Read Kahua ESERA 8 Bible Online

ESERA 8 - Kahua bible

ESERA 8

¹Igê ka na atata na bêni na hagosi ninuni, ga bani henahuraura tanga i Babilone ma ka aporo me i Jerusaleme heniê o Esera, matena i maneraha igê o Arataseresese, kani igê:

²o Geresome tenia na hagosi ninuni iana o Pinegasi; o Taniele tenia na hagosi ninuni iana o Itamare; o Gatusi tenia na hagosi ninuni iana o Tavite ma o karena o Sekania; o Sekaria tenia na hagosi ninuni iana o Parosi henira na 150 na mane tenia na hagosi ninuni iana, ga oga na atata igê na buka ni apaparaha; o Eliehoenai karena o Seragia tenia na hagosi ninuni iana o Pagata Moaba henira na 200 na mane; o Sekania karena o Jagasiele tenia na hagosi ninuni iana o Satu henira na 300 na mane; o Ebeti karena o Jonatane tenia na hagosi ninuni iana o Atini henira na 50 na mane; o Jesaia karena o Atalia tenia na hagosi ninuni iana o Elama henira na 70 na mane; o Sebatia karena o Mikaele tenia na hagosi ninuni iana o Sepatia henira na 80 na mane; o Obatia karena o Jegiele tenia na hagosi ninuni iana o Joaba henira na 218 na mane; o Selomiti karena o Josipia tenia na hagosi ninuni iana o Ban(...)

¹⁵Inê o Esera, kê hagahakura na enoni hato ngegana hagarangia na ve i arâ tanga na hinua i Ahava ma kami tênga i ngekana surigi na tangiani gi oru. Inê kê tarahua, vi na mane ni vogasiha ka oga i berarogata ma ka mareha rârâ vi na mane ni hagarahenga.

¹⁶Tahema inê kê unira me na bêni gi siva na hagosi ninuni igê: o Eliesere, o Ariele, o Semaia, o Elenatane, o Jaribi, o Natane, o Sekaria, o Mesulama henirerua o Joiaribi mo Elenatane, garu mane ni takoha mataha.

¹⁷Inê kê hagatorangenira tanga o Ito, i raha tangara na mane ni hagarahenga i hinua apuna i Kasipia, hanana ga nungira ngaia ma na tamana na mane tagara i ruma ni rotu, hanana ga kasira me na mane ga agana viga tagara tanga God i ruma ni rotu.

¹⁸Suria na hetamaniha iana God, ngaira ka kasia me tangagami o Serebia na mane i tako mataha ma ki mane ni hagarahenga tenia na hagosi ninuni iana o Magali, henira na 18 nikâ na mane: tani o karena ma tani o goana.

¹⁹Ngaira ka kasirerua me nikâ o Gasabia mo Jesaia tenia na hagosi ninuni iana o Merari, henira na 20 nikâ na mane: tani o kareterua ma tani o goaterua.

²⁰Ma henira ngaira nikâ na 220 na mane tagara i ruma ni rotu. I nago na maneraha o Tavite ma na meraha ka bani kasira na êvarita ka tamanira na mane ni hagarahenga. Na atata ga bani segegi so.

²¹I ngekana igê na ve i arâ tanga i Ahava, inê o Esera kê haribona, vi igami hato kami harihari ma kami ruhigami maremami i maana God iamami ma kami nungia, hanana i bêngenigami igê na raoha iamami ma ki anumasigami, igami ma na karemami ma na nahuninga hato iamami.

²²Inê kê maki manga vigê nungia na maneraha renira na mane ni me igê na hosi, hanana ge anumasigami tenira na merongamami igê na râha iamami, suria gê bani vi tanga, vi God iamami ki korokoro tanga na anima na enoni i hagêguritogo renia, ma ki usisitenia ma ki hagaitangia na anima na enoni i murisigea.

²³Tahema igami kami harihari ma kami avarasia God, hanana i ngahisigami. Ma ngaia ki aganarigi na avarasiha iamami.

²⁴Inê kê atera na 12 na mane ni vogasiha henirerua o Serebia ma o Gasabia henira na 10 na mane ni hagarahenