Read Kahua 2 SIHONGA 31 Bible Online

2 SIHONGA 31 - Kahua bible

2 SIHONGA 31

¹Matena i hato na tangiana raha, na Isiraelita hato ka râ surigi na hinua hato i Juta ma ka barugigi râ na u na hê ni ataro, ka tapigi so na nununa ka Asera na ataro ma ka hagaerasigi na bea ni vogasiha ma na agua ni vogasiha ni ataro. Matena ga kato hato vikana i Juta hagenani ma igê na apaneni iata na varo ninuni iata hehegitigi o Benamino, o Eparaimi mo Manase, ngaira ka aporo i pasita.

²Na maneraha o Hisikia ki surungigi aporo na ramata tangara na mane ni vogasiha ma na mane ni hagarahenga renigi na tagaraha iata hegitigi. I berarogani na tagaraha ngegana ngaira ki tuguhira, viga susu, ka vogasi renira na ganiani ni ngê haku, ka torea na hagarahenga i ruma ni rotu, ma ka hagarahasia ma ka visia koro God igê na agua hegitigi i ruma ni rotu.

³O Hisikia ki mahatangenira na ganiani, tenigi na togoha iana marena hanana ga susu renira i na ara ni mavoraro ma i na ara ni manurahi ma igê na ara ni tangiani ni mamaroha, igê na tangiani raha ni hageha haoru ma igê na ani getigi na tangiani raha, manga i bani visia na ramata iana na Araha.

⁴Nikâ na maneraha ki bonasira na ai ni Jerusaleme ka toregi me na votovoto iata tangara na mane ni vogasiha ma na mane ni hagarahenga, suria i tuguhira viga tamanira, hanana ngaira ka tanugi nga tare na tagaraha, na ramata iana na Araha i bonasira renigi.

⁵Matena i bonasira hato vikana, na ai ni Isiraele ka pe hagarihu vige toregi me na votovoto iata: na koni koro ngavê, na vaini, na oile ni olive, na pirui, ma na marâ getigi tenigi na mu iata, henigi na tangahuruta tenigi na marâ hato ga nahunigi.

⁶Na enoni hato surigi na hinua i Juta ka toregi me na tangahuruta tenira na puruka ma na sipi iata, henigi rako na votovoto ga hagapunarigi tanga na Araha God iata.

⁷Na votovoto ka haganega ka ata me igê na oruta na hageha ma ka ama ni haripage nga surigi nikâ na hageha ge he.

⁸Matena na maneraha o Hisikia ma na gavumane iana ka konetenigi na votovoto ga haripage ngavê, ngaira ka visia raha na Araha ma ka visira koro na Isiraelita na kariana na Araha.

⁹Na maneraha ki merahekarigi na mane ni vogasiha ma na mane ni hagarahenga renigi na votovoto ngegana.

¹⁰O Asaria na mane ni vogasiha i teha tenia na hagosi ninuni iana o Satoke ki vi tanga na maneraha, ki vi: “Haganega tenia na matena na enoni ka toregi me igê na votovoto iata tanga na ruma ni rotu, igami kami ngêngê masu tare, ma ka rako na votovoto ga hitahita râ. Na votovoto ka aharêsigami, suria na Araha ki koro tangara na kariana.”

¹¹Na maneraha o Hisikia ki haribona ka hagarêgi na kiboru igê na mahera na ruma ni rotu,

¹²hanana ga pagepage igê na votovoto hato ma na tangahuruta tenigi na nahuninga hato iata na enoni, hanana ga tâtâ maninga igê. Ngaira ka kasia o Konaniahu na mane ni hagarahenga ki bâsurigi ma ka kasia o Simi o vesina ki ruata vê tanga.

¹³Ngaira ka kasira na tangahuru gi tage na mane ni hagarahenga ka tagara i ruguhaterua. Ngaira ka no Jegiele, o Asasiahu, o Nagata, o Asaele, o Jerimote, o Josabata, o Eliele, o Jisimakiahu, o Magata, mo Benaia. Ngaira ka kato vikana suria na tamasinga iaterua na maneraha o Hisikia mo Asaria na mane ni vogasiha i teha.

¹⁴Na mane ni hagarahenga o Kore karena o Imina i bêngenira na me ga anumasia na maani para bêkê na ruma ni rotu, ngaia ki bâsurigi na votovoto na enoni ka tagarenigi tanga na Araha ma ki vutungira na mane ni vogasiha renigi na ani ga oto tangara hegitigi.

¹⁵Igê na hinua getigi ga oga igê na mane ni vogasiha, na ani getera na mane ni hagarahenga kaniga tamania vikana. Ngaira ka no Etene, o Miniamini, o Jesua, o Semaia, o Amaria, mo Sekania. Ngaira ka vutungira na tamata na mane ni hagarahenga renigi na ngêra ararigi na tagaraha iata tegenata,

¹⁶mareha vi ararigi na hagosi ninuni. Ngaira ka vutungira na mane hato i tonga na tangahuru gi oru na harisi iata ma ki akê, ki tuguhira viga tagara i ruma ni rotu i na ara ni tangiani, igê na tagaraha iata hegitigi.

¹⁷Na mane ni vogasiha ka tagara igê na hagosi ninuni iata hegitigi, ma na mane ni hagarahenga i tonga na tangahuru gi rua na harisi iata ma ki akê, ngaira ka tagara igê na apaneni me ga heheuri ka tagara.

¹⁸Na atata ngaira hato ka segegi so henira na gete iata, na kareta ma na ruma iata, suria i tuguhira, viga nanê tare tangagi na tagaraha iata igê na rotu.

¹⁹I berarogata na mane ni vogasiha ga oga i hinua tangara na raraha iana o Aroni, se ga oga i bena ni go hagarangigi na hinua ngegê, ka oga tani na mane i tuguhira, viga votovoto na ngêra tangara na mane hato igê na ahemata iata na mane ni vogasiha ma tangara na mane hato ni hagarahenga, ga bani segegi so na atata.

²⁰Na marâ hato na maneraha o Hisikia ki katogi i Juta hagenani, ka oto ma ka hagakoro obana na Araha God iana.

²¹Ngaia ki tavoraha bâkoro, henaka igê na apanena na ruma ni rotu se igê na apanena na marupeana na ramata iana God, suria ngaia ki toto suria maninga God i mêrihana hagenani.