Read Kahua 2 SIHONGA 26 Bible Online

2 SIHONGA 26 - Kahua bible

2 SIHONGA 26

¹Na enoni hato i Juta ka atea o Usia ki maneraha urusia o Amasia o vaemana. O Usia ki tonga na tangahuru matare ono na harisi iana.

²I murina i me o Amasia, o Usia ki henahuraua aporo ma ki tagarahia aporo na hinua i Elate.

³O Usia ki vora re na maneraha, matena i tangahuru matare ono na harisi iana. Ngaia ki oga i Jerusaleme ma ki maneraha surigi na harisi tangahuru gi rima matarerua. Kenana kani ka Jekolia na gete ni Jerusaleme.

⁴O Usia ki hagakoro obana na Araha manga o vaemana.

⁵Matena i tahitahi mênga o Sekaria, o Usia ki toto suria maninga na Araha, suria o Sekaria ki hagatakusia tare renia God. Ma God ki koro tanga o Usia.

⁶O Usia ki râ ki meraheariha na Pilisitina. Ngaia ki hogegi na para ni hinua i Gata, i Jabene ma i Asetote. Ngaia ki tagarahigi na hinua hagarangia i Asetote ma suria i Pilisitia hagenani ma ki pararihigi.

⁷God ki tamania ki teharira na Pilisitina ma na me ni Arabia, ga oga i Gurubala, ma na Meunita.

⁸Na enoni ni Amone ka vuri takesi tanga. Ngaia ki raramohaga ngavê ma na atana ki rongo raha, ki râ ki tariha nikâ i Esipito.

⁹O Usia ki hagagatagatanigi ngavê nikâ na para ni hinua i Jerusaleme, suria i tagarahigi na bebetehe igê na maani para Ariruguna, igê na maani para Maruguna ma igê na sukuna na para.

¹⁰Ngaia ki tagarahigi nikâ na bebetehe nganganihaga igê na bagamasusu raha, ma ki oparigi rako va vekaru suria i nahunira rako na togoha igê na bena i Sefala ma igê na bobohanegani. Suria ngaia ki na mane ni tagaraha i mu, tahema ngaia ki kanukanura na enoni ka hasigi na pariki ni vaini igê na bobohanegani ma ka tagara igê na mako i ango.

¹¹Ngaia ki nahunira nanê rako era na mane ni me, ga manisingenia na hearihatana. Na mane segesege o Jeiele mo Maseia karu voasira igê na apaneni me hegitigi ma karu segegi so. Na bêta na mane hato ga bêngenira na mane ni me iana na maneraha, ka no Ganania.

¹²Na mane ga bêngenira na mane ni me ka vora na 2,600.

¹³I ruguhata ka goga na 307,500 na mane ni me ramo, ga manisingenia na hearihata, hanana ga meraheariha na merongana na maneraha.

¹⁴O Usia ki haganahunira na mane ni me renigi na bêata ma na ora, na hati na kapa, na kapa pusigi na matota, na epage ma na mage, ma na hêsigogo henigi na hê.

¹⁵Surigi na bebetehe ma surigi na ariruguni na para ni hinua i Jerusaleme ngaia ki nakagi igê na tangaruha, ga tora getigi. Tani ka girara ga hanatenigi na mage raha ma tani ka girara ga arihatenigi na hê raha. Na atana ki rongo raha, ki râ hagatê era. Ngaia ki kahu raramohaga ngavê, suria God ki tamania.

¹⁶Hoi, matena na maneraha o Usia ki ramo ngavê, ngaia ki haganega ki paro. Vikana ngaia ki hagaratena marena. Ngaia ki aharê igê na ramata iana na Araha God iana, suria i banu i ruma ni rotu ma ki sungia na marâ i sigini koro igê na bea ni sungiha.

¹⁷O Asaria na mane ni vogasiha henira na tamana tangahuru ge varu ga ramoramo ma ka pe magu, ngaira ka râ suria na maneraha

¹⁸hanana ga urapusia. Ngaira ka vi: “Se Usia! Igo ki pe oto tangago, vigu sungia na marâ i sigini koro tanga na Araha, nga noga ma na mane ni vogasiha, na raraha iana o Aroni ga bani hagapunarira tanga vikana. Hura tenia na agua apuna ikê! Igo ko aharêngia na ramata iana na Araha God. Igo ko hagaratemu maremu.”

¹⁹O Usia ki ura i ngekana i ruma ni rotu hagarangia na bea ni sungiha ma ki têa na apira ni sungiha. Ngaia ki mangariaga tangara na mane ni vogasiha, ma ki parama na asiahu ma ki oga i raena.

²⁰O Asaria ma na tamana ka bâsia na raena i asiahu ma ka magu. Ngaira ka tarigenia hura tenia na ruma ni rotu. Ngaia ki hatani gaha hura, suria na Araha ki hagaitangia.

²¹Na asiahu ki têa rârâ na maneraha o Usia mataro me ki me. Suria i maeha vikana, tahema ki apu tanga vige banu i ruma ni rotu. Ngaia ki oga so ma getea igê na kere ruma. Ngaia ki maneraha mênga, ma o Jotama o karena kani têgi na tagaraha iana o vaemana.

²²Na poropete o Isaia karena o Amose ki segegi so na tauhana getigi o Usia, matena i maneraha.

²³O Usia ki me ma ka bagia igê na anoanota na maneraha, ma ki mareha vi igê na matahuta na maneraha, suria i asiahu. O Jotama o karena ki maneraha urusia.