Read Kahua ESERA 7 Bible Online

ESERA 7 - Kahua bible

ESERA 7

¹Rako na harisi i muri, matena o Ataseresese ki maneraha i Pesia, ki oga i na matena ngekana na mane o Esera na atana. Ngaia ki tomanira bê aporo vikê na êvarina tanga o Aroni na mane ni vogasiha i teha: o Seraia ki apara o Esera, o Asaria ki apara o Seraia, o Gilikia ki apara o Asaria,

²o Salumu ki apara o Gilikia, o Satoke ki apara o Salumu, o Agitube ki apara o Satoke,

³o Amaria ki apara o Agitube, o Asaria ki apara o Amaria, o Meraiote ki apara o Asaria,

⁴o Seragia ki apara o Meraiote, o Usi ki apara o Seragia, o Buki ki apara o Usi,

⁵o Abisua ki apara o Buki, o Pinegasi ki apara o Abisua, o Eleasare ki apara o Pinegasi, karena o Aroni.

⁶O Esera ki na mane ni hagesuringa raha. Ngaia ki aitangisigi ngavê na ramata, na Araha God iata na Isiraelita i bani vatea o Moise renigi. Suria na Araha God iana ki koro tanga o Esera, tahema na maneraha ki aganarigi na ara ni nungiha iana. Igê na pita na harisi o Ataseresese i maneraha surigi, o Esera ki tavoraha tenia i Babilonia tanga i Jerusaleme henira na ruruha na Isiraelita. I berarogata ka oga na mane ni hagarahenga, ma na mane ni vogasiha, na mane ni kiha i ruma ni rotu ma na mane ni tagaraha.

⁸Ngaira ka pania i Babilonia igê na tangiana hagenago igê na hageha hagenago, ma ka ata i Jerusaleme igê na tangiana hagenago igê na rimata na hageha, suria God ki tamanira.

¹⁰O Esera ki bani naka marena ki hagesuringenigi na ramata iana na Araha, ki marupegi ma ki hagesurira na Isiraelita renigi na ramata ma na hagesuringa hato iana na Araha.

¹¹Na maneraha o Ataseresese ki vatea o Esera na mane ni vogasiha ma ni hagesuringa raha na pepa ni ramoha. O Esera ki aitangisigi ngavê na ramata ma na hagesuringa na Araha i bani vatera na Isiraelita renigi. Na pepa ni ramoha ki vi vikê:

¹²“Tangago o Esera na mane ni vogasiha go aitangisigi na ramata iana God na Araha.

¹³Inê o Ataseresese na maneraha, inê kê haribona vikê. Inê kê hagamarumungenira na Isiraelita hato, na mane ni hagarahenga ma ni vogasiha suria na apanena iaku hagenani, hanana ga arâ henigo tanga i Jerusaleme, manga ga obania.

¹⁴Igami, inê ma na vere pi na mane ni hagaotonga iaku, kami hagatorangenigo, ko arâ bâbâ renigi na ogaha iata na enoni i Jerusaleme me Juta, manga vi ngaira ma ka marupegi na ramata iana God iamu se mareha, suria ngaia ki bani atego tanga na tagaraha ngekê.

¹⁵Gu migirâ nga na votovoto na golo ma na siliva, igami, inê ma na mane ni hagaotonga iaku, kami obania, vigami tagarenigi tanga na God iata na Isiraelita, suria na ruma ni rotu iana ki oga i Jerusaleme.

¹⁶Go migirâ nga nikâ na siliva ma na golo hato go tavo suria na apanena i Babilonia ma na votovoto na Isiraelita ma na mane ni hagarahenga ka tagarenigi tanga na ruma ni rotu iana na God iata i Jerusaleme.

¹⁷Gu hagaotoa maninga nga na haga ikê ma ko vurira re na puruka mane, na sipi mane, na kareta na sipi, na koni ma na vaini ma ko vogasi renigi igê na bea ni vogasiha i ruma ni rotu i Jerusaleme.

¹⁸Na siliva ma na golo ga hita râ, ki oto ma tangago, vigo kasikasi re na anima na marâ igo ma na tamamu na Isiraelita mu obania suria na obaniha iana na God iami.

¹⁹Gu tagarenigi nga tanga God i Jerusaleme na ara ni marâ tanga na hagarahenga ga bani vatego tanga na rotuha i ruma ni rotu.

²⁰Na anima na marâ getea go obania tanga na ruma ni rotu, i koro, ko vuria renia na haga i arâ me tenia na kiboru ni haga iana na maneraha.

²¹Inê kê bonasigamu na mane hato mu bâsurigi na haga i na apanena kereso i ve Uparatesi, hanana mu tavogi nga tanga o Esera na mane ni vogasiha ma ki aitangisigi na ramata iana God na Araha, na anima na marâ i nungigamu renia,

²²i tariha ma igê na 3,000 kilo na siliva, na 500 paike na koni, na 1,375 lita na vaini, na 1,375 lita na oile ni olive, ma na solo hato i obanigi.

²³Na ara ni marâ God na Araha ki obania tanga na ruma ni rotu, mu katogi maninga manga hanana, i era ma ki mangariaga tangê se tangara na ani ga page maneraha urusiê.

²⁴Siana kamu tavotavo takesi tenira na mane ni hagarahenga ma ni vogasiha, na mane ni kiha, na mane ni anumasiha, na mane ni tagaraha, se vi tenira na anima na enoni ga tagara i ruma ni rotu ngekana.

²⁵Igo Esera, gu hagabângenia nga na takoha mataha God iamu i bani vatego renia, matena go atera na gavumane ma na mane ni hagaotonga, hanana ga bâbâsurira na enoni hato kereso i ve i Uparatesi, na enoni ga râ surigi na ramata iana na God iamu. Na enoni ga pe giraragi na ramata, i koro, ko hagesurira renigi.

²⁶Na enoni, i pe marupegi na ramata iana na God iamu se vi na ramata iana na gavumane go hagaitangia ototo râ nga. Ga nahuia ki meme, se ga kasia hagatê i tagua, se ga taugi tenia na nahuninga iana, se ga kasia i ruma ni hagaitangiha.”

²⁷O Esera ki vi: “Ge hagarahasia na Araha God iata na êvarika. Ngaia ki katoa na maneraha, ki hagahigasia na ruma ni rotu iana na Araha i Jerusaleme igê na tarana ngekê.

²⁸Ngaia ki katora na maneraha ma na mane ni hagaotonga iana ma ngaira hato na enoni raha igê na gavumane iana ka korokoro tangê. Na Araha God iaku ki bani hagaramoniê ma inê kê girara gê hagaharora rako na bêni na apaparaha iata na Isiraelita, hanana ga aporo heniê.”