Read Kahua ESERA 3 Bible Online

ESERA 3 - Kahua bible

ESERA 3

¹Igê na pita na hageha na Isiraelita hato ga bani aporo me, ngaira ka bani ogasigi na hinua iata. Hemuri ngaira hato ka haku i Jerusaleme.

²O Josua karena o Josataka ma na tamana na mane ni vogasiha ma o Serubabele karena o Sealitiele henira na goana na bêni na hagosi ninuni, ngaira ka tagarahia aporo na bea ni vogasiha tanga God iata na Isiraelita, hanana ngaira ka susu igê surigi na ramata igê na buka iana o Moise na kariana koro God.

³Henaka ngaira, na ani ga aporo me tenia i Babilonia ga bani henahuraura tanga ka magutenira na enoni ga ogasia i Juta, ma ngaira ka tagarahia aporo na bea ni vogasiha igê na bani atohana i nago. Hemuri ngaira ka haganega aporo ka susu igê i na ara ni mavoraro ma i na ara ni manurahi surigi na ramata.

⁴Ngaira ka hagahigasigi na tangiani raha ni rotu surigi na ramata. I na ara ni tangiani ngaira ka vogasi, na vogasiha i ararigi na ara ni tangiani hehegitigi.

⁵Ngaira ka susu igê na tangiani i tuguhira viga susu igê, ma igê na tangiani raha na hageha haoru, ma igê na tangiani hato getigi tanga ga hakuhaku igê, hanana ga rahesia na Araha, ma i na ara ni mateni ta na enoni i takusia marena vi arâ, hanana i vogasia na Araha.

⁶Henaka na enoni ka mamêngara vige haganega ke tagarahia aporo na ruma ni rotu, ma ngaira ka bani haganega ka susu tanga na Araha igê na tangiana hagenago igê na pita na hageha.

⁷Na enoni ka haku haga, hanana ga vurira re na mane ga tahetahe na hê ma na mane totora ruma. Ngaira ka nakagi haku na ngauha, na marâ ni tonoha ma na oile ni olive ma ka kasigi râ i hinua i Taire me Sitone, ka hohoro renigi na apinige na bagora i Libanone. Ngaira ka hagataregi i asi tanga i Jopa. O Siro na maneraha i Pesia ki hagamarumu tangara ka kato vikana.

⁸Hoi, igê na ruata na hageha igê na harisi i murina ga bani aporo me tanga na agua tanga na ruma ni rotu, ngaira ka haganega ka tagara. O Serubabele, o Jesua ma na tamaterua na mane ni hagarahenga ma na mane ni vogasiha, ma na enoni hato getera, ga bani aporo me tanga i Jerusaleme tenia i Babilonia kaniga tagara haku. Ngaira ka kasira na mane ni hagarahenga ga tonga na harisi iata tangahuru gi rua ma ki matara, hanana ga bâsuria na tagaraha tanga ga tagarahia aporo na ruma ni rotu.

⁹O Jesua na mane ni hagarahenga ma ngaira o karena ma na goana, ma o Katamiele ma ngaira o karena na apaparaha iana o Hotavia, ngaira ka haku ka bâsuria na tagaraha ga tagarahia aporo na ruma ni rotu. Na mane ni hagarahenga igê na apaparaha iana o Genatata ka tamanira.

¹⁰Matena na mane ka haganega ka ririhêna na angisi ruma ni ruma ni rotu, na mane ni vogasiha ga tuguni renigi na tuguni iata, ngaira ka ura igê na atohata henigi na ahuri i rimata, ma na mane ni hagarahenga na apaparaha iana o Asapa ka ura i ngekana henigi na marâ ni tarotaroha. Ngaira ka hagarahasia na Araha surigi na ramata iana o Tavite.

¹¹Ngaira ka ki ka hagarahasia na Araha ma ka rugurugua na ki, ka ki vikê: “Na Araha ki koro.” Na takuiha tangara na Isiraelita ki asa vige page hato.” Na enoni hato ka ngerengere raha ngavê ka visia raha na Araha, suria na tagarahiana na angisiruma na ruma ni rotu ki bani haganega.

¹²Rako na gemêa na mane ni vogasiha, na mane ni hagarahenga ma na bêni na apaparaha ga bani bâsia na ani hagenago na ruma ni rotu, ngaira ka angiangi bâraha, matena ga boretenira na mane ga ririhêna na angisiruma na ruma ni rotu. Ma na ani getera ka ngengere raha, suria ga vagevage.

¹³I bara ta na enoni vige girarara na ani ga ngerengere, suria ga vagevage, ma na ani ga angiangi, suria na ringeta ki rongo raha teha ngavê ki râ hagatê.