Read Kahua 2 SIHONGA 30 Bible Online

2 SIHONGA 30 - Kahua bible

2 SIHONGA 30

¹I bara tangara na enoni, vige hagarahasia na tangiana raha na paseka igê nga na tangiana tanga igê na hageha hagenago, suria ga pe rako na mane ni vogasiha, na ani ga matarotaro, ma suria ga pe rako na enoni ga haku me i Jerusaleme. Vikê na maneraha o Hisikia, na gavumane iana ma na ai ni Jerusaleme ka heaganari, hanana viga hagarahasia na tangiana na paseka igê na ruata na hageha. Na maneraha ki kasi tamasinga tangara na enoni hato i Isiraele me Juta. Ma tangarerua na varo ninuni iaterua hegitigi o Eparaimi mo Manase ngaia ki sege leta tangara, ki unira hanana viga arâ me tanga na ruma ni rotu i Jerusaleme ma ka hagarahasia igê na tangiana raha na paseka, hanana ga hagahigasia na Araha God iata na Isiraelita.

⁴Na maneraha ma na enoni ka ageagesia na katoha iata.

⁵Vikê ngaira ka unira me na Isiraelita hato, haganega tenia i Tane i ta bogona rârâ ma ki tariha i Bereseba i Negeve, hanana ga arâ me i Jerusaleme tanga ga hagarahasia igê na tangiana raha na paseka suria na ramata. Ngaira ka obania vi na enoni ka arâ me ka rakorako teha ngavê teharia i nago.

⁶Na maneraha ma na gavumane iana ka hagatorangenira na mane tora tamasinga ka râ surirerua hagenani i Juta me Isiraele. Ngaira ka tamasi urusia na maneraha, i vi vikê: “Ai ni Isiraele, igamu kamu bani tahi tenia na raramohata na maneraha ni Asiria. Hoi, mu aharia aporo na Araha God iata o Abarahamo, o Isako mo Jakobo, ma ngaia ki page aharigamu.

⁷Siana kamu usurira na êvarimi ma na tamami na Isiraelita ga pe toto suria na Araha God iata. Mu bani girara, vi God ki bani hagaitangira ngavê.

⁸Siana kamu guguruga mangara ngaira, ma kamu têtê viteana hete na Araha. Mu râ me tanga na ruma ni rotu i Jerusaleme, na Araha God iami i bani hagapunaria hagahu tanga marena ma kamu rahesia igê, hanana i hatohato na mangariaganiha iana tangagamu.

⁹Manga mu aharia aporo na Araha, hoi, na ani ga bani henahuraura na goami, ka page takira ma ka page nakara vê ka aporo i pasita. Na Araha God iami ki koro ma ki aharêsia na hetakiha. Manga mu aharia aporo, ngaia ki page aganarigamu.”

¹⁰Na mane tora tamasinga ka râ surigi na hinua hato i na apaneni iata na raraha iaterua hegitigi o Eparaimi mo Manase, ki râ ki tariha i na apanena iata na raraha iana o Sebuluni. Ma na enoni ka rurusira ma ka meramarabe.

¹¹Henaka, ma tani tenigi na raraha iata hegitigi o Asere, o Manase mo Sebuluni, ngaira ka agana ka râ me tanga i Jerusaleme.

¹²Nikâ God ki tagara i berarogata na ai ni Juta ma ki katora ka obahaku, hanana ga togeaga ka tê viteana ma ka arâ surigi na tamasinga iata na maneraha ma na gavumane iana.

¹³Na ruruha raha ninuni ka haku me i Jerusaleme igê na ruata na hageha, hanana ga hagarahasia na tangiana raha na bereti i peahunga.

¹⁴Ngaira ka toregi vê hato na bea ni vogasiha i Jerusaleme tanga ga vogasi ma ka susu igê tangara na ataro, ma ka kasigi igê na maruguna i Kiterone.

¹⁵Igê na tangahuruta matare he na tangiana igê na hageha ngaira ka nahuira na kareta na sipi tanga na vogasiha ni paseka. Na mane ni vogasiha ma na mane ni hagarahenga ga pe matarotaro tanga na hagarahenga ngaira ka maki ngavê. Vikê ngaira ka hagapunarira mareta tanga na Araha, hanana ga girara ga susu i ruma ni rotu.

¹⁶Ngaira ka oga igê na atohata i ruma ni rotu surigi na tamasinga igê na buka na ramata iana o Moise na kariana God. Na mane ni hagarahenga ka tagarenigi na gaputa na ganiani ni vogasiha tangara na mane ni vogasiha, ka kamusia na bea ni vogasiha renigi.

¹⁷Suria rako na enoni ka pe matarotaro, hanana vige nahuira na kareta na sipi ni paseka, tahema na mane ni hagarahenga ka nahuira ngaira ma ka hagapunarira na kareta na sipi tanga na Araha.

¹⁸Nikâ rako tenigi na raraha iata hehegitigi o Eparaimi, o Manase, o Isakare mo Sebuluni ka pe matarotaro, hanana vige ngaua na sipi na paseka. Henaka i apu tangara, ma ngaira ka ngêa. Na maneraha o Hisikia ki nungia God vikê tangara:

¹⁹“Araha God iata na êvarimami, suria igo ko koro teha ngavê, gu bonotenigi na tasi iata na ani ga rahesigo i mêrihata hagenani, henaka ngaira ka pe matarotaro.”

²⁰Na Araha ki aganaria na nunginungiha iana o Hisikia. Ngaia ki bonotenigi na tasi iata na enoni ma ki pe hagaitangira.

²¹Surigi na tangiani gi pi na enoni ga oga haku i Jerusaleme ka vagevage ka hagarahasia na tangiana raha na bereti i peahunga, ma i na ara ni tangiani na mane ni hagarahenga ma na mane ni vogasiha ka visia raha na Araha i mêrihata hagenani.

²²O Hisikia ki visira raha, suria ga torea bâkoro ngavê na hagarahenga tanga na Araha. Matena ga vogasia ma ka hagarahasia hato na Araha iata na êvarita surigi na tangiani gi pi,

²³ngaira ka vi, viga hagarahasia kê nikâ surigi na tangiani gi pi. Vikê ngaira ka vagevage ma ka hagarahasia.

²⁴Na maneraha o Hisikia ki mahatangenira na 1000 na puruka mane ma na 7000 na sipi tangara na enoni ka nahuira ma ka ngêra. Ma na mane igê na gavumane iana ngaira ka mahatangenira na 1000 na puruka mane ma na 10,000 na sipi. Rako teha ngavê na mane ni vogasiha ka hagamatarotarora mareta.

²⁵Vikê ngaira hato ka vagevage: na ai ni Juta, na mane ni vogasiha, na mane ni hagarahenga, ma nikâ na enoni ga râ me tenia i Isiraele, ma na ai ni mahuara ga ahi noga i Isiraele me Juta.

²⁶Na vagevageha raha ki aharêsia i Jerusaleme, suria i pe manga ngekana noga igê na matena iana na maneraha o Salomo, karena o Tavite.

²⁷Na mane ni vogasiha ma na mane ni hagarahenga ka nungia na Araha, hanana i korokoro tangara na enoni. God ki rongogi ma ki aganarigi na nunginungiha iata tenia i pasina.