Read Kahua ESERA 6 Bible Online

ESERA 6 - Kahua bible

ESERA 6

¹Hoita, na maneraha o Tario ki haribona, ka gari igê na segesegeha iata na maneraha ga nakagi ki oga i Babilone.

²Ma ka pe tarahua i ngekana, ma ka tarahua hete i hinua i Ekebatana i na apanena i Metia na rumina na pepa, ga sege vikê igê:

³“Igê na harisi hagenago iana na maneraha o Siro, ngaia ki haribona, vi na ruma ni rotu i Jerusaleme ka tagarahia aporo, hanana ga vogasi ma ka susu igê. Na ruma ni rotu ki akê nga na 30 mita ma ki aberabera na 30 mita nikâ.

⁴Na apê ka tagarahigi nga vikê. I murini na ara ni harahara gi oru na hê ka nakagi igê na gogohane, hanana ma ki akê. Na haga ni tagarahiana na ruma ni rotu ka arâ me tenia na kiboru ni haga iana na maneraha.

⁵Nikâ na ara ni marâ tanga na hagarahenga ga tagarahigi renigi na golo ma na siliva, na maneraha o Nebukanesare i bani toregi tenia na ruma ni rotu i Jerusaleme tanga i Babilone, ka hagapurusigi nga me tangagi na bani atohani i ruma ni rotu i Jerusaleme.”

⁶Hemuri na maneraha o Tario ki barua vikê na leta iata: “Tangagamurua o Tatenai go bâsuria i na apanena kereso i ve i Uparatesi, ma igo o Setare Bosenai ma tangara na tamamirua na gavumane kereso i Uparatesi. Mu nakara mavê, ke tagarahia aporo na ruma ni rotu.

⁷Siana kamu hagabarasira. Mu nakara na mane i bâsuria i Juta ma na enoni raha na Siu, ke tagarahia aporo na ruma ni rotu iana God igê na bani atohana.

⁸Inê kê bonasigamu, hanana mu tamanira ka tagarahia aporo. Na meni na ara ni marâ ni tagarahiana na ruma ni rotu mu vurigi ototo râ nga renigi na haga na takesi tanga na maneraha ga vurigi i kereso i Uparatesi, hanana siana ki arâ tugutuguaga na tagaraha.

⁹Na ara ni marâ na mane ni hagarahenga ga obanigi tanga ga susu renigi tanga na Araha God, mu vatera nga i na ara ni tangiani: na bêhâgata na puruka mane, na sipi mane se na karena sipi, se na koni, na solo, na vaini se na oile na olive.

¹⁰Mu katokato nga vikana, hanana ngaira ka girara ga hagakoro obana God na Araha renigi na vogasiha iata, ma ka nungia, ke korokoro tangagami, inê ma ngaira o kareku.

¹¹Inê kê haribona nikâ, manga vi na enoni ma ki pe arâ suria na ramata ngekê, mu raragea râ nga na gogohane na apinige tenia na ruma iana, mu tahea ki masi ta bogona, kamu hagêrasia ma kamu sugenia na apena igê. Na ruma iana kamu ruhuruhua nga.

¹²Na God, i atea i Jerusaleme ki vora re na agua ga rahesia igê, ke hatungia na anima na maneraha se na agua, i pe arâ suria na ramata iaku ikê ma ki uhungia vi ruhuruhua na ruma ni rotu i ngekana. Inê o Tario kanigê ramata vikana. Na enoni hato ki tuguhira, viga arâ suria nga.”

¹³Hoi, o Tatenai i bâsuria na apanena kereso i ve Uparatesi, mo Setare Bosenai ma na tamaterua na gavumane ka râ suria nga na ramata iana na maneraha.

¹⁴Na enoni raha iata na Siu ka tavoraha maninga igê na tagarahiana na ruma ni rotu. Na poropete gi rua o Hagai ma o Sakaria karu hagaramonira. Ngaira ka tagarahia ki hato na ruma ni rotu, manga hanana na God iata na Isiraelita, ma o Tario ma o Ataseresese na maneraha i Pesia, ga bani bonasira renia.

¹⁵Ngaira ka hatungia na ruma ni rotu igê na oruta na tangiana igê na hageha na Atare igê na onota na harisi iana o Tario i maneraha surigi.

¹⁶Hemuri na Isiraelita, na mane ni hagarahenga, na mane ni vogasiha ma na enoni hato ga bani aporo me tenia i Babilonia, ka hagapua na ruma ni rotu ma ka vagevage.

¹⁷Igê na hagapuana na ruma ni rotu ngaira ka vogasi igê renira na tangarê ge he na kareta sipi, ma na goti na tangahuru matarerua tanga na vogasiha ni bonoteniha ni tasi tonganigi na ara ni varo ninuni iana o Isiraele.

¹⁸Ngaira ka hagarêra nikâ na mane ni hagarahenga ma na mane ni vogasiha tangagi na tagaraha i ruma ni rotu i Jerusaleme surigi na ramata igê na buka iana o Moise.

¹⁹Na enoni ga bani aporo me tenia i Babilonia ka hagarahasia na paseka igê na tangahuruta matare he na tangiana igê na hageha hagenago igê na harisi haoru.

²⁰Na ara ni mane ni hagarahenga ma na mane ni vogasiha ka bani hagamatarotarora mareta ma ka matarotaro surigi na ramata na rotu. Na mane ni vogasiha ka nahuira na sipi na paseka tangara na enoni hato ga bani aporo me tenia i Babilonia, tangara na mane ni hagarahenga ma tangara ngaira so mareta.

²¹Na Isiraelita hato ga bani aporo me tenia i Babilonia ka ngêra na sipi na paseka ma ngaira nogata na enoni hato igê na agua ga bani kasigi râ na tauhata na enoni ahuroto ma ka rahesia na Araha God iata na Isiraelita.

²²Surigi na tangiani gi pi ngaira ka hagarahasigi na tangiani raha ni bereti i pe ahunga ma ka vagevage. Ngaira ka vagevage ngavê, suria na Araha ki katoa na maneraha i Asiria ki koro tangara ma ki tamanira igê na tagarahiana aporo na ruma ni rotu iana God iata na Isiraelita.