Read Kahua 2 SIHONGA 8 Bible Online

2 SIHONGA 8 - Kahua bible

2 SIHONGA 8

¹O Salomo ki tagarahirerua na ruma ni rotu ma na ruma raha iana surigi na harisi tangahuru gi rua.

²Hato vikana ngaia ki pararihigi na hinua raha, na maneraha o Girama i vatea renigi ma ki hagatorangenira na Isiraelita ka ogasigi.

³Ngaia ki henahuraua na apanena i Hamata Soba.

⁴Ngaia ki pararihia na hinua i Tatamore igê na bagamasusu raha. Ngaia ki tagarahigi aporo na hinua raha hato i Hamata, hanana i nakanaka igê na ngêra ma na marâ getigi.

⁵Nikâ o Salomo ki tagarahia aporo i Bete Gorone kereso ma ki bêtagere henigi na para ma na maanipara, ga girara ga raburigi.

⁶Ngaia ki tagarahigi nikâ i Balata ma na hinua getigi, hanana i nakanaka igê na ngêra, na marâ getigi, na kati ni me henira na hosi. Na ani mavê na marâ i obania vi tagarahia, ngaia ki tagarahia, henaka vi i Jerusaleme, se i Libanone se vi na agua mavê i marungia.

⁷Na enoni, o Salomo i tugurira ka tagara tanga, ka na raraha iata na enoni i Kanani, na ani na Isiraelita ga pe mutera, matena ga henahuraua na agua iata. Ngaira ka na Hitita, na Amorita, na Perisita, na Givita ma na Jebusita. Na raraha iata ka ama ni voravora re nga na kare rakuraku mataro me i ngekê.

⁹O Salomo ki pe tugurira na Isiraelita ke tagara raha vikana ma ka tagara tanga ma hete mangara na mane ni me, na mane ga bêngenira na mane ni me ga tavotavo uga, se igê na kati ni me se igê na hosi.

¹⁰Na 250 na mane ka ura i murita na enoni, o Salomo i tugurira ka tagarahigi na ruma ma na hinua.

¹¹O Salomo ki gurua râ kaniana ka karena na maneraha i Esipito tenia na hinua iana o Tavite tanga na ruma i tagarahia tanga. Ngaia ki tako, ki vi: “Ngaia ki pe araria, vige gâga i ruma raha iana o Tavite na maneraha, suria na agua i oga igê na bokesi na suruheri, ngaia ki apuna.”

¹²O Salomo ki susu tanga na Araha igê na bea ni vogasiha, i bani tagarahia i maana na ruma ni rotu.

¹³Ngaia ki susu surigi na ramata iana o Moise igê na ara ni tangiani raha ni rotu: igê na tangiani ni mamaroha, igê na tangiani raha ni hageha haoru, ma igê na tangiani gi oru raha ngavê i rarona na harisi, i vi, na tangiana raha ni bereti i pe ahunga, na tangiana raha ni hutohutoêa ma na tangaiana raha ni ruhu.

¹⁴Ngaia ki râ surigi nikâ na ramata iana o Tavite o vaemana, matena i hagagaragi na tagaraha igê na ara ni tangiani tangara na mane ni vogasiha ma na raraha iana o Levi, ga tamanira na mane ni vogasiha igê na kiha ma igê na tagaraha iata. Nikâ surigi na ramata iana o Tavite na kariana koro God, ngaia ki hagagaragi na tagaraha iata na apaneni me iata hehegitigi na mane ni anumasiha na ruma ni rotu, hanana ga anumasigi na maanipara hegitigi na ruma ni rotu i na ara ni tangiani.

¹⁵Na mane ni vogasiha ma na raraha iana o Levi nogata ka marupegi maninga na ramata iana o Tavite renigi na kiboru ni ruruguha ma renigi na marâ getigi.

¹⁶O Salomo ki hagahatungigi na ara ni marâ hato i obania vi tagarahigi igê na matena ngekana. Na ara ni tagaraha hato iana ka akê me bâkoro, haganega tenia na matena i haganega igê na tagarahiana na ruma ni rotu mataro me na uhutagana.

¹⁷Hato vikana ma ngaia o Salomo ki râ tanga i Esione Gebere ma i Elote. Ngairerua ka na maanitava i na sugu i Akaba i Etome.

¹⁸Na maneraha o Girama ki hagatorangenigi na haka tanga henira na mane ga toregi na haka ma na mane tagara igê. Ngaira hato ka na mane ni asi. Ngaira ka toregi na haka henira na mane ni asi iana o Salomo tanga i Opire ma ka migiaporo me na 13,500 na kilo na golo tanga na maneraha o Salomo.