Read Kahua 2 SIHONGA 33 Bible Online

2 SIHONGA 33 - Kahua bible

2 SIHONGA 33

¹O Manase ki tonga na tangahuru matarerua na harisi iana, matena i vora re na maneraha i Juta. Ngaia ki oga i Jerusaleme ma ki maneraha surigi na harisi tangahuru gi rima matara gi rima.

²O Manase ki murisigea na Araha, suria i râ surigi na bagatauhata na enoni ahuroto, na Araha i bani tarigenira hura tenia na agua tarata na kariana.

³Ngaia ki tagarahigi aporo na agua ni vogasiha ni ataro, i bani ruhuruhugi o Hisikia o vaemana. Ngaia ki tagarahigi na bea ni vogasiha tanga o Bala na ataro, ki tagarahigi na nununa ka Asera na ataro ma ki rahesigi na higu.

⁴Ngaia ki tagarahigi na bea ni vogasiha i ruma ni rotu, na ruma na Araha i bani naka hete tanga marena, tanga vige rahesia ma igê ngaia, tare ki bê ki arâ.

⁵Igê na beraro gi rua na ruma ni rotu ngaia ki tagarahigi igê na bea ni vogasiha tangagi na higu.

⁶Ngaia ki susu igê na maruguna i Hinome renira o karena. Ngaia ki hagatera na ataro ma ki harikua, ma ki hagatera na enoni ni girarasiha ma na nunuta na enoni ga bani me. Ngaia ki tasi ngavê i maana na Araha ma ki hagamangaria.

⁷Ngaia ki hagêrasia na nununa na ataro i ruma ni rotu, na ruma na Araha i bani tamasi renia tangarerua o Tavite mo Salomo o karena, ki vi: “Ikê nga i Jerusaleme, i rarona nga na ruma ni rotu ngekê, ngaia nga ka na agua gê bani atea tenigi na apanena hato iata na varo ninuni tangahuru matarerua iana o Isiraele. Ngaia nga ka na agua ga rahesiê igê inê.

⁸Ma ki manga na Isiraelita ma ka marupegi na ramata hato iaku ma na ramata hato o Moise na kariaku i bani vatera renigi, hoi, inê ki asa vi ve page nakara na merongata ke tarigenira hura tenia na agua, gê bani haganahunira na êvarita renia.”

⁹O Manase ki hagatasira na ai ni Juta, ka tasi raha ngavê teharira na enoni ahuroto, na Araha i bani tarigenira hura tarata na kariana.

¹⁰Henaka na Araha ki ramonira o Manase ma na kariana, ma ngaira ka pe tê viteana.

¹¹Tahema na Araha ki nakara na mane ga bêngenira na mane ni me ni Asiria ka sugaria i Juta. Ngaira ka henahuraua o Manase, ka area, ka rakua renigi na seni ma ka torea tanga i Babilonia.

¹²Igê na mamasiaganiha iana ngaia ki tangahuria ma ki aharia aporo na Araha God iana ma ki avarasia.

¹³God ki aganaria na avarasiha iana o Manase, suria i naka ki aporo i Jerusaleme ma ki maneraha aporo. Vikana o Manase ki kahu tahetara vi na Araha kani God.

¹⁴Hemuri o Manase ki uruia akê na para i metara na para na hinua kerekê i hinua iana o Tavite. Na para ki haganega tenia i ve banga i Gigone igê na maruguna, ki râ ki tariha i maani para Siare ma ki arigu i Opele, na agua i akê i hinua. Nikâ ngaia ki nakara na mane ga bêngenira na mane ni me surigi na hinua nganganihaga hegitigi i Juta.

¹⁵Ngaia ki hagarurugu hura tenia na ruma ni rotu na ataro iata na ai mahuara, na nununa na ataro i bani hagêrasia i ngekana, ma na bea ni vogasiha ni ataro igê na hungana i oga igê na ruma ni rotu ma tagua getigi nikâ i Jerusaleme. Ngaia ki toregi hura na marâ hato ngegana tenia na hinua ma ki kasigi râ.

¹⁶Nikâ ngaia ki tagarahia aporo na bea ni vogasiha tanga na Araha, ma ki vogasi igê renigi na ngêra ni ngêhaku ma ni visiana koro God. Ngaia ki bonasira na ai ni Juta hato, hanana ga rahesia na Araha God iata na Isiraelita.

¹⁷Henaka na enoni ka ama ni vogasi nga igê na agua getigi ni vogasiha, ma ngaira ka vogasi tanga ma na Araha.

¹⁸Na tauhana getigi o Manase, na nunginungiha iana tanga God iana ma na tamasinga iana na Araha God iata na Isiraelita i tamasi i harata na poropete tanga, ngaigi hato ka bani segegi so igê na buka na sihonga renira na maneraha i Isiraele.

¹⁹Na nunginungiha iana na maneraha henia na aganariha iana God, na bagatauhana i nago tarana i tangahuria, na bagaparongana, na agua ni vogasiha ni ataro ma na nununa ka Asera na ataro i tagarahigi, ma na ataro i hagarapera, hoi, ngaigi hato ngegana ka bani segegi so igê na buka na sihonga renira na poropete.

²⁰O Manase ki me ma ka bagia igê na ruma raha iana. O Amone o karena ki maneraha urusia.

²¹O Amone ki tonga na tangahuru gi rua matarerua na harisi iana, matena i vora re na maneraha i Juta. Ngaia ki oga i Jerusaleme ma ki maneraha surirerua na harisi gi rua.

²²Ngaia ki haritohea na Araha manga o Manase o vaemana, ma ki vogasira na ataro manga o vaemana.

²³Ma ngaia ki pe urusi parongana hete manga o vaemana, i aharia aporo na Araha. Ngaia ki erataga ngavê ma teharia o vaemana.

²⁴Na mane ni hagaotonga iana ka harikato renia ma ka nahuia ki me i ruma raha iana.

²⁵Na ai ni Juta ka nahuira ka me na mane ga bani nahuia ki me o Amone, ma ka kasia o Josia o karena ki maneraha.