Read Kahua 2 SIHONGA 5 Bible Online

2 SIHONGA 5 - Kahua bible

2 SIHONGA 5

¹I murina i hato na ruma ni rotu, na maneraha o Salomo ki nakagi igê na kiboru ni ruruguha i ruma ni rotu na ara ni marâ hato, o Tavite o vaemana ki bani hagapunarigi tanga na Araha, henigi na siliva, na golo ma na marâ getigi.

²Hemuri na maneraha o Salomo ki unira me tanga i Jerusaleme na bêni hato na varo ninuni ma na hagosi ninuni iata na Isiraelita, hanana ga torea na bokesi na suruheri iana na Araha tenia i Sione na hinua iana o Tavite tanga na ruma ni rotu.

³Ngaira hato ka haku me igê na matena na tangiani raha ni Ruhu.

⁴Matena na enoni raha ka bani haku me, na mane ni hagarahenga ka ragea akê na bokesi

⁵ma ka tugia râ tanga na ruma ni rotu. Na mane ni vogasiha ma na mane ni hagarahenga ka toregi nikâ tanga na ruma ni rotu na ruma apuna na gahu iana na Araha henigi na ara ni marâ hato tanga na hagarahenga.

⁶Na maneraha o Salomo ma na Isiraelita hato ka haku me i maana na bokesi na suruheri ma ka susu renira rako era na sipi ma na puruka, i bara vige tomanira.

⁷Hemuri na mane ni vogasiha ka torea banu i ruma ni rotu na bokesi na suruheri iana na Araha, ma ka bagia igê na kiboru apuna ngavê i ruguhaterua na marâ ga tonga na gagahata.

⁸Na gagahata ga gasigi, ka buhia na bokesi na suruheri henirerua na totora ga torea igê.

⁹Manga na enoni ma ki rêra utumigana nga na kiboru apuna ngavê, ngaia ki girara i bâsigi râ na bogoterua na totora. Manga i mareha, ki mareha. Na totora karu gâga mêngarerua i ngekana i ngekê.

¹⁰I mareha rârâ ta na marâ vige oga i rarona na bokesi na suruheri, nga noga ma na hê aberabera gi rua, o Moise ki bani nakarerua igê i hungana i Sinai, matena na Araha ki naka na suruheri iana henira na Isiraelita, matena ga hura pania i Esipito.

¹¹Ngaira hato na mane ni vogasiha ga oga i ngekana, henaka na anima vê na apaneni mane ni vogasiha, ngaira ka bani hagapunarira mareta. Ma ngaira hato na mane ni hagarahenga tanga na kiha ka tuguni renigi na gahu siki. Ngaira ka no Asapa, o Hemani mo Jetutune, henira o kareta ma o goata. Na mane ni hagarahenga ka ura i na apanena bêkê na bea ni vogasiha. Ngaira ka têgi i rimata na marâ ni tahurunga ma na marâ ga tarugigi manga na gita. Nikâ na 120 na mane ni vogasiha ga uhigi na ahuri ka oga henira. Na ani ga kiki ma na ani ga uhigi na ahuri, henira na ani ga tahutahuru ma henira na ani ga tarotaro, ngaira hato haku ki rongo raha ngavê. Ngaira ka hagarahasia na Araha, matena ga ki vikê:

¹⁵“Hagarahasia na Araha, suria i koro teha ngavê, ma na hetakuiha iana ki asa vige page hato.” Matena na mane ni vogasiha ka hura tenia na ruma ni rotu, ki parama na vaha mave i raramohaga na togatogana renia na bâbâhana raha na Araha, ma ki raro i ruma ni rotu. Ma ki bara tangara vige uruia na hagarahenga.