Read Kahua 2 SIHONGA 29 Bible Online

2 SIHONGA 29 - Kahua bible

2 SIHONGA 29

¹O Hisikia ki vora re na maneraha, matena i tangahuru gi rua matare rima na harisi iana. Ngaia ki oga i Jerusaleme ma ki maneraha surigi na harisi tangahuru gi rua matara gi siva. Kenana kani ka Abia ka karena o Sekaria.

²Ngaia ki hagakoro obana God, suria i amaka suria na maneraha o Tavite na êvarina.

³Na hageha hagenago igê na harisi i murina o Hisikia i maneraha, ngaia ki tangahigi aporo na maani para tanga na ruma ni rotu ma ki tagarahigi aporo.

⁴Ngaia ki hagahakura me tani na mane ni vogasiha ma tani na mane ni hagarahenga igê na mahera bêkê na ruma ni rotu.

⁵Ngaia ki tamasi tangara i ngekana, ki vi: “Igamu na mane ni hagarahenga, mu hagapunarigamu maremi ma kamu maningaia na ruma ni rotu iana na Araha God iata na êvarimi. Mu hagarurugu hura tenia na ruma ni rotu na ara ni marâ ga hagaerasia.

⁶Na êvarika ka hagaera obana na Araha God iaka, suria ga pe toto suria. Ngaira ka rumakaka renia ma ka murisigea na agua i oga igê.

⁷Ngaira ka purusigi na maani ruma na ruma ni rotu, ka pe tigi na laiti ma ka hagêrahu vige sungigi na marâ i sigini koro, se vige susu igê na ruma ni rotu iana God iata na Isiraelita.

⁸Vikana na Araha ki mangariaga tangarerua i Juta me Jerusaleme. Na hagaitangiha i vatera renia, ki hagagasuganira ma ki hagamagusira na ara ni enoni hato. Igamu kamu bani girara bâkoro na tarana ngekê.

⁹Ngaira ka nahuira ka me na vaemaka ige na hearihatana ma ka henahuraura na gete iata ma na kareta.

¹⁰Tahema inê kê bani kato, viga arâ suria nikâ na suruheri iaka henia na Araha God iata na Isiraelita, hanana i soso na mangariaganiha iana tangagia.

¹¹Kariaku, siana kamu hagarihu. Igamu nga ka na ani na Araha i bani ategamu, hanana vigamu sungigi na marâ i sigini koro tanga ma kamu torera na enoni igê na hagarahenga tanga.

¹²Na mane ni hagarahenga ngegana kani igê: Tenia na apaparaha iana o Kehata, ngairerua ka no Magata karena o Amasai mo Joele karena o Asaria. Tenia na apaparaha iana o Merari, ngairerua ka no Kisa karena o Abeti mo Asaria karena o Jehalele. Tenia na apaparaha iana o Geresone ngairerua ka no Joaga karena o Simina ma o Etene karena o Joaga. Tenia na apaparaha iana o Elisapana ngairerua ka no Simiri mo Jeiele. Tenia na apaparaha iana o Asapa ngairerua ka no Sekaria ma o Matania.

¹⁴Tenia na apaparaha iana o Hemane ngairerua ka no Jegiele mo Simi. Tenia na apaparaha iana o Jetutune o Semaia mo Usiele.

¹⁵Na mane ni hagarahenga ngegê ka hagahakura me na tamata ma ngaira hato tagenata ka hagamatarotarora mareta surigi na ramata igê na rotu. Hemuri ngaira ka râ suria na tamasinga iana na maneraha tangara ma ka maningaia na ruma ni rotu surigi na ramata iana na Araha.

¹⁶Na mane ni vogasiha ka banu i ruma ni rotu ma ka maningaia, ma ka hagarurugu hura igê na mahera na ruma ni rotu na ara ni marâ ga hagaerasia na ruma ni rotu. Tenia i ngekana na mane ni hagarahenga ka toregi hura pania na hinua tanga na maruguna i Kiterone.

¹⁷Ngaira ka haganega ka tagara igê na tangiana hagenago igê na hageha hagenago, ma na maningaiha henia nikâ na parema ki hato igê na varuta na tangiana. Ma hemuri ki torera akê nikâ na tangiani ge varu, ka hagarêa igê na ruma ni rotu tanga na hagarahenga. Igê na tangahuruta matare ono na tangiana igê na hageha ki hato na ara ni marâ.

¹⁸Ma hemuri na mane ni hagarahenga ka hagarongoa na maneraha o Hisikia, ka vi: “Igami kami bani hatungia na maningaiana na ruma ni rotu hagenani henigi na bea ga susu igê ma na bea tange na bereti apuna ma na ara ni marâ hato ni hagarahenga.

