Read Kahua 2 SIHONGA 36 Bible Online

2 SIHONGA 36 - Kahua bible

2 SIHONGA 36

¹Na ai ni Juta ka kasia o Joagasa karena o Josia ki maneraha. Ngaira ka monea i Jerusaleme ki maneraha.

²O Joagasa ki tonga na tangahuru gi rua matare oru na harisi iana, matena i vora re na maneraha i Juta. Ngaia ki oga i Jerusaleme ma ki maneraha surigi na hageha gi oru.

³O Neko na maneraha i Esipito ki henahuraua ma ki katora na ai ni Juta ka vuri re na 3000 kilo na siliva ma na 30 kilo na golo.

⁴O Neko ki kasia o Eliakimo vesina o Joagasa ki maneraha i Juta ma ki hêtana renia vi o Joiakimo ma ki torea o Joagasa tanga i Esipito.

⁵O Joiakimo ki tonga na tangahuru gi rua matare rima na harisi iana, matena i vora re na maneraha. Ngaia ki oga i Jerusaleme ma ki maneraha surigi na harisi tangahuru matare tage. Ngaia ki murisigea na Araha God iana.

⁶O Nebukanesare na maneraha i Babilonia ki sugaria i Juta, ki henahuraua o Joiakimo, ki rakua renigi na seni ma ki torea tanga i Babilonia.

⁷O Nebukanesare ki rurugugi vê tani na ruruguha i ruma ni rotu ma ki nakagi i ruma raha iana i Babilone.

⁸Na tauhana hato o Joiakimo henigi na bagatauhana ma na eraha i katogi ka bani segegi so igê na buka ni sihonga renira na maneraha i Isiraele me Juta. O Joiakino o karena ki maneraha urusia.

⁹O Joiakino ki tonga na tangahuru matare varu na harisi iana, matena i vora re na maneraha i Juta. Ngaia ki oga i Jerusaleme ma ki maneraha surigi na hageha gi oru ma na tangiani tangahuru gi tage. Ngaia nikâ ki murisigea na Araha.

¹⁰Igê na matena na hagahisi na maneraha o Nebukanesare ki henahuraua o Joiakino tanga i Babilonia ma ki rurugugi vê na ruruguha i ruma ni rotu. Hemuri o Nebukanesare ki kasia o Setekia o mona o Joiakino ki maneraha i Juta me Jerusaleme.

¹¹O Setekia ki tonga na tangahuru gi rua matare tage na harisi iana, matena i vora re na maneraha i Juta. Ngaia ki oga i Jerusaleme ma ki maneraha surigi na harisi tangahuru matare tage.

¹²Ngaia ki murisigea na Araha ma ki pe aganarigi na tamasinga iana na Araha i tamasigi i harana o Jeremia na poropete.

¹³O Setekia ki guguruga tanga na maneraha o Nebukanesare i bani tuguria ki tohe renia na atana God, vi tototo suria ngaia. Ngaia ki usi ngavê vige urusi parongana ma ke aharia aporo na Araha God iata na Isiraelita.

¹⁴Na meraha i Juta, na mane ni vogasiha ma na enoni ka amaka surigi na bagatauhata na ani i na agua getigi rihira, suria ga hagarapera na ataro. Vikê ngaira ka hagaerasia na ruma ni rotu, na agua apuna na Araha i bani atea tanga ngaia marena.

¹⁵Na Araha God iata na êvarita ki bani ama ni hagatorangenira me nga na poropete, hanana ga ramonira na kariana, suria i obania vi hagatahira ngaira ma na ruma ni rotu.

¹⁶Ma ngaira ka meramarabe na mane tora tamasinga iana God. Ngaira ka usi vige karingagi na tamasinga iana ma ka rurusira na poropete iana. Ki rârâ ma na Araha ki mangariaga ngavê tangara na kariana. Vikê ki bara tangara vige tahi i he.

¹⁷Vikê na Araha ki katoa na maneraha i Babilonia ki taharira. Na maneraha ki nahuira ka me na mane na gapu haoru i Juta, henaka i ruma ni rotu. Ngaia ki pe takia rârâ tani, naka ma na kare se na gemêa, na mane se na gete, na ani ga maeha se ga apekoro. God ki tagarenira ngaira hato tanga o Nebukanesare.

¹⁸O Nebukanesare ni Babilonia ki rurugu i ruma ni rotu, i na kiboru ni ruruguha, i ruma raha iana na maneraha ma i ruma iata na gavumane iana ma ki migiaporo tanga i Babilone.

¹⁹Ngaia ki sungigi na ruma ni rotu, na hinua, na ruma raha henigi na ruruguha igê ma ki hogegi na para ni hinua.

²⁰Ngaia ki torera tanga i Babilone na ani ga tahitahi mêngara, hanana ga vora re na kare rakuraku iata ngaia ma na ani ga heheuri ka maneraha urusia. Ngaira ka vora re na kare rakuraku i ngekana mataro me na maneraha i Pesia ki teharia i Babilone.

²¹Vikê na Araha ki hagamonaria na tamasinga iana i harana na poropete o Jeremia, i vi: “Na agua ki page aruga surigi na harisi tangahuru gi pi, hanana i mamaro ararigi na harisi i tuguhira viga naka mamaro igê suria na ramata tanga na mamaroha.”

²²Igê na harisi hagenago o Siro i maneraha i Pesia, na Araha ki hagamonaria na tamasinga iana i harana o Jeremia na poropete. Ngaia ki katoa o Siro ki haribona ki sege, hanana ga tomania raha surigi na ara ni agua i marungigi. Na haribonaha ki manga ikê:

²³“Inê o Siro na maneraha i Pesia kê vi vikê: na Araha God ni vavearo ki bani kasiê kê marungia na maveta hagenani. Ngaia ki hagatorê hanana gê tagarahia na ruma ni rotu tanga i Jerusaleme i Juta. Hoi, igamu hato na kariana God mu aporo i ngekana ma na Araha God iami ke ngahisigamu.”