Read Kahua ESERA 4 Bible Online

ESERA 4 - Kahua bible

ESERA 4

¹Na merongata na raraha iaterua o Juta ma o Benamino ka rongo, vi na ani ga bani aporo me tenia i Babilonia, ka tagarahia aporo na ruma ni rotu iana na Araha God iata na Isiraelita.

²Vikê ngaira ka râ ka bâsira o Serubabele ma na bêni na apaparaha ma ka vi: “Nakagami ke tage tagarahia aporo na ruma ni rotu. Igami ma igamu kaniga rahesia ma na God gi tage, ma igami kami bani vogasia haganega tenia na matena o Esaratone na maneraha i Asiria i hagatorangenigami me ikê kami oga ikê.”

³O Serubabele, o Josua ma na bêni apaparaha ka vi tangara, ka vi: “Igami kami pe obanigamu vigamu tamanigami igê na tagarahiana aporo na ruma ni rotu tanga na Araha God iamami. Igami kami tagarahia aporo so maremami, manga i bani bonasigami renia o Siro na maneraha i Pesia.”

⁴Hemuri na enoni ga bani oga i Juta ka uhungia, viga hagamarusi apeta na Siu ma ka hagamagusira ma ka ura pusira, vi siana ka tagarahia aporo na ruma ni rotu.

⁵Nikâ ngaira ka vatevatera na mane igê na gavumane i Pesia, hanana ga hagabarasira na Siu. Ngaira ka kato vikana igê na matena hagenani iana o Siro i maneraha suria ma nikâ suria na matena iana o Tario i maneraha igê.

⁶Igê na haganegahana na matena iana na maneraha o Seresese na merongata na enoni ga oga i Juta me Jerusaleme, ngaira ka sege ka hagagege renira.

⁷Igê na matena o Ataseresese i maneraha i Pesia, o Bisilama, o Miteretata, ma o Tabele ma na tamata ka sege tanga na maneraha. Ngaira ka sege igê na tamasinga iata na Aramea ma ka sege manga vi ngaira ka na Arameo.

⁸Hemuri o Rehumu i gavumane i na apanena ngekana, ma o Simisai na mane ni segesegeha iana, ngairerua karu sege tanga o Ataseresese renia i Jerusaleme, karu vi:

⁹“Igami, inê o Regumu na gavumane i na apanena ikê, ma o Simisai na mane ni segesegeha iaku, ma na tamamamirua, ma na mane ni hagaotonga, ma igami na enoni hato getera igê na gavumane, mi râ me hagenago tenigi i Tiripoli, i Sipare, i Ereke, i Babilone me Susane i Elama,

¹⁰henira na enoni getera o Asanapare, i rongo raha na atana ma ki raramohaga, ki tavora hura tenigi na hinua iata ma ki kasira ka oga i hinua i Samaria ma i ta na hinua getigi i na apanena kereso i ve Uparatesi.”

¹¹Na segeha ki râ vikê: “Tangago maneraha o Ataseresese, igami na kariamu, na gavumane iamu i na apanena kereso i ve i Uparatesi, igami kami sege tangago.

¹²“Maneraha, igami kami obania, vigami hagarongogo renira na Siu ga râ me ikê tenigi na apanini getigi iamu ma ka ogasia i Jerusaleme ma ka tagarahia aporo i Jerusaleme, na hinua i merongasigo ma ki urapusigo tare. Ngaira ka bani haganega ka tagarahigi aporo na para ni hinua ma ka sugi hatungigi.

¹³Maneraha, manga ga tagarahia aporo hato na hinua ngekana ma ka tagarahigi hato na para ni hinua, hoi, na enoni ki asa vige page vuria nikâ na takesi. Maneraha, vikana na haga iamu ga bêbanu me ka page soso.

¹⁴Hoi maneraha, suria igami kami tohe, vigami kami tototo surigo, igami kami pe obania, vigami bâbâ purua ma. Tahema igami kami takusia,

¹⁵vi igo ku naka ke gari igê na segesegeha iata na êvarimami. Manga go katokato vikana, igo ko page tarahua, vi na hinua ngekana ki bani guguruga me tare ma ki haganega me tenia i kerevê noga. Ngaia ki urapusira na maneraha ma na gavumane iata igê na apaneni. I bara vige hagaotora na enoni ngegana. Tahema ga bani ruhuruhua na hinua.

¹⁶Vikê igami kami takusia, vi manga ga tagarahigi hato na para ni hinua ikê, igo maneraha, i page bara tangago, vigu marungia na apanena kereso i ve i Uparatesi.”

¹⁷Na maneraha ki sege ki arami bê aporo vikê: “Tangagamu, igo Regumu na gavumane iaku i na apanena ngekana, ma igo Simisai na mane ni segesegeha ma ngaira na tamamirua ga oga i Samaria ma i hinua getigi i na apanena kereso i ve Uparatesi, gê visia, mu mauri koro.

¹⁸“Na leta mu segea me tangê, ka bani urusia igê na tamasinga iaku ma ka bani tomania tangê.

¹⁹Inê kê bani naka, hanana viga garigari igê na segesegeha, ma ki monari, ngaira ka tarahua, vi haganega me tenia i nago kerevê noga i Jerusaleme ki urapusira tare na maneraha ma ki aharêsia na enoni ga guguruga ma ka oga sutaga.

²⁰Na maneraha raramohaga ka oga i ngekana i nago ma ka marungia na apanena hagenani kereso i ve i Uparatesi. Ngaira ka totora takesi ma na haga, ga bêbanu me.

²¹Tahema mu bonasira na mane ngegana, siana ka tagarahia aporo na hinua mataro me kê hagamarumu tangara.

²²Mu rêra pusira ototo râ nga, i era ma ka hagamesia na arahanga iaku nikâ.”

²³Matena ga tomania hato tangara o Regumu, o Simisai ma na tamaterua na leta i segea na maneraha o Ataseresese, ngaira ka hatani râ i Jerusaleme ma ka hagabarasira na Siu, hanana siana ka tagarahia aporo na hinua.

²⁴Na Siu ka naka vê noga na tagarahiana na ruma ni rotu, ki oga rârâ mataro me na ruata na harisi iana o Tario i maneraha suria i Pesia.