Read Kahua ESERA 5 Bible Online

ESERA 5 - Kahua bible

ESERA 5

¹I na matena ngekana na poropete gi rua o Hagai mo Sakaria karena o Ito, karu tamasi urusia God iata na Isiraelita tangara na Siu ga oga i Juta me Jerusaleme.

²Matena o Serubabele karena o Sealitiele, ma o Jesua karena o Josataka karu rongorerua, garu tamasi vikana, ngairerua karu haganega nikâ karu tagarahia aporo na ruma ni rotu i Jerusaleme, ma na poropete gi rua ngegana karu tamanirerua.

³O Tatenai i bâsuria na apanena kereso i ve i Uparatesi, ma o Setare Bosenai ma ngaira na tamaterua na gavumane ka râ me ototo nga i Jerusaleme ma ka hagate, ka vi: “Ti kani hagamarumu tangagamu, kamu tagarahia na ruma ni rotu ikê ma kamu nakagi na marâ i rarona?”

⁴Ngaira ka hagate renigi nikâ na atata na mane hato ga hetamani igê na tagarahiana na ruma ni rotu.

⁵Ma God ki ngahisira na enoni raha na Siu ma na gavumane ni Pesia ka naka viga nakara mavê, mataro me na maneraha o Tario ki barua aporo na leta iata tanga.

⁶Na leta iana na gavumane ni Pesia ga kasia râ tanga na maneraha o Tario, ki manga ikê:

⁷“Tangago maneraha o Tario. Na marapeha ke aharêsigo.

⁸Maneraha, i araria, go girara, vi igami kami râ i na apanena i Juta, ma kami tarahua, vi na ruma ni rotu iana God i raha ka tagarahia aporo renigi na bagahê raha ma na gogohane igê na para na apê. Ngaira ka tagarahia maninga ma na tagaraha ki tavoraha bâkoro.

⁹Igami kami hagatera na enoni raha, vi o ti kani hagamarumu tangara ka tagarahia aporo na ruma ni rotu ma ka nakagi na marâ igê.

¹⁰Igami kami hagatera nikâ renigi na atata, hanana mi hagarongogo renira na ani ga bêngenia na tagaraha ngekana.

¹¹Ngaira ka arami, ka vi: “Igami ka na kariana God, i hagavorarerua na vavearo ma na ano. Igami kami tagarahia aporo na ruma ni rotu, ta na maneraha raramohaga i Isiraele i bani tagarahia me i kerevê noga ma ki nakagi igê na marâ.

¹²Ma suria na êvarimami ka hagamangaria na Araha God, tahema ngaia ki naka o Nebukanesare na maneraha i Babilonia na raraha iata na maneraha i Kalatea, ki henahuraura. Ngaia ki ruhuruhua na ruma ni rotu ma ki henahuraura na enoni tanga i Babilonia.

¹³Hemuri igê na harisi hagenago iana na maneraha o Siro i marungia i Babilonia, o Siro ki haribona, ka tagarahia aporo na ruma ni rotu.

¹⁴Ngaia ki tagarenigi aporo na marâ tanga na ruma ni rotu, ga tagarahigi renigi na golo ma na siliva, o Nebukanesare ki bani toregi tenia na ruma ni rotu i Jerusaleme ma ki bani nakagi igê na ngêsu iata na harasina i Babilone. Na maneraha o Siro ki tagarenigi na marâ ngegana tanga ta na mane ga hêtana vi o Sesebasare, i kasia ki urusia ki bâsuria i Juta.

¹⁵Na maneraha ki vi tanga, ki migirâ ma ki nakagi aporo tanga na ruma ni rotu i Jerusaleme ma ki tagarahia aporo na ruma ni rotu igê na bani atohana.

¹⁶Vikê o Sesebasare ki râ me ma ki ririhêna na angisiruma. Na tagarahiana na ruma ni rotu ki haganega tenia na matena ngekana mataro me i ngekê, ma ki mamênga vige hatohato.”

¹⁷Hoi, maneraha, manga go takusia vi i koro, hoi, go haribona, ka garigari igê na segesegeha iata na maneraha i Babilone, manga vi na maneraha o Siro ma ki hagamarumu, ka tagarahia aporo na ruma ni rotu i Jerusaleme, se mareha. Hemuri ko hagarongogami renia na obaniha iamu renia.”