Read Kahua 2 SIHONGA 22 Bible Online

2 SIHONGA 22 - Kahua bible

2 SIHONGA 22

¹Tani na ai ni Arabia ka sugaria i Jerusaleme ma ka nahuira ka me o karena hato na maneraha o Jehorama, nga noga ma o Agasia o karena hagemuri. Vikê na ai ni Jerusaleme ka kasia o Agasia ki maneraha urusia o vaemana.

²O Agasia ki vora re na maneraha, matena i tangahuru gi rua matarerua na harisi iana. Ngaia ki oga i Jerusaleme ma ki maneraha suria na harisi gi tage. O Agasia ki amaka surigi na bagaparongata na maneraha tenia na apaparaha iana o Agaba na maneraha,

³suria ka Atalia kenana ki kato tanga ki bagaparongana. Ka Atalia kani ka karena na maneraha o Agaba ma o virana ka no Omeri na maneraha i Isiraele.

⁴O Agasia ki haritohea na Araha, suria i murina i me o vaemana, ngaia ki gari takoha tenira na ani getera râ nikâ na apaparaha iana na maneraha o Agaba. Na tarana ngekana ki hagaratena ki me.

⁵Ngaia ki râ surigi na tamasinga iata, tahema ngaia ki tamania o Jorama na maneraha i Isiraele ma karu meheariha o Hasaele na maneraha i Siria. Na mane ni me iaterua o Agasia mo Jorama ka ura hetanga henira na mane ni me iana o Hasaele i Ramote i Gileata. O Jorama ki mamari igê na hearihatana.

⁶Ngaia ki aporo tanga na hinua i Jeserele, hanana ga mavomavo na maara iana. O Agasia ki râ ki vatugia i ngekana.

⁷God ki bani naka vi o Agasia ki meme, matena i vatugia o Jorama. Matena o Agasia ki oga i ngekana, ngaia mo Jorama karu râ vurusia o Jehu karena o Nimisi, na ani na Araha i bani atea, hanana i nahunahu hagamagahurua na apaparaha iana o Agaba na maneraha.

⁸Matena o Jehu ki nahu hagamagahurua, suria na tamasinga iana God, ngaia ki merahetarahu tani na enoni raha ni Juta ma tani na kariana o Agasia. Ngaira ka takua o Agasia i vatugia o Jorama. O Jehu ki mutera ngaira hato.

⁹Na kariana o Jehu ka garia o Agasia ma ka tarahua i ahi i hinua i Samaria. Ngaira ka torea râ tanga o Jehu ma ka nahuia ki me. Henaka, ma ngaira ka bagia na gahuana, suria ga hagahigasia o virana o Josapata na maneraha, i toto suria maninga na Araha i mêrihana hagenani. Na apaparaha iana o Agasia ki magahuru ngavê ma ki mareha rârâ tani vige maneraha nikâ.

¹⁰Matena ka Atalia kenana na maneraha o Agasia ki rongo, vi o karena ki me, ngaia ki haribona, hanana viga mutera na apaparaha hato iata na maneraha i Juta.

¹¹Ka Jehosebata kesina o Agasia ki êragia o Joiata na mane ni vogasiha. Ka Jehosebata ki hagatahia pinihi o Joasi na hitangita o karena o Agasia. Ngaia ki torea vê tenira o veogana, matena ga sugi nahunahu hunira. Ngaia ki pinihirerua ngaia ma na gete i hagasusua igê na kiboru ni mêruha i ruma ni rotu. Ngaia ki ama ni pinihia nga tenia ka Atalia, i era ma ki nahuia ki meme. Vikana ngaia ki hagatahia.

¹²O Joasi ki oga pinihi i ngekana surigi na harisi ge ono ka Atalia ki geteraha surigi.