Read Kahua 2 SIHONGA 9 Bible Online

2 SIHONGA 9 - Kahua bible

2 SIHONGA 9

¹Na gete i marungia i Seba ki rongo tarohana na maneraha o Salomo. Tahema ngaia ki tavoraha tanga i Jerusaleme, hanana i uhungia renigi na hagatenga, i takusigi vi i bara. Ngaia ki merarâ rako na kariana henira na kamelo, ga hagarutangira renigi na marâ ga unuha na vanuhani, na hê i raha na meni ma na golo rako ngavê. Matena ngaia mo Salomo karu hekarigi, ngaia ki hagatea renigi na hagatenga hato i takusigi.

²O Salomo ki aramigi ngaigi hato. I mareha rârâ ta na marâ ge bara tanga vige ramatenigi.

³Na gete i marungia i Seba ki tarahua, vi o Salomo ki tako mataha ngavê ma ki bâsia na ruma raha i tagarahia ngaia o Salomo.

⁴Ngaia ki bâsigi na ngêra iana o Salomo, na ruma iata na gavumane iana, na tagaraha iata na kariana ma na tuguni iata, na gahu iata na kariana ga toregi me na ngêra tanga, matena i magoto, ma na vogasiha iana i ruma ni rotu. Ngaia ki gasuga ngavê ma ki kone bâraha.

⁵Ngaia ki vi tanga o Salomo, ki vi: “Na tarohamu gê rongoa i pasiku renigo ma renigi na takoha mataha iamu ki monari ngavê.

⁶Inê kê pe tanga monari renia na tarohamu ma i ngekê nga inê kê râ me kê kahu bâsigi re maaku mareku. Na tarohamu gê rongoa ki pe râ bâraha. Na takoha mataha iamu ki teha renia na tarohamu i tarahuê.

⁷Ga babarisi ngavê na enoni i ruma iamu, suria ga oga hagarangigo tare ma ka rongogi tare na tamasinga mataha iamu.

⁸Ge hagarahasia na Araha God iamu! Ngaia ki bani hagabângenia, vi ngaia ki obakoro renigo, suria i kasigo ko maneraha urusia. Suria ngaia ki takuira na Isiraelita na kariana ma ki obanira viga goga igê na ramana tare ki bê ki arâ, tahema ngaia ki kasigo ko maneraha iata, hanana ga marupegi na ramata ma ka goga igê na otoha.”

⁹Ngaia ki tagarenigi tanga na maneraha o Salomo na mahatanga i migirâ me: na 3,600 kilo na golo ma na marâ rako teha ngavê ga unuha na vanuhani ma ki sigini koro, ma na hê i raha na meni. I nago tarana o Salomo ma i hemuri ka mareha rârâ na marâ ge unuha ma ke sigini koro na vanuhani vige koro teha ngavê mangagi na ani i mahatangenigi na geteraha i Seba tanga na maneraha o Salomo.

¹⁰Na mane tagara igê na haka iaterua na maneraha o Hirama ma na maneraha o Salomo ka toregi me na golo tenia i Opire henigi na apinige na bagorani ma na hê i raha na meni.

¹¹Na apinige na bagora o Salomo ki tagarahigi renigi na marara tanga na ruma ni rotu ma tanga na ruma raha iana, ma ki tagarahigi renigi nikâ na ukelele ma na gita ma na marâ vigana tangara na enoni ni tarotaroha. I nago ka pe bani bâsia rârâ na tarana vikana i Juta.

¹²Na maneraha o Salomo ki vatea na geteraha i Seba renigi na ara ni marâ i nungigi, henigi nikâ na mahatanga i barugi renigi na mahatanga iana tanga. Hemuri na geteraha ma na kariana ka aporo tanga i pasita i Seba.

¹³I na ara ni harisi na maneraha o Salomo ka bêbanu me tanga na 20,000 ma ki hitahita râ na kilo na golo,

¹⁴henigi na ani ga bêbanu me tenira na mane ga hagavuri ma tenira na mane ga hagavarahagi na haga henira na enoni i tagua hagatê. Ngaira na maneraha i Arabia ma na mane ga bâsurigi na apaneni hehegitigi i Isiraele, ngaira ka toregi me nogata na siliva ma na golo tanga.

