Read Kahua 2 SIHONGA 28 Bible Online

2 SIHONGA 28 - Kahua bible

2 SIHONGA 28

¹O Agasa ki vora re na maneraha, matena i tonga na harisi tangahuru gi rua. Ngaia ki oga i Jerusaleme ma ki maneraha surigi na harisi tangahuru matare ono. Ngaia ki pe amaka suria na tauhana koro na maneraha o Tavite na êvarina. Ngaia ki hagaera obana na Araha.

²Ngaia ki amake surigi ma na bagatauhata na maneraha i Isiraele. Ngaia ki tagarahigi na nununa o Bala na ataro renigi na aiani.

³Ngaia ki susu tanga renigi na marâ i sigini koro igê na maruguna i Hinome. Henaka vi o karena marena, ma ngaia ki susu renira tangara na ataro. Vikana ngaia ki amake surigi na tauhata erataga na enoni, na Araha i bani tarigenira hura tenia na agua, matena na Isiraelita ka sugarira.

⁴Surigi na agua ni vogasiha ni ataro igê na hungani ma i ruguhani na apinige ga arubebe o Agasa ki vogasi ma ki sungigi igê na marâ i sigini koro.

⁵Suria na maneraha o Agasa ki tasi, tahena na Araha God iana ki katoa na maneraha i Siria ki teharia ma ki henahuraura rako era na ai ni Juta tanga i Tamasiko. Na Araha ki katoa nikâ o Pekaga na maneraha i Isiraele karena o Remaliahu ki teharia o Agasa.

⁶O Pekaga ki nahuira ka me na 120, 000 na mane ni me ramo ni Juta igê na tangiana gi tage. Na Araha God iata na êvarita ki kato vikana, suria na ai ni Juta ka murisigea.

⁷O Sikiri na mane ni me ni Isiraele ki nahuira ka me o Maseia karena na maneraha o Agasa, o Asirikama i bâsurira na enoni tagara i ruma raha iana na maneraha, ma o Elekana na ruata iana na maneraha.

⁸Henaka vi na ai ni Juta ka na goana, ma na mane ni me ni Isiraele ka henahuraura na 200, 000 na gete ma na kare ma ka meraaporo i Samaria henigi rako na marâ ga rurugugi.

⁹I hinua i Samaria ki oga igê ta na poropete iana na Araha, o Otete na atana. Ngaia ki râ vurusira na mane ni me ni Isiraele, matena ga aporo henira na ai ni Juta ga henahuraura. Matena ngaira ka banu noga i hinua, na poropete ki vi: “Suria na Araha God iata na êvarimi ki mangariaga tanga i Juta, tahema ngaia ki katogamu kamu teharia. Ma na tarana na nahunga mu nahuira igê ki erataga i maana God.

¹⁰Ma i ngekê igamu kamu obanira na mane ma na gete ni Jerusaleme ma ni Juta viga voravora re na kare rakuraku iami. Mu pegirara vari, vi igamu kamu pe tê viteana nogami na Araha God iami?

¹¹Mu karingê. Na enoni mu henahuraura ngegana ka na goami. Nakara vê ke râ. Manga i mareha na Araha ki page hagaitangigamu igê na mangariaganiha iana.”

¹²Na vere he na enoni raha tenia na varo ninuni iana o Eparaimi ka urapusigi nogata na tauhata na mane ni me. Ngaira ka no Asaria karena o Joganana, o Berekia karena o Mesilemote, o Jegisikia karena o Salume, ma o Amasa karena o Gatalai.

¹³Ngaira ka vi: “Siana kamu merarâ me ikê na enoni mu henahuraura! Igia ka bani guguruga tanga na Araha ma ka bani hagamangaria, ki uhu noga vige hagaitangigia. Na katoha iami ki katogia ka kahu tasitasi nga ma ka kahu erataga ngavê i maana God.”

¹⁴Vikana na mane ni me ka tagarenira na enoni ga henahuraura henigi na marâ ga rurugugi tangara na enoni raha ma na kariata.

¹⁵Na vere he na mane ngegana ka haganega ka vutungira na enoni rakuraku ga rupaturi renigi na gahu tenigi na marâ ga rurugugi. Ngaira ka vatera renigi na gahu, na santere, na ngêra ma na tonoha, ma ka monegi na maara iata renigi na oile ni olive. Na ani ga hagêrahu ni râha, na Isiraelita ka hagarutangira igê na gerita na tonki. Ngaira ka torera aporo na enoni hato ga henahuraura tanga i Jeriko na hinua ni ni, hagarangia na apanena i Juta. Hemuri na Isiraelita ka aporo i pasita i Samaria.

¹⁶Na ai ni Etome ka haganega nikâ ka taharia i Juta. Ngaira ka henahuraura rako na enoni. Vikê na maneraha o Agasa ki avarasia o Tigilata Pelisere na maneraha ni Asiria, hanana vi tamania.

¹⁸Igê nga na matena ngekana na Pilisitina ka sugarigi na hinua igê na bobohanegani kereso ma i Negeve i Juta. Ngaira ka henahuraugi na hinua raha i Betesemesi, i Aialone, i Geterote, i Soko, i Timina me Gemiso henigi na kere hinua hagarangigi. Ngaira ka parênigi ma ka oga hagahu igê.

¹⁹Suria o Agasa na maneraha i Juta ki hagamamasiagara na kariana ma ki guguruga tanga na Araha, tahema na Araha ki katoa i Juta ki vato.

²⁰Na maneraha i Asiria ki pe tamania rârâ hete o Agasa ma ki merongasia ma ki katogi ma na bagabevoani ka kahu aharêsia ngavê.

²¹Vikê o Agasa ki tavogi na golo tenigi na ruma ni rotu, na ruma raha iana ma na ruma iata na enoni raha ma ki tagarenigi tanga na maneraha i Asiria. Henaka ma ki tagenena ma.

²²Matena na bagabevoani ka ama ni akê me nga, ngaia ki ama ni guguruga nga tanga na Araha.

²³Ngaia ki vogasira na ataro iata na ai ni Siria ga teharia. Ngaia ki tako, ki vi: “Na ataro iata na ai ni Siria ka tamanira na maneraha i Siria. Manga vi inê ma kê vogasira, vari ngaira ka page tamaniê nogaku.” Na tarana ngekana ngaia ki hagarateta ngaia ma na ai ni Juta.

²⁴Nikâ ngaia ki toregi hura tenia na ruma ni rotu na marâ hato tanga na hagarahenga ki botagigi ma ki barubarugigi. Ngaia ki purusia na ruma ni rotu, ma ki hagêrasigi na bea ni vogasiha surigi na ara ni matangani na tara i Jerusaleme.

²⁵Surigi na ara ni hinua i Juta, na ani raha ma na ani sisite, ngaia ki tagarahigi igê na ngêsu tanga na vogasiha ni ataro, hanana ga susu igê tangara na ataro renigi na marâ i sigini koro. Vikana ngaia ki hagaratena marena, vi na Araha God iata na êvarina ki mangariaga ngavê tanga.

²⁶Na marâ hato getigi ga akê me igê na matena i maneraha, ka bani segegi so igê na buka na sihonga renira na maneraha i Juta me Isiraele.

²⁷Na maneraha o Agasa ki me ma ka bagia i Jerusaleme, mareha vi igê na matahuta na maneraha. O Hisikia o karena ki maneraha urusia.