Read Kahua 2 SIHONGA 35 Bible Online

2 SIHONGA 35 - Kahua bible

2 SIHONGA 35

¹Na maneraha o Josia ki hagarahasia na paseka i Jerusaleme, hanana i hagahigasia na Araha. Igê na tangahuruta matare he na tangiana igê na hageha hagenago ngaira ka nahuira na ganiani tanga na tangiana raha.

²Ngaia ki tamasi tangara na mane ni vogasiha renigi na tagaraha i tuguhira i ruma ni rotu ma ki hagaramonira hanana ga tanugi maninga.

³Ngaia ki tamasi nikâ tangara na mane ni hagarahenga, ga hagesurira na enoni renigi na ramata ma ka bani hagapunarira mareta tanga na Araha, ki vi: “Mu naka na bokesi apuna na suruheri i ruma ni rotu, na maneraha o Salomo karena o Tavite i bani tagarahia. I hato vigamu tugia rârâ nikâ suri agua. I tuguhigamu hete, vigamu tagara tanga na Araha God iami ma tangara na kariana na Isiraelita.

⁴Mu râ surigi na tamasinga iaterua na maneraha o Tavite ma na maneraha o Salomo o karena. Mu nanê hanana mu gâga igê na atohami i ruma ni rotu surigi na apaparaha iami ma na apaneni me iami tangagi na tagaraha iami hehegitigi.

⁵Mu hagagaragamu maremi, hanana tani na hitangimi ka nanê tare, ka tamanira na ahemata i berarogata na Isiraelita ga mareha vi na raraha iana o Levi.

⁶I tuguhigamu, vigamu nahuira na kareta na sipi ma na goti tanga na paseka. Hoi, mu hagamatarotarogamu maremi tanga na paseka, ma kamu hagarêgi na ara ni marâ tangara na Isiraelita, manga na Araha i bani tamasigi i harana o Moise.”

⁷Tangara na enoni, ga râ me tanga ga hagarahasia na tangiana raha na paseka, na maneraha o Josia ki tagarenira tenigi na togoha iana marena na kareta na sipi ma na bêhâgata na goti. Ngaira hato haku ka 30,000. Nikâ ngaia ki vatera renira na 3,000 na puruka mane.

⁸Na mane ga tagara igê na gavumane iana na maneraha ngaira nogata ka votovoto tangara na enoni ma tangara na mane ni vogasiha ma na raraha iana o Levi. O Gilikia na mane ni vogasiha i teha, o Sekaria ma o Jegiele, ga bâsuria na ruma ni rotu, ngaira ka tagarenira tangara na mane ni vogasiha na 2,600 na kareta na sipi ma na goti ma na 3,000 na puruka mane tangagi na vogasiha igê na paseka.

⁹O Konaniahu, ma ngairerua o goana o Semaia mo Netanele, ma o Gasabia, o Jeiele mo Josataba, ga raha tangara na raraha iana o Levi, ngaira ka tagarenira tangara na raraha iana o Levi na 5,000 na kareta na sipi ma na goti ma na 500 na puruka mane tangagi na vogasiha.

¹⁰Matena ga nanê na ara ni marâ tanga na paseka, na mane ni vogasiha ma na raraha iana o Levi ka râ tangagi na atohata suria na bonasiha iana na maneraha tangara.

¹¹Na raraha iana o Levi ka nahuira na ganiani ni vogasiha. Ngaira ka tagarenigi na gaputa na ganiani tangara na mane ni vogasiha, hanana ga kamusia re na bea ni vogasiha. Na raraha iana o Levi ka sibira na ganiani ngegana.

¹²Hemuri ngaira ka votogi tangara na enoni surigi na hagosi ninuni iata hehegitigi, na ganiani ni sungiha, hanana na mane ni vogasiha ka susu renigi tanga na Araha surigi na ramata iana o Moise, urusira na enoni ngegana.

¹³Na raraha iana o Levi ka hanugi na ganiani tangagi na vogasiha igê na paseka surigi na ramata ma ka hagaguburigi na ganiani na vogasiha ni ngêhaku igê na kuki ma na apira na kapa ma ka hatani vutungira na enoni renigi.

