Read Kahua 2 SIHONGA 23 Bible Online

2 SIHONGA 23 - Kahua bible

2 SIHONGA 23

¹I murini na harisi ge ono o Joiata na mane ni vogasiha ki takusia, vi ngaia ki na matena iana tanga i akê me igê. Ngaia ma na mane gi rima ga bêngenira na mane ni me, ka harikato. Ngaira ka no Asaria karena o Jerogama, o Isimaele karena o Joganana, o Asaria karena o Obeti, o Maseia karena o Ataia, mo Elisapata karena o Sikiri.

²Ngaira ka râhigi na hinua hato i Juta ma ka meraporo me tanga i Jerusaleme na mane ni hagarahenga ma na bêni hato na hagosi ninuni.

³Ngaira ka râ me haku i ruma ni rotu ma ka suruheri igê henia o Joasi karena na maneraha. O Joiata ki vi tangara, ki vi: “O karena na maneraha i me kani ikê. Ngaia nga kani maneraha manga i bani surua vikana na Araha tanga o Tavite renira na raraha iana.

⁴Nga hanana viga katoa kani ikê. Matena na mane ni vogasiha ma na mane ni hagarahenga ka arâ me tanga na tagaraha iata ni hagarahenga igê na tangiana ni mamaroha, ngaira ka voasira igê na apaneni me gi oru. Ta na apaneni me ki anumasigi nga na maanipara ni ruma ni rotu.

⁵Ta na apaneni me ki anumasia nga na ruma raha iana na maneraha, ma na oruta na apaneni me ki anumasia nga na maanipara na hagêguringa. Na enoni hato ka hakuhaku me nga igê na mahera na ruma ni rotu.

⁶I apu ta na enoni vige banu i ruma ni rotu, se i tagua ma i he nga noga ma na mane ni vogasiha ma na mane ni hagarahenga surigi na tagaraha iata. Ngaira ka girara ga bêbanu igê, suria ga hagapunarira. Ma na enoni ki tuguhira viga arâ surigi na ramata iana na Araha, ma ka gâga ma i metara.

⁷Na mane ni hagarahenga ka ngahisia rihia na maneraha, henigi na tatapa borahu i rimata, ma ka arârâ ngahisia na maneraha i na ara ni agua i arâ igê. Na anima na enoni i obania vi bêbanu i ruma ni rotu, ka page nahuia nga ki meme.”

⁸Na mane ni hagarahenga ma na ai ni Juta ka râ surigi na tamasinga iana o Joiata. Na mane ki asa vige arâ, matena i hatohato na tagaraha iata igê na tangiana ni mamaroha. Vikê na mane ga bêngenira na mane ni me ka têtênganira so ngaira hato, na mane ni me na ani i hato na tagaraha iata ma na ani ga kahu bêbanu me viga tagara.

⁹O Joiata ki tonganira na mane ga bêngenira na mane ni me renigi na ora ma na bêata iana na maneraha o Tavite, ga bani tâtâ i ruma ni rotu.

¹⁰Ngaia ki nakara na me ka ura rihia na maana na ruma ni rotu, hanana ga anumasia na maneraha. Ngaira ka têgi na tatapa borahu i rimata.

¹¹Hemuri o Joiata ki mehura o Joasi, ki naka na tarepuri i bêna ma ki vatea renia na buka na ramata ni arahanga. Vikê ngaira ka kasia ki maneraha. O Joiata na mane ni vogasiha henira o karena ka monea o Joasi. Na enoni hato ka ngerengere, ka vi: “Maneraha ge mêri arihu!”

¹²Ka Atalia ki rongora na enoni ga ngerengere vagevage renia na maneraha. Vikê ngaia ki hatani râ tanga na ruma ni rotu, ga bani haku igê na enoni.

¹³I ngekana ngaia ki bâsia igê na maneraha haoru i ura igê na atohana i maana na ruma ni rotu, manga bani hanana. Na mane ga bêngenira na mane ni me ma na mane ni uhinga ni ahuri ka ura rihia. Na enoni hato ka ngerengere vagevage ma ka uhigi na ahuri, ma na enoni ni kiha i ruma ni rotu henigi na marâ ni tarotaroha ma ni tahutahurunga, ka bêngenira na enoni. Ka Atalia ki tarisigi na tuguni iana, suria i obaera, ma ki ngere, ki vi: “I pe oto vigamu hatungiê! I pe oto vigamu hatungiê!”

¹⁴O Joiata ki pe obania vige nahuia ke meme ka Atalia igê na agua i oga igê na ruma ni rotu. Ngaia ki bonasira na mane ga bêngenira na mane ni me, ki vi: “Mu torea hura i guputa na mane ni anumasiha ga ura harahara, ma kamu nahuia ki meme na anima na enoni i uhungia vi hagatahia.”

¹⁵Ngaira ka ranguia ma ka torea tanga na ruma raha iana na maneraha ma ka nahuia ki me i ngekana hagarangia na maanipara iata na hosi.

¹⁶O Joiata na mane ni vogasiha ki katora o Joasi na maneraha ma na enoni, ka suru henia, vi ngaira ka na kariana na Araha.

¹⁷Hemuri ngaira ka râ tanga na ngêsu iana o Bala na ataro ma ka ruhuruhua. Ngaira ka kumukumugigi na bea ni vogasiha ma na nunuta na ataro igê ma i maani na bea ni vogasiha ngaira ka nahuia ki me o Matane na mane ni vogasiha iana o Bala na ataro.

¹⁸O Joiata ki nakara na mane ni vogasiha ma na mane ni hagarahenga, ka bâsurigi na tagaraha i ruma ni rotu. Ngaira ki tuguhira, viga katogi na tagaraha, i nakagi tangara na maneraha o Tavite, ma ka susu tanga na Araha suria na ramata iana o Moise ma ka torea na kiha.

¹⁹O Joiata ki nakara nikâ na mane ni anumasiha surigi na maani para ni ruma ni rotu, hanana ga hagabarasia na anima na enoni i pe matarotaro suria na ramata igê na rotu, hanana vige bêbanu.

²⁰Na mane ga bêngenira na mane ni me, na meraha ni hinua, na gavumane ma na enoni hato ka takua o Joiata, hanana ga merâ na maneraha tenia na ruma ni rotu tanga na ruma raha iana na maneraha. Ngaira ka banu igê na maani ruma raha ni ruma ma na maneraha ki oga so igê na atohana.

²¹Na enoni hato ka vagevage bâraha ngavê, ma na hinua ki oga suri parongana, henaka ga nahuia ki me ka Atalia.