Read Kahua 2 SIHONGA 25 Bible Online

2 SIHONGA 25 - Kahua bible

2 SIHONGA 25

¹O Amasia ki vora re na maneraha, matena i tangahuru gi rua matare rima na harisi iana. Ngaia ki oga i Jerusaleme ma ki maneraha surigi na harisi tangahuru gi rua matara gi siva. Kenana kani ka Jehoatani ni Jerusaleme.

²Ngaia ki râ suria na tamasinga iana na Araha tanga, ma ki mareha vige komani agana bâkoro.

³Matena i tê gatagata igê na arahanga iana, ngaia ki nahuirerua karu me na gavumane, garu nahuia ki me o vaemana.

⁴Nga noga ma na kareterua ngaia ki pe nahuira ke me, suria ngaia ki râ suria na tamasinga iana na Araha igê na buka na ramata iana o Moise, i vi: “I apu ni nahuhunira na enani kare surigi na bagaparongata na kareta, ma ki apu ni nahuhunira na kare surigi na bagatauhata na enata. Na enoni ka nahuia ki meme surigi ma hete na bagatauhana marena.”

⁵Na maneraha o Amasia ki unihakura na mane hato igê na varo ninuni iaterua hegitigi o Juta mo Benamino, ka vora na mane ni me. Ngaia ki voasira na mane ni me surigi na hagosi ninuni iata hegitigi. Ngaia ki nakara tani na mane ni me ka bêngenira. Tani ka bêngenira na rehagaro na mane ni me, ma tani ka bêngenira na tangarê na mane ni me. Ngaira hato ngegana ka tonga na tangahuru gi rua ma ki akê na harisi iata. Ngaira hato ka vora na 300, 000 na mane ni me. Ngaira ka na mane ni me ramo, ga manisingenigi na ora ma na bêata igê na hearihatana.

⁶Nikâ ngaia ki vatevatera na 100, 000 na mane ni me ni Isiraele renigi na 300, 000 na maani na siliva.

⁷Ma ta na poropete ki râ i pasina na maneraha ma ki vi tanga, ki vi: “Siana ko merarâ na mane ni me ni Isiraele ngegê, suria na Araha ki pe pane henira na me ni Isiraele.

⁸Igo ko takusia vari, vi igo ko ramoramo igê na hearihatana suria vi ngaira, ma God hete kani nahuni ramoha, hanana i katora na mane ni me ka teharira na merongata, se ga soso renira. Ma ngaia ki page katora na merongamu ka teharigo.”

⁹O Amasia ki hagatea na poropete, ki vi: “Ma ka henakagi na haga raha gê bani vatevatera renigi?” Na poropete ki arami, ki vi: “Na Araha ki girara i vatego aporo na haga raha i teharia ngekana.”

¹⁰Vikê o Amasia ki hagatorangenira aporo i pasita na mane ni me i vatevatera. Ngaira ka aporo i pasita ma ka mangariaga ngavê tangara na ai ni Juta.

¹¹O Amasia ki hagaramoramo ki bêngenira na mane ni me iana tanga na maruguna Marasiga. I ngekana ngaira ka nahuira igê na 10, 000 ka me,

¹²ma ka henahuraura nikâ na 10, 000. Ngaira ka meratagere i hinua i Sela igê na botena, ma ka kasira vato igê na tarihu, hanana ga meme igê na hê kere vato.

¹³Igê nga matena ngekana na mane ni me ni Isiraele, o Amasia i bani hagatorangenira aporo i pasita, ngaira ka taharigi na hinua i Juta, i berarogaterua i Samaria me Betegorone. Ngaira ka nahuira ka me na rehagaro gi oru na mane ma ka rurugugi rako ngavê na marâ.

¹⁴I murina i teharira hato na me ni Etome, o Amasia ki migiaporo na nunuta na ataro iata na ai ni Etome. Ngaia ki hagêrasigi, ki rahesigi ma ka susu tangagi renigi na marâ i sigini koro.

