Read Kahua 2 SIHONGA 6 Bible Online

2 SIHONGA 6 - Kahua bible

2 SIHONGA 6

¹O Salomo na maneraha ki nunginungi, ki vi: “Araha, igo ko obania vigo goga igê na vaha ma na mengo.

²Hoi, inênga kanigê tagarahia na ruma ni rotu i marisimu, Araha, na ruma tangago, go goga hagahu igê.”

³Na Isiraelita hato ka ura i ngekana. Na maneraha ki aharira ma ki nungia God, hanana i korokoro tangara.

⁴Ngaia ki vi: “Visia raha na Araha God iata na Isiraelita! Ngaia ki bani hagamonaria na suruha iana tanga o Tavite o vaemaku, matena i vi tanga, ki vi,

⁵‘Haganega tenia na matena gê torera hura igê na kariaku tenia i Esipito mataro me i ngekê nga, inê kê pe atea rârâ ta na hinua i Isiraele tanga vige torea igê na ruma ni rotu, hanana ge rahesiê igê. Ma inê kê pe atea rârâ nikâ ta na mane tanga vige marungira na kariaku na Isiraelita.

⁶Ma i ngekê inê kê atea i Jerusaleme, hanana vi ngaia nga ka na agua ga page rahesiê igê, ma igo nga o Tavite, kanigê kasigo, hanana go marungira na kariaku.’”

⁷Mo Salomo ki tamasi nga, ki vi: “O vaemaku o Tavite ki kato vi tagarahia na ruma ni rotu tanga ga rahesia igê na Araha God iata na Isiraelita.”

⁸Ma na Araha ki vi tanga, ki vi: “Na tarana koro kanigo obania, vigo tagarahia na ruma ni rotu tangê,

⁹ma igo ki bara tangago vigu tagarahia igo. O karemu maremu nga hete ngaia kani page tagarahia na ruma ni rotu iaku.”

¹⁰Hoi na Araha ki hagamonaria na suruha iana. Inê kê maneraha i Isiraele urusia o vaemaku, ma kê torea na ruma ni rotu tanga ga rahesia igê na Araha God iata na Isiraelita.

¹¹Inê kê bani naka i ruma ni rotu na bokesi na suruheri, garu oga igê na hê aberabera ni suruheri, na Araha i bani naka henira na Isiraelita.”

¹²Hemuri, i maata na enoni, o Salomo ki râ ma ki ura i maana na bea ni vogasiha ma ki gasigi akê na rimana ki nunginungi.

¹³O Salomo ki bani tagarahia na bea na kapa higa ma ki bani bagia i gupuna na mahera na ruma ni rotu. Na borahusigana ki 2 mita ma na 50 sentimita ma na aberaberagana ki 2 mita ma na 50 sentimita, ma bêtagere ki 1 mita ma na 50 sentimita. O Salomo ki akê na rimana.

¹⁴Ngaia ki nunginungi, ki vi: “Araha God iata na Isiraelita, i mareha rârâ tani i vavearo se i maveta vige maratoramu. Igo ko hagamonaria na suruheri iamu henira na kariamu ma ko takuira, manga viga tototo surigo i mêrihata hagenani.

¹⁵Igo ko bani hagamonaria na suruheri iamu tanga o vaemaku o Tavite. I ngekê na ara ni tamasinga iamu ka vaga me mave.

¹⁶Hoita, Araha God iata na Isiraelita, inê kê nungigo, hanana go hagamonaria nikâ na ani getea na suruha iamu tanga o vaemaku, matena go vi tanga, ko vi, ‘Na raraha iamu ka page heheuri tare ka maneraha iata na Isiraelita, manga vi ngaira ma ka têtê viteaku maninga manga igo.’

¹⁷Vikana Araha God iata na Isiraelita, gu katogi ke vaga me mave na ara ni marâ, go surugi tanga na kariamu o Tavite.

¹⁸God, i hega kanigo girara go goga i maveta i berarogata na enoni, na mane ma na gete? Bâ, na vavearo hagenani ki sisite tangago, vigu oga igê. Hoi, ma na ruma ni rotu gê tagarahia ki manga i he, ma ki girara i ararigo igo?

¹⁹Araha God iaku, inê nga ki na kariamu. Gu aganarigi na nunginungiha ma na avarasiha iaku.

²⁰Go anumasia nga na ruma ni rotu ikê tare igê na tangiani ma na bungiani, suria igo kanigo atea, viga rahesigo igê. Vikê gu aganariê, matena gê maatia na ruma ni rotu ikê kê nunginungi.

²¹Gu aganarigi na avarasiha iaku ma na anita na kariamu na Isiraelita, matena ga maatia na ruma ni rotu ikê ka avaravara. Igo, go oga i pasimu gu aganarigami ma ku bonotenigi na tasi iamami.