¹⁹Nikâ igami kami bani toregi me aporo na ara ni marâ ni hagarahenga na maneraha o Agasa i bani toregi vê surigi na harisi i pe toto suria igê God. Igami kami hagapunarigi aporo. Ngaigi hato ki tâ i maana na bea ni vogasiha iana na Araha.”

²⁰Na maneraha o Hisikia ki hagahakura ototo râ nga na meraha ni hinua, ma ngaira ka râ haku tanga na ruma ni rotu.

²¹Ngaira ka torera na puruka mane gi pi, na sipi gi pi ma na kareta na sipi gi pi ma na goti gi pi tanga na vogasiha ni bonoteniha ni tasi: na tasi iata na maneraha ma na ahemata iana, ma na tasi iata na ai ni Juta, ma tanga na vogasiha ni hagamatarotaroana aporo na ruma ni rotu. Na maneraha ki bonasira na mane ni vogasiha, na raraha iana o Arone, hanana ga vogasi renira igê na bea ni vogasiha.

²²Na mane ni vogasiha ka nahuira hagenago na puruka mane, ma hemuri na sipi, ma hemuri na kareta na sipi. Ngaira ka toregi na gaputa na ara ni ganiani tanga na vogasiha ma ka kamusia na bea ni vogasiha renigi.

²³Hagemuri ngaira ka torera na goti tangara na maneraha ma na enoni ga rotu, hanana ga têbuhira.

²⁴Hemuri na mane ni vogasiha ka nahuira na goti ma ka karangigi na gaputa igê na bea ni vogasiha tanga na vogasiha ni bonoteniha ni tasi: na tasi iata na enoni hato, suria na maneraha ki bani haribona ka susu ma ka vogasi tanga na bonoteniha ni tasi iata na Isiraelita hato.

²⁵Na maneraha ki râ surigi na tamasinga iana na Araha tanga na maneraha o Tavite, matena i tamasi tanga i haraterua o Gata na poropete iana na maneraha ma na poropete o Natane. Ngaia ki nakara na mane ni hagarahenga i ruma ni rotu henigi na marâ ni tahutahurunga ma ni tarotaroha,

²⁶mangagi na ani i nahunigi o Tavite na maneraha. Na mane ni vogasiha ka migiura nikâ i ngekana henigi na ahuri.

²⁷O Hisikia ki haribona, ka toregi me na ganiani tanga ga susu renigi. Matena na mane ni vogasiha ka haganega ka susu, na enoni ka ki ka hagarahasia na Araha, ma na mane ga têgi na ahuri ma na marâ ni tahutahurunga ma ni tarotaroha ka haganega ka tahutahurugi, ka tarotarogigi ma ka uhigi na ahuri.

²⁸Ma ngaira hato ga oga i ngekana, ka rahesia na Araha. Na kiha ma na ahuri ka akê me rârâ, mataro me ki hato na susuana ni ganiani.

²⁹Hemuri na maneraha o Hisikia ma na enoni hato ka susure ma ka rahesia God.

³⁰Na maneraha ma na meraha i pasita na enoni ka vi tangara na mane ni hagarahenga, ka hagarahasia na Araha igê na ki, garu bani segegi o Tavite ma o Asapa na poropete. Ngaira hato ka ki vagevage, matena ga susure ma ka rahesia God.

³¹O Hisikia ki tamasi tangara na enoni, ki vi: “Hoi, suria igamu kamu bani hagapunarigamu maremi aporo, na anima na hitangimi i obania, ngaia ki girara i torea me na ganiani tanga na vogasiha, hanana i visia koro na Araha.” Ngaira ka tê vita. Tani na hitangita surigi obaniha iata mareta, ngaira ka migirâ me na ganiani tanga ga susu renigi.

³²Ngaira ka torera me na 70 na puruka mane, na 100 na sipi ma na 200 na kareta na sipi tanga ga susu renira tanga na Araha.

³³Ngaira ka torera me nikâ na 600 na puruka mane ma na 3000 na sipi tanga na vogasiha ni ngê haku.

³⁴Suria na mane ni vogasiha ka pe rako hanana vige nahuira hato na ganiani ngegana, tahema na mane ni hagarahenga ka tamanira mataro me ki hato na tagaraha. I murina i hato na tagaraha, tani nikâ na mane ni vogasiha ka kahu matarotaro aporo tanga na hagarahenga. Na mane ni hagarahenga ka râ surigi maninga na ramata tanga na hagamatarotaroana teharira na mane ni vogasiha.

³⁵Na mane ni vogasiha ki tuguhira viga susu renira na ganiani hagenani ma nikâ renigi na êbeta na ganiani tanga na vogasiha ni ngê haku, ma nikâ renigi na vaini ga karangigi, matena ga susu. Vikana ki kahu haganega aporo na hagarahenga i ruma ni rotu.

³⁶Na maneraha o Hisikia ma na enoni ka vagevage, suria God ki tamanira ka hatani hatungigi rêrê na marâ hato ngegana.