¹⁵Na tarana ngekana ki hagamangaria ngavê na Araha. Vikê ngaia ki hagatorangenia ta na poropete tanga o Amasia. Na poropete ki hagatea, ki vi: “Tanu hega kanigo hagarapera na ataro iata na ai ni Etome? Bâ, na ataro ngegana ka pe girara, vige hagatahira na kariata mareta tenia na raramohamu!”

¹⁶Matena na poropete ki mamênga vige tamasi hato, ma o Amasia ki araramia, ki vi: “I keta kanigami kasigo ko mane ni hagaotonga tanga na maneraha? Gu muni ma kê haribona ka nahuigo ko me!” Na poropete ki muni so i murina i tamasi, ki vi: “Hoi, gê kahu girara, vi God ki bani kato, hanana vi hagamagahurugo, suria go kato vikana ma ko pe tê viteaku.”

¹⁷Na maneraha o Amasia ma na mane ni hagaotonga iana ka harikato renia i Isiraele. Ngaia ki kasi tamasinga tanga o Joasi na maneraha i Isiraele. Ngaia ka no karena o Joagasi, ma o virana ka no Jehu. O Amasia ki nungia o Joasi, ki vi: “Garu heariha. Igo ko pe arariê!”

¹⁸O Joasi ki barua aporo na tamasinga iana o Amasia, ki vi: “I ta na matena na tone i hungana i Libanone ki kasi tamasinga tanga na apinige raha i bagora, ki vi: ‘Gu hagauragingenia ka karemu henia o kareku.’ Na marâ vasiga ki ri igê na tone ma ki puria.

¹⁹Hoi o Amasia, igo ko parunigo ngavê, suria go teharira na me ni Etome. Ma inê kê vi tangago, gu oga tonge i pasimu. Tanu hega kanigo hagaratemi igo ma na kariamu, ka tarahugamu na bagabevoani?”

²⁰Ma o Amasia ki pe tê ringena. God ki bani naka tanga o Amasia, hanana i soso igê na hearihatana, suria ngaia ki hagarapera na ataro ni Etome.

²¹Vikê o Joasi na maneraha i Isiraele ki râ ki meheariha o Amasia na maneraha i Juta. Ngaira ka heariha i Betesemesi i Juta.

²²Na mane ni me ni Juta ka so igê na hearihatana ma ka gava tanga i pasita.

²³O Joasi ki henahuraua o Amasia ma ki merâ tanga i Jerusaleme. I ngekana ngaia ki hogea igê na para ni hinua, haganega tenia na maani para Eparaimi ki tariha igê na maani para Ariruguna. Na berarogaterua ki vora na 200 mita.

²⁴Ngaia ki toregi na siliva ma na golo hato i ruma ni rotu henigi na marâ tanga na hagarahenga, ga bâsurigi na apaparaha iana o Obeti Etome, henigi na ruruguha i ruma raha iana na maneraha. Ngaia ki migiaporo i Samaria. Ngaia ki mera aporo nikâ na enoni, hanana vi ngahingahi renira.

²⁵O Amasia na maneraha i Juta ki me igê na tangahuruta matare rima na harisi i murina i bani me o Joasi na maneraha i Isiraele.

²⁶Na tauhana getigi o Amasia, haganega tenia na matena i maneraha mataro me ki me, ka bani segegi so igê na buka na sihonga renira na maneraha i Juta me Isiraele.

²⁷Haganega tenia na matena i murisigea na Araha, tani na me i Jerusaleme ka harikato tare renia. Ki rârâ ma ngaia ki gava tanga na hinua i Lakisi. Ma na merongana ka râ suria ma ka nahuia ki me i ngekana.

²⁸Na gahuana ka hagarutangia igê na hosi tanga i Jerusaleme ma ka bagia igê na matahuta na maneraha i hinua iana o Tavite.