²²Manga na enoni ma ki katoa na tarana i pe koro tanga na tamana ma na tamana ki torea tanga na bea ni vogasiha i ruma ni rotu ikê, hanana vi tohetohe, vi ngaia ki mareha,

²³hoi, Araha, gu karinga me tenia i pasimu ma ku surirerua na kariamu. Gu hagaitangia na ani i erasia na tamana, mena na bagatauhana, ma ku naka vê na ani i pe erasia rârâ ta na marâ.

²⁴Matena na kariamu na Isiraelita ka so renira na merongata, suria ga haritohego, ma hemuri ka aharigo ma ka râ me i ruma ni rotu ikê, ka tangahurira ma ka avarasigo igê, hanana vigo bonotenigi na bagatauhata,

²⁵hoi, gu karingara me tenia i pasimu. Gu bonotenigi na tasi iata na kariamu ma ku torera aporo tanga na agua, go bani haganahunira re ngaira ma na êvarita.

²⁶Matena i mareha rangi ma ki ura na arito ru, suria na kariamu ka haritohego, ma hemuri ka angitenigi na bagatauhata ma ka maatia na ruma ni rotu ikê, ka tangahurira ma ka avarasigo,

²⁷hoi, Araha, gu karingara me tenia i pasimu, gu bonotenigi na tasi iata na kariamu na Isiraelita ma ku hagaotora. Ma hemuri Araha, gu hagarangisia aporo na apanena iamu ikê, go bani haganahunira hagahu me na kariamu renia.

²⁸Matena na magêha ki nahuia na agua, se na ringa, se na roga mahana ga erasigi na mu, se na ruruha ni pê, se na merongata ka taharira na kariamu, se na maeha se na marâ vigana ka tarahura,

²⁹hoi, gu aganarigi na avarasiha iata. Manga na kariamu na Isiraelita ma ka angitenigi monari na bagatauhata ma ka tagarenigi akê na rimata tanga na ruma ni rotu ikê ka avarasigo,

³⁰hoi, gu aganarigi na avarasiha iata. Gu karingara me tenia i pasimu ma ku bonotenigi na tasi iata. Igo getego ma ko giraragi na aitangihata na enoni. Gu vurira renigi na meta i ararigi na tauhata,

³¹hanana na kariamu ka hagahigasigo ma ka têtê viteamu igê na ogaha hagenani iata igê na agua, go bani haganahunira na êvarimami renia.

³²Manga vi na mahuara ga oga i na agua hagatê ma ka rongorongo tarohamu, vi igo ko raramohaga ma ko tamanira tare na kariamu, ma hemuri ka arâ me, ka nunginungi i ruma ni rotu ikê,

³³hoi, gu aganarigi na nunginungiha iata. Gu karingara me tenia i pasimu, ma ku aganarigi na avarasiha iata, hanana na enoni hato i maveta ke aitangisigo ma ke tê viteamu mangara na kariamu na Isiraelita. Vikana ngaira ka page tahetara, vi na ruma ni rotu gê tagarahia ngekê, ki na agua i tuguhira viga rahesigo igê.

³⁴Manga go bonasira na kariamu ka meraheariha na merongata, ma ngaira ka avarasigo i na agua mavê ga oga igê, ma ka maatirerua na hinua go atea ngekê ma na ruma ni rotu, gê tagarahia tangago ngekê,

³⁵hoi, gu aganarigi na avarasiha iata. Gu karingara me tenia i pasimu ma ko katora ka tehateha.

³⁶Manga vi na kariamu ma ka haritohego-ma vi o ti ki pe tasi- ma igê na mangariaganiha iamu igo ko nakara na merongata ka teharira ma ka henahuraura tanga na agua getea,

³⁷hoi, gu aganarigi na avarasiha iata na kariamu, henaka i hagatê na agua ngekana. Manga vi ngaira igê na agua ngekana ma ka urisi parongata ma ka rahesigo, ka vivi, vi ngaira ka tasi bâraha ma ka erataga ngavê, hoi Araha, gu aganarigi na avarasiha iata.

³⁸Manga vi ngaira i na agua ngekana ma ka angitenigi maninga na bagatauhata ma ka avarasigo, matena ga maatigi na agua ikê go bani haganahunira me na êvarimami renia, ma na hinua ikê go atea ma na ruma ni rotu gê tagarahia tangago ngekê,

³⁹hoi, gu aganarigi na avarasiha iata. Gu karingara me tenia i pasimu ma ku takuira. Gu bonotenigi na bagatauhata hato na kariamu.

⁴⁰Hoita, God iaku, gu takuigami ma ku aganarigi na na nunginungiha i ruma ni rotu ikê.

⁴¹Araha God, gu aharaga ma ku banu i ruma ni rotu henia na bokesi na suruheri, na girarana na raramohamu, ma ku oga hagahu igê. Gu katora na mane ni vogasiha iamu ke ototo tare igê na tagaraha hato iata. Na kariamu ke vagevage renia na korohamu tangara.

⁴²Araha God, siana ko usiteniê, suria go ateê kê maneraha. Gu takusia na takuiha iamu tanga o Tavite na kariamu.”