Read Kahua 2 SIHONGA 3 Bible Online

2 SIHONGA 3 - Kahua bible

2 SIHONGA 3

¹O Salomo ki haganega na tagarahiana na ruma ni rotu tanga na Araha igê na hungana i Moria i Jerusaleme. Ngaia ka na agua, na Araha i vora me igê tanga o Tavite. O Tavite ki vuria na agua ngekana tenia o Oronane na Jebusita, i hata igê na koni. Na maneraha o Salomo ki haganega na tagarahiana na ruma ni rotu,

²igê na ruata na hageha igê na heta na harisi i maneraha surigi.

³Na ruma ni rotu, i tagarahia na maneraha o Salomo, ki 30 mita na borahusigana ma ki 10 mita na aberaberagana.

⁴Na aberaberagana na kiboru hura me na ruma ni rotu ki tagenana ma henia na aberaberagana na ruma ni rotu, i 10 mita bê tagere ki 60 mita. Ngaia ki abagi na apê i rarona renia na golo taranina.

⁵Ngaira ka abagi na apê i rarona na apena na ruma ni rotu renigi na bahitani na hata ma ka abagi na bahitani renia na golo taranina, ga oga igê na nununi na ni ma na seni.

⁶Na maneraha ki haribona ka hagamahea na ruma ni rotu renigi na hê bâkoro era, ga raha na meni ma renia na golo i râ me tenia i Paravaimi.

⁷Ngaira ka aba na apena hagenani na ruma ni rotu renia na golo: na apê, na gato, na maani ruma henigi na purupuruni. Igê na apê ngaira ka karugi igê na nunuta na angero.

⁸Na kiboru i murina banu, ga visia vi na kiboru apuna teha ngavê, ki 10 mita na borahusigana ma ki 10 mita na aberaberagana, manga na aberaberagana na apena na ruma ni rotu. Ngaira ka abagi na apê na kiboru apuna teha ngavê renia na golo: na 18,000 kilo na golo.

⁹Na golo i tagarahigi na nila renia ki na apapana na kilo. Ngaira ka abagi nikâ na apê na kiboru i haha renia na golo.

¹⁰Na maneraha ki haribona, ka nakarerua na nunuterua na angero gi rua i rarona na kiboru apuna teha ngavê. Ga tagarahirerua renia na kapa higa ma ka taruhirerua renia na golo.

¹¹Ngairerua karu ura harahara karu maatia na maana na kiboru. Na ara ni hitangiterua ki tonga renirerua na gagahana. Na ara ni hitangini na gagahaterua i beraro karu puru haku na taretareni i gupuna na kiboru, ma na gagahaterua i akerenaheri karu puru râ igê na apê. Tenia na apê tanga i ta apanena ki 10 mita na borahusigani.

¹⁴Ngaira ka tagarahia nikâ na gahu tanga i kuku pusia na maana na kiboru apuna ngavê renia na gahu siki ma na ani ga maravarava, rotorotoaga memera ma ka memera, ga hagabângenigi na nunuta na angero igê.

¹⁵Na maneraha ki haribona ka tagarahirerua na u gi rua ma ka hagêrasirerua i maana na ruma ni rotu. Na borahusigana na ara ni hitangiterua ki 17 mita ma na 50 sentimita ma na borona i haha na ara ni hitangiterua na u ki 2 mita ma na 50 sentimita.

¹⁶Ngaira ka hagamahererua na boroterua hegitigi renigi na sigani na kapa higa ga hêrigi ka bâ mangagi na seni ma renigi na 100 na marâ buburi igê.

¹⁷Ngaira ka hagêrasirerua na u ngegana i avorana i na akerenaheri na maani ruma na ruma ni rotu: tani i mahana ma tani i otona. Na ani i otona ka hêtana vi Jakini ma na ani i mahana ka hêtana vi Boasi.