na mahogotana igê na tangiana i muri na enoni ka hura ka râ tanga na bagamasusu raha hagarangia i Tekoa. Matena ga tavoraha hura noga, o Josapata ki tamasi tangara, ki vi: “Ai ni Juta me Jerusaleme. Rongoê. Mu hagêguritogo renia na Araha God iami. Vikana igamu kamu page tehateha. Mu tongesurigi na tamasinga iata na poropete ma kamu page akê me maninga.”

²¹Matena na maneraha ki gari giraraha hato tenira na enoni, na maneraha ki bonasira tani na enoni ni kiha ka tuguni manga igê na tangiana raha na rotu ma ka nanago tarata na mane ni me, hanana ga hagarahasia na Araha. Ngaira ka ki, ka vi: “Hagarahasia na Araha! Na takuiha iana ki asa vige page hato!”

²²Matena ga haganega ka ki, na Araha ki katora na mane ni me ga sugaria i Juta, ka atani henahu mavê.

²³Na Amonita ma na Moabita ka taharira na Etomita ma ka mutera ngavê. Ma hemuri ngaira ka heariha so mareta heri.

²⁴Matena na mane ni me ni Juta ka hura akê igê na agua na rekena akê, ngaira ka bâsira râ na merongata ga me hato. Na gahuata ka hetâhi i ano. I mareha rârâ tani vige tahi.

²⁵O Josapata ma na mane ni me iana ka râ ma ka rurugu igê. Ngaira ka tarahura rako na puruka, na nahuninga, na gahu ma na marâ getegi ga akê na meni. Ngaira ka rurugi haku surigi na tangiani gi oru ma ki asa vige toregi na ara ni marâ hato.

²⁶Igê na heta na tangiana ngaira ka haku me igê na maruguna i Beraka ma ka hagarahasia na Araha renigi na tauhana tangara. Tahema ka hêtana na maruguna ngekana vi Beraka, i vi Hagarahasia.

²⁷O Josapata ki bêngenira aporo na mane ni me iana tanga i Jerusaleme ma ka kasi mamava, suria na Araha ki teharira na merongata tenira.

²⁸Matena ga ata vê i hinua raha, ngaira ka tavo uga ka tari oto râ tanga na ruma ni rotu, matena ga rongo raha na gita, na ukelele ma na ahuri.

²⁹Matena na maneraha ma na enoni surigi na agua getegi ka rongo tarohana vi na Araha ki teharira na merongata na Isiraelita, ngaira ka bubununuga ngavê.

³⁰Vikê na hemarungiha iana o Josapata ki oga igê na marapeha, suria i katogi ki purupurunguniaga na ara ni pereperegana na agua i marungia.

³¹Matena o Josapata ki tonga na harisi tangahuru gi oru matare gi rima iana, ngaia ki vora re na maneraha i Juta. Ngaia ki oga i Jerusaleme ma ki maneraha surigi na tangahuru gi rua matare rima na harisi. Kenana kani ka Asuba ka karena o Siligi.

³²Tagenana manga o Asa o vaemana, ngaia nogana ki katogi na tarani ga oto i maana na Araha,

³³nga noga ma na agua ni vogasiha ni ataro ki pe hagamagahurugi. Ma na enoni ka mamêngara vige rahesia i mêrihata hagenani na God iata na êvarita.

³⁴Na tauhana hato getegi o Josapata, haganega tenia na matena i maneraha igê mataro me ki me, ka bani segegi so igê na buka na sihonga renia o Jehu karena o Ganani igê na buka na sihonga renira na maneraha i Isiraele.

³⁵Matena i tahitahi mênga, o Josapata na maneraha i Juta ma o Agasia na maneraha i Isiraele i erataga ngavê, ngairerua karu heaganari.

³⁶Ngairerua karu tagarahigi na haka igê na kâna i Esionegebere tanga ga arâ i Taresisi.

³⁷Ma na poropete o Eliesere karena o Totavahu ni hinua i Maresa ki ramonia o Josapata, ki vi: “Na Araha ki page botabotagigi na haka iamurua, suria igo mo Agasia kamuru heaganarigi.” I monari na haka ka guruguru ma ki asa hagetage vigê page râ hagamamana i Taresisi.