¹⁴Hato vikana, ma na raraha iana o Levi ka vutungira so mareta ma na mane ni vogasiha renigi na ganiani mako, suria na mane ni vogasiha na raraha iana o Aroni ka aruma mataro me ki bungibungi renigi na sungiani ni ganiani ma ni êbeni, ga susu renigi tanga na Araha.

¹⁵O Asapa, o Hemane ma o Jetutuni na poropete iana na maneraha, ngaira ka gâga so ma igê na atohata surigi na ramata iana na maneraha o Tavite. Ngaira ka na mane ni kiha tenia na hagosi ninuni iana o Asapa na raraha iana o Levi. Na mane ga anumasigi na maanipara na ruma ni rotu ka gâga tonge so nogata, suria na tamata na raraha iana o Levi ka hagarêa na paseka tangara.

¹⁶Vikê ngaira ka râ surigi na tamasinga iana na maneraha o Josia. Na hagarahenga hagenani igê na tangiana ngekana ki râ manâhi ngavê: na rahesiana na Araha, na hagahigasiana na tangiana raha na paseka ma na sungiha ni ganiani igê na bea ni vogasiha.

¹⁷Surigi na tangiani gi pi na Isiraelita hato ga oga i ngekana ka hagahigasigi na paseka ma na tangiani raha na bereti i peahunga.

¹⁸Haganega tenia na matena iana na poropete o Samuele mataro me i ngekê ka pe hagahigasia rârâ na paseka manga i ngekê. I mareha rârâ ta na maneraha i nago vige hagahigasia na paseka manga na maneraha o Josia i ngekê henira na mane ni vogasiha ma ni hagarahenga ma na ai ni Juta, ni Isiraele me Jerusaleme.

¹⁹Na tarana ngekana ki akê me igê na tangahuruta matare varu na harisi o Josia i maneraha surigi.

²⁰I murina na maneraha o Josia i katogi hato na tarani ngegana tanga na ruma ni rotu, o Neko na maneraha i Esipito ki bêngenira na mane ni me iana, hanana ga meraheariha na ai ni Babilonia i Karekemisi hagarangia na ve i Uparatesi. O Josia ki uhungia vi hagabarasia,

²¹ma o Neko ki kasi tamasinga tanga o Josia, ki vi: “Maneraha i Juta, na hearihatana ngekê ki mareha vi tangago igo. Inê kê pe râ me hanana vi ve megoheariha, ma kê meraheariha hete na merongaku. Ma God ki vi tangê, vi siana kê hagarihu. God ki panepane heniê. Vikê siana ko hagabarasiê, i era ma ngaia ki hagamagahurugo.”

²²Ma o Josia ki togeaga ki meheariha. Ngaia ki pe karingagi na tamasinga iana na Araha i tamasi i harana na maneraha o Neko. Ngaia ki hagesuru ki bâ riariaga, hanana siana ka bâbâgirara igê na hearihatana. Ngaia ki meheariha o Neko igê na bena i Megito.

²³Igê na hearihatana na mage iata na me ni Esipito ka takea na maneraha o Josia. Ngaia ki bonasira na kariana, ki vi: “Mu toreê vê! Inê kê mamari ngavê!”

²⁴Ngaira ka ragea tenia na kati ni me iana ma ka naka râ igê na ani getea na kati ni me iana i oga i ngekana. Ngaira ka torea râ tanga i Jerusaleme. Ngaia ki me i ngekana ma ka bagia igê na matahuta na maneraha. Na enoni hato i Juta me Jerusaleme ka angi maramara renia.

²⁵Na poropete o Jeremia ki baro ki ni angiha maramara renia na maneraha o Josia. Na ki ngekana ki tâ tangara na mane ma na gete ni kiha i Isiraele, hanana ga kiria i na ara ni mateni ga angisia igê na maneraha o Josia. Na ki ngekê ki oga igê na buka ni ki ni angiha maramara.

²⁶Na tauhana hato o Josia, na totosuriana na Araha, na marupeani na ramata ma na ara ni marâ ga bani akê me igê na ogaha iana,

²⁷ka bani segegi so igê na buka ni sihonga renira na maneraha i Isiraele me Juta.