Read Kahua 2 SIHONGA 4 Bible Online

2 SIHONGA 4 - Kahua bible

2 SIHONGA 4

¹Na maneraha o Salomo ki haribona ka tagarahia na bea ni vogasiha renia na kapa higa. Na borahusigana ki 10 mita, na aberaberagana ki 10 mita nikâ ma ki akê na 5 mita.

²Ngaira ka tagarahia nikâ na apena na bagamaraguhu raha renia na kapa higa, i arige ma ki koko na 2 mita ma na 50 sentimita. Na akerena na maana tanga ta akerena ki 5 mita ma na akerena na maana i rihu ki taku, ki 15 mita.

³Na harahara gi rua na nunuta na puruka mane karu rihuia na rêna na maraguhu raha ma karu riki hura me igê na maraguhu, matena ga karangia na kapa higa i rono tanga i voravora me na maraguhu.

⁴Na maraguhu ki matare ki oga i gerita na 12 na puruka mane na kapa higa. Ngaira ka mato hetatari bê hura: gi oru ka mato bêkê, gi oru ka mato bêso, gi oru ka mato bêbanu ma gi oru ka mato bêataha.

⁵Na upupugana na apena na maraguhu ki 8 sentimita. Na maraguhu raha ngekana ki ararigi na 135,000 lita.

⁶Ngaira ka tagarahigi nikâ na 10 na apira raha ni tananiha: gi rima tanga i otona na ruma ni rotu ma gi rima tanga i mahana. Ngaigi kani tanga ga tananigi igê na mega na ganiani. Na ve igê na maraguhu raha kani tangara ma na mane ni vogasiha ga mamanu igê.

⁷Ngaira ka tagarahigi na 10 na atohani na laiti renia na golo manga bani hanana ga bâ, ma na 10 na bea. Ngaira ka nakagi ngaigi hato i rarona na apena na ruma ni rotu: na atohani na laiti gi rima ma na bea gi rima i ta apanena, ma na atohani na laiti gi rima ma na bea gi rima i ta apanena. Nikâ ngaira ka tagarahigi na 100 na kere apira renia na golo.

⁹Na maneraha ki haribona ka tagarahirerua na mahera gi rua: tani ki tangara na mane ni vogasiha i maana na ruma ni rotu, ma tani ki na mahera raha bêhura. Na purupuruni na maanipara i berarogaterua na mahera ngegana ngaira ka abagi renigi na bahitani na kapa higa.

¹⁰Ngaira ka naka na maraguhu raha igê na ariruguna bêkê i maana na ruma ni rotu.

¹¹O Gurama ki tagarahigi nikâ na kâkâ, na maevo ma na apira. Na marâ hato i tagarahigi tanga na ruma ni rotu suria na bonasiha iana na maneraha o Salomo tanga kani igê: na u gi rua na boroni tonganigi na bêterua na u ngegana na mahe na sigani na kapa higa i hêrigi ka bâ manga i na seni igê na ara ni hitangiterua na boroterua na u ngegana; na 400 na marâ buburi na kapa higa tangarerua na harahara garu rihuia na ara hitangiterua na boroterua ngegana; na 10 na kati ni tananiha, na 10 na apira raha ni tananiha tangagi na kati ngegana, na apena na maraguhu raha, na 12 na puruka mane i matare ki oga na maraguhu ngekana igê, ngaigi na kâkâ, na maevo ma na eahi.

¹⁶O Gurama ki tagarahigi na ara ni marâ hato ngegana renigi na kapa higa i togatoga tanga na ruma ni rotu iana na Araha suria na bonasiha iana na maneraha o Salomo tanga. O Gurama ki manisingenia ngavê na tagaraha ngekana.

¹⁷Na maneraha ki haribona ka tagarahigi na marâ hato ngegana igê na agua i berarogaterua i Sukote me Seretata igê na maruguna i Jotano. Ngaira ka tagarahigi na bâbâhani hegitigi na marâ ngegana renia na hêpia, ka hagaronoa na kapa higa ma ka karangia so i raroni na bâbâhani ngegana.

¹⁸Ngaira ka pe hagararingenigi na higahigani na marâ na kapa higa ngegana, suria ga rako teha ngavê. Tahema ngaira ka pe giraragi na higahigani.

¹⁹Na maneraha o Salomo ki haribona ka tagarahigi nikâ na marâ tanga na rarona na ruma ni rotu renia na golo. Ngaigi kani igê: na bea na golo ni vogasiha; ngaigi na bea ni bereti tanga God; na atohani na laiti henigi na laiti igê renia na golo taranina, ga ura karu mave i maana na kiboru apuna teha ngavê, manga i bani tâ tangagi vikana; na takani na mahe; ngaigi na laiti henigi na marâ ni hunu laiti; ngaigi na apira ni sungiha na marâ i sigini koro; ngaigi na gê, na apira tangagi na garaputa na gi. Ngaira ka tagarahigi na ara ni marâ hato ngegana renia na golo taranina. Nikâ ngaira ka abagi na purupuruni na maani ruma na ruma ni rotu ma ngaigi nikâ na purupuruni na maana na kiboru apuna teha ngavê renia na golo.