Read Kahua 2 SIHONGA 7 Bible Online

2 SIHONGA 7 - Kahua bible

2 SIHONGA 7

¹Matena na maneraha o Salomo ki nunginungi hato, na gi ki so me tenia na vavearo ma ki ngêgi na ganiani, ga susu renigi. Na togatogana mave na bâbâhana raha na Araha ki raro i ruma ni rotu.

²Na mane ni vogasiha ki bara tangara, vige banu, suria na togatogana mave na bâbâhana raha na Araha ki raro i ruma ni rotu.

³Matena na Isiraelita ka bâsigi na gi i agorata me tenia i vavearo, ma na togatogana na bâbâhana raha na Araha ki raro i ruma ni rotu, ngaira ka susure ma ka maroro so i ano. Ngaira ka rahesia God ma ka visia koro, ka vi: “Na korohana ma na takuiha iana i asa vige page hato.”

⁴Hemuri o Salomo ma na enoni hato ka vogasia na Araha.

⁵O Salomo ki vogasi renira na 20,000 na puruka ma na 120,000 na sipi tanga na ngêra haku. Vikana ngaia ma na enoni hato ka hagapua na ruma ni rotu.

⁶Na mane ni vogasiha ka ura igê na atohata ma na mane ni hagarahenga ka maatira. Na mane ni hagarahenga ka tahutahuru ka hagarahasia na Araha, ka tarotaro ma ka uhigi na marâ, i bani hagapunarigi na maneraha o Tavite tanga na rotu. Ngaira ka kiria na ki ‘Na takuiha iana i asa vige page hato’, manga i bani bonasira o Tavite renia. Na mane ni vogasiha ka uhigi na ahuri, matena ga ura na enoni hato.

⁷O Salomo ki hagapua na gupuna na rarona na mahera i maana na ruma ni rotu. Ma hemuri ngaia ki susu i ngekana renigi na koni ma na êbeta na ganiani tanga na ngê haku apuna. Ngaia ki kato vikana, suria na bea na kapa higa ni vogasiha i bani tagarahia, ki pe raha ararigi na vogasiha hato ngegana.

⁸O Salomo ma na Isiraelita hato ka hagarahasigi na tangiani raha ni Ruhu surigi na tangiani gi pi. I ngekana ka rako teha ngavê na enoni, tenia nikâ na teha i Hamata hagarangia i Siria, ma tenia i Negeve hagarangia na pereperegana i Esipito.

⁹Na hagapuana na bea ni vogasiha ki toregi na tangiani gi pi, ma na tangiani gi pi me nikâ tanga na tangiani raha ni Ruhu. Igê na hagahatongina na tangiana ngaira ka katoa na magotoha ni hagahatongiha.

¹⁰Ma igê na tangiana i muri, na tangahuru gi rua matare oru na tangiana igê na pita na hageha, o Salomo ki nakara vê na enoni ka aporo i pasita. Ngaira ka vagevagesigi na korohana hato na Araha tangara na Isiraelita na kariana, tanga o Tavite ma tanga o Salomo.

¹¹Matena na maneraha o Salomo ki tagarahirerua hato na ruma ni rotu ma na ruma raha iana ma ki hatongigi maninga na katoha hato iana renirerua,

¹²na Araha ki vora me tanga igê na bungiana. Na Araha ki vi tanga, ki vi: “Inê kê aganaria na nunginungiha iamu. Inê kê aganaria na ruma ni rotu ikê, vi ngaia ki na agua i tuguhira na enoni, viga vogasiê igê.

¹³I na ara ni mateni gê pe hagarangi, se gê nakara na ruruha ni pê ka ngaugi na mu, se gê naka na ringa ki tarahura na kariaku,

¹⁴ma ngaira ka avarasiê, hoi, inê be karingara me tenia i pasiku, ma be bonotenigi na tasi iata, ma be katora ke oga aporo igê na ramana.

¹⁵Inê be anumasia na ruma ni rotu ikê ma be aganarigi na nunginungiha hato igê,

¹⁶suria inê kê atea ma kê hagapunaria, hanana vi na enoni ka rahesiê igê tare ki bê ki arâ. Inê be ngahisia ma be anumasia tare.

¹⁷Manga vi igo ma ko tototo suriê monari manga o vaemamu o Tavite ma ko marupegi na ramata iaku ma ko têtê viteaku tare,

¹⁸hoi, inê be hagamonaria na bani suruha iaku tanga o vaemamu o Tavite, matena gê suru tanga, vi na raraha iana ka page marungia tare i Isiraele.

¹⁹Ma ki manga igo ma na kariamu ma kamu pe marupegi na ramata iaku ma kamu pe têtê viteaku, ma kamu hagarapera na ataro,

²⁰hoi, inê be kasigamu hura tenia na agua, gê bani haganahunigamu renia, ma be pania na ruma ni rotu ikê, gê bani hagapunaria, ki voravora re na agua i tuguhira na enoni, viga rahesiê igê. Vikana na enoni hato i maveta ka hagaru renia ma ka tamasi ruhia.

²¹I ngekê na enoni ka hagahigasia ngavê na ruma ni rotu, ma ki manga mu haritoheê, na enoni hato ga riri igê, ka page konekone renia ma ka page hagate, ka vivi: ‘Tanu hega na Araha kani kato vikana tangarerua na agua ikê ma na ruma ni rotu ikê?’

²²Na enoni ka page arami, ka vivi, ‘Suria ngaira ka murisigea na Araha God iata, i bani torera hura na êvarita pania i Esipito. Ngaira ka hagarapera na ataro ma ka vogasira. Tahema na Araha ki naka na bagabevoana ngekê ki tarahura.’”