Read Kahua ESERA 1 Bible Online

ESERA 1 - Kahua bible

ESERA 1

¹Igê na harisi hagenago iana o Siro i maneraha igê i Pesia, na Araha ki hagamonaria na tamasinga iana i harana o Jeremia na poropete. Ngaia ki katoa o Siro, ki segea na bonasiha ma ki tokorenia, hanana ga tomania igê na ara ni hinua hato i marupegi. Ngaia ki haribona vikê:

²“Inê o Siro na maneraha i Pesia kê haribona. Na Araha God i raha teha ngaia ki bani kasiê, kê marungia na maveta hagenani, ma ki bani ateê, hanana gê tagarahia tanga na ruma ni rotu i Jerusaleme i Juta.

³God ke ngahisigamu igamu hato na kariana. Mu arâ nga i Jerusaleme ma kamu tagarahia igê na ruma ni rotu iana na Araha, na God iata na Isiraelita, na God ga rahesia i Jerusaleme.

⁴Manga vi na hitangita na kariana ga henahuraura me, ma ka obania na hetamaniha hanana viga aporo, na enoni i ruguhana na arahanga iaku ki tuguhira, viga tamanira. Ngaira ka vatera nga renigi na siliva ma na golo, na nahuninga ni ruma ma na totoha ni toraha henigi na mahatanga tanga ga tagarenigi tanga God i ruma ni rotu i Jerusaleme.”

⁵Hemuri na bêni na apaparaha igê na varo ninuni iaterua hegitigi o Juta ma o Benamino ma na mane ni vogasiha ma na mane ni hagarahenga ma ngaira hato na ani God i hagatako obata, hanana viga arâ ka tagarahia aporo na ruma ni rotu iana na Araha i Jerusaleme, ngaira ka hagarurugu.

⁶Na tamata hato ga merabasigu hetanga ka tamanira renigi na marâ rako: na marâ na siliva, na golo, na nahuninga ni ruma, na totoha ni toraha ma na marâ getigi i raha na meni, ma na mahatanga tanga na ruma ni rotu.

⁷Na maneraha o Siro ki vatera aporo na apira ma na kâkâ, i bani henahuraugi na maneraha o Nebukanesare tenia na ruma ni rotu i Jerusaleme ma ki bani nakagi igê na ngêsu iata na harasina.

⁸Ngaia ki tagarenigi tanga o Miteretata na mane i bâsuria na kiboru ni haga iana na maneraha. O Miteretata ki segegi so na marâ hato ngegana tanga o Sesebasare, i bâsuria i Juta.

⁹Ngaia ki segegi so vikê: [na apira na golo tanga na vogasiha] — 30 [na apira na siliva tanga na vogasiha] — 1,000 [na ani getigi na apira] — 29 [na ani sisite na apira na golo] — 30 [na ani sisite na apira na siliva] — 410 [na ani getigi na marâ ni hagarahenga] — 1,000

¹¹Ngaigi hato henigi râ nikâ tani ka vora na 5,400 na apira na golo ma na siliva ma na ani getigi na marâ ni hagarahenga. O Sesebasare ki migirâ, matena ngaia ma na enoni getera ga bani henahuraura ka râ tenia i Babilone tanga i Jerusaleme.