¹⁵Na maneraha o Salomo ki haribona, ka tagarahigi na 200 na bêata raha ma na 300 na bêata sisite, ga abagi renigi na bahitani na golo: na 6 kilo na golo tanga na ani raha ma na 3 kilo na golo tanga na ani sisite. Ngaia ki nakagi na bêata hato ngegana i rarona na ruma raha iana ga hêtana vi ‘ruma na vapuni ni Libanone’.

¹⁷Na maneraha ki haribona nikâ ka tagarahia na atohana raha tanga ngaia marena. Tagua ka parua renigi na apapagani na rivota na elepante ma tagua ka taruhia renigi na golo taranina.

¹⁸Na atohana ngekana ki na tavo uga gi ono bêtagere tanga. Na uguha na golo ki puru henia na atohana ngekana. Na atohana ki tonga renirerua na pangapanga ni rima gi rua. Na nunuterua na laione karu ura hetangenia na atohana.

¹⁹I na ara ni bogoniheri na tavo uga ngegana ka oga igê na nunuta na laione. Ngaira hato haku na laione ka 12. I mareha rârâ ta na maneraha, vige nahunia na atohana vige manga ngekana.

²⁰Na kâkâ hato ni tonoha iana na maneraha o Salomo ka na golo, mareha vi na siliva, suria igê na matena iana o Salomo ka takusia vi na siliva ki na ataka ma na marâ.

²¹O Salomo ki nahunigi rako na haka ni toraha, ga araria na avoatara. Ngaira ka arâ haku henigi na haka iana na maneraha o Girama. Ngaira ka huhura ka arâ ma ka aporo me i murini na ara ni harisi gi oru ma ka migiaporo me na golo, na siliva, na rivota na elepante henira na monki, na ani raha ma na ani sisite.

²²Na maneraha o Salomo ki ruruguha ma ki tako mataha teha ngavê teharira na ani getera hato na maneraha i maveta.

²³Ngaira hato ka rongorongo tarata i pasina, hanana ga rongoa na takoha mataha, God i haganahunia renia.

²⁴Na ara ni hitangita ka migirâ me tanga na mahatanga: na marâ na siliva, na golo, na tuguni borahu, na tangaruha, na marâ ni hagamuani na ngêra, na hosi ma na tonki. Na tarana ngekana ki akê me tare i na ara ni harisi.

²⁵Na maneraha o Salomo ki nahunigi nikâ na 4,000 na ruma tanga i nakanaka igê na kati ni me ma na hosi. Ngaia ki nahunira na 12,000 na mane ni me igê na hosi. Tani ka oga i Jerusaleme ma tani ka oga surigi na hinua raha getigi.

²⁶Ngaia ki marungira na ara ni maneraha hato, haganega tenia i ve i Uparatesi ki râ ki tariha i Pilisitia ma igê na pereperegana i Esipito.

²⁷Matena i maneraha igê o Salomo na siliva i Jerusaleme ki manga ma na taigeni, ma na hata ka rako ngavê mangagi na apinige na fiki igê na bena i Sepela.

²⁸O Salomo ki vurira na hosi i Misiraimi ma tenigi na ara ni agua getigi i maveta.

²⁹Na sihonga hato getigi renia na ogaha hagenani iana o Salomo ka bani segegi so igê na buka na sihonga renia o Natane na poropete, ma igê na buka na tamasinga iana o Agia na poropete i Silo, ma igê na buka na maruteha iana o Ieto na poropete. Na buka ngegê na buka na maruteha iana o Ieto na poropete. Na buka ngegê ka tamasi nikâ renia na matena o Jerobeama ki maneraha i Isiraele.

³⁰O Salomo ki oga i Jerusaleme ma ki marungia i Isiraele hagenani surigi na harisi tangahuru ge he.

³¹Ngaia ki me ma ka bagia i hinua iana o Tavite ma o Regabeama o karena ki maneraha urusia.