Read Kahua 2 SIHONGA 32 Bible Online

2 SIHONGA 32 - Kahua bible

2 SIHONGA 32

¹I murini na tarani hato ngegana ga hagabângenia vi na maneraha o Hisikia ki toto suria maninga na Araha, o Senaheribe na maneraha ni Asiria ki sugaria i Juta. Ngaia ki ura rihigi na hinua ga pararihigi, ma ki bonasira na mane ni me iana ka tahakurugi na para ni hinua ma ka banu.

²Matena o Hisikia ki girara, vi o Senaheribe ki obania vi taharia nikâ i Jerusaleme,

³ngaia ki merahekarigi na gavumane iana ma na mane ga bêngenira na mane ni me iana, ka ahunigi na vekaru i na apanena hura na hinua i Jerusaleme, hanana i mareha na ve tangara na me ni Asiria matena ga hagarangia i Jerusaleme. Na gavumane ma na mane ga bêngenira na mane ni me ka merahura rako era na enoni ma ka ahunigi na ve banga, hanana siana na ve ki gogogo hura me tenigi tangara na ai ni Asiria.

⁵Na maneraha ki rahoa aporo na para ni hinua ma ki tagarahigi na bebetehe igê ka kahu raha ngavê, ma ki tagarahia na para i na apanena hura na para ni hinua. Ngaia ki hagagatagatania na bena i Milo kerekê i hinua iana o Tavite pusira na merongata. Nikâ ngaia ki haribona, ka tagarahigi rako era na ora ma na bêata.

⁶Ngaia ki nakara na ara ni mane hato i hinua i ruguhata na mane ga bêngenira na mane ni me. Ngaia ki hagahakura ngaira hato igê na mahera hagarangia na maani para na hinua.

⁷Ngaia ki vi tangara, ki vi: “Mu togeaga ma kamu ramoramo. Siana kamu magutenira na maneraha ni Asiria ma na mane ni me iana i bêngenira. Na ramoha i panepane henigia igia ki teharia na ramoha i panepane henia ngaia.

⁸Ngaia ki hagêguritogo renigi na raramohata na enoni, ma igia ka hagêguritogo renia na Araha God iaka, i tamanigia igê na hearihatana, hanana igia ka tehateha.” Na tamasinga ngegê iana na maneraha ka kanukanura na enoni.

⁹Ta na matena i hemuri, matena o Senaheribe ma na mane ni me iana ka gâga mêngara i hinua i Lakisi, ngaia ki kasi tamasinga tangara o Hisikia ma na ai ni Juta ga oga henia i Jerusaleme.

¹⁰Ngaia ki vi: “Inê nga o Senaheribe na maneraha i Asiria, kê hagategamu, na ta kani katogamu kamu gatagata kamu oga i Jerusaleme, matena gê urarihigamu?

¹¹O Hisikia ki vi tangagamu, vi na Araha God iami ki page hagatahigamu tenia na raramohamami. Ma o Hisikia ki hagabekasigamu ma ki page katogamu kamu mesi magêha ma tonoha.

¹²Ngaia nga kani hagaerasigi na agua ma na bea ni vogasiha tanga na Araha iami. Hemuri ngaia ki bonasira na ai ni Juta me Jerusaleme, ka rahesia God i Jerusaleme ma, ma ka sungigi na marâ i sigini koro igê na ani gi tage togo ma na bea ni vogasiha.

¹³Mu pe bani girara vari na tarana gami katoa na êvariku menê tangara na enoni i na agua getigi? I hega, na ataro iata ka hagatahira vari na kariata tenia na maneraha i Asiria?

¹⁴I hega, na ataro i na agua ngegana ka hagatahigi vari na agua ngegana tenigami? Hoi, mu tako hega kanimu vi, vi na God iami kani page hagatahigamu?

¹⁵Hoita, siana kamu tê ringena o Hisikia, i hagabekasigamu. Siana kamu tongesuria. I mareha rârâ ta na ataro, henaka tenia i he, vige hagatahira na kariana tenia na maneraha i Asiria i nago ki râ me. Vikê na God iami ki bara ngavê tanga vige hagatahigamu nogana!”

¹⁶Na mane ni Asiria ga tora tamasinga ka ama ni tamasi erasirerua nga na Araha God ma o Hisikia, na kariana God.

¹⁷Na leta, na maneraha o Senaheribe ki segea, ki tamasi erasia na Araha God iata na Isiraelita. Na leta ki râ vikê: “I mareha rârâ na ataro, henaka tenia i he, vige hagatahira na kariata tenia na raramohaku. Ngaia nikâ na God iana o Hisikia ki bara tanga vige hagatahira nogana na kariana teniê.”

¹⁸Na mane tora tamasinga ka ngere ka tamasi vikana igê na tamasinga iata na ai ni Juta, hanana ga hagamagusira ma ka katora ka bagahagêguri na ai ni Jerusaleme, ga oga igê na para ni hinua. Vikana ki mataku vari tangara, hanana viga henahuraua na hinua.

¹⁹Na tamasinga ga tamasi erasira re na ataro iata na enoni i na agua getigi, ka tamasi erasia nikâ na God ni Jerusaleme renigi, manga vi ngaia nikâ ka na nununa na ataro, ga tahea na enoni.

²⁰Ma na maneraha o Hisikia ma na poropete o Isaia karena o Amose karu avarasia God.

²¹Na Araha ki hagatorangenia na angero iana ki hagamesira na mane ni me ni Asiria henira na mane ni me ga bêngenira. Vikê na maneraha ni Asiria ki aporo i pasina ma ki maki. Ta na tangiana, matena i oga igê na ngêsu iana na ataro iana, tani na hitangita o karena ka ahurahunia renigi na tatapa borahu iata.

²²Igê na tarana ngekana na Araha ki hagatahira na maneraha o Hisikia ma na ai ni Jerusaleme tenia na raramohana o Senaheribe na maneraha i Asiria ma tenira nikâ na merongata getera. Ngaia ki katora na enoni ka oga igê na marapeha, suria i hato na tahariana tenigi na agua getigi.

²³Rako na enoni ka râ me tanga i Jerusaleme hanana ga vogasia na Araha ma ka mahata tanga o Hisikia. Haganega tenia i ngekana na enoni surigi na agua hato getigi ka hagahigasia o Hisikia.

²⁴Igê na matena ngekana na maneraha o Hisikia ki maeha ma ki sugi me. Ngaia ki nunginungi ma na Araha ki hagagirara, vi ngaia ki page komaga aporo.

²⁵Ma o Hisikia ki pe visia koro God renigi na tauhana God tanga, suria i paroparo ngavê. Tahema i Juta me Jerusaleme karu mamasiaga.

²⁶Ki rârâ ma o Hisikia ma na ai ni Jerusaleme ka tangahurira. Vikê na Araha ki pe hagaitangira na enoni mataro me i murina i me o Hisikia.

²⁷Na maneraha o Hisikia ki ruruguha ngavê ma na enoni hato ka hagahigasia. Ngaia ki tagarahigi na ruma tanga i nakanaka igê na ruruguha iana: na golo, na siliva, na hê i raha na meni, na marâ ga sigini koro na vanuhani tangagi na ngêra ma tangagi na marâ getigi, na bêata, ma na marâ getigi i raha na meni.

²⁸Nikâ ngaia ki tagarahigi na ruma i nakanaka igê na koni, na vaini ma na oile ni olive. Nikâ ngaia ki tagarahigi na ruma tangara na puruka ma na sipi iana.

²⁹Henigi na marâ ngegana God ki haganahunia renigi rako na togoha ni puruka ma ni sipi, ma renigi rako na ruruguha getigi. Vikana ngaia ki girara i tagarahigi re rako na hinua.

³⁰Ngaia nga na maneraha o Hisikia kani pania na ve banga i Gigone ma ki tarea na ve ki gogo igê na tara ni ve i karua rârâ ma ki ruguhia na para tanga tagua i hinua. O Hisikia ki akê me maninga igê na ara ni marâ i tanugi.

³¹Nga noga hagetage togo ma God ki naka vê o Hisikia ki râ suri parongana marena. Matena ngekana na mane tora tamasinga ni Babilone ka râ me, hanana ga hagate renia na tarana haoru i akê me igê na agua. God ki kato vikana ki uhungia o Hisikia, hanana vi tarahua maninga na morana na aitangihana.

³²Na tauhana getigi na maneraha o Hisikia ma na totosuriha iana tanga na Araha ka bani segegi so igê na buka na maruteha iana na poropete o Isaia karena o Amose, ma igê na buka na sihonga renira na maneraha i Juta me Isiraele.

³³O Hisikia ki me ma ka bagia igê na matahuta na maneraha igê na harahara i ahaha. Na enoni hato i Jerusaleme me Juta ka hanetasia matena i me. O Manase o karena ki maneraha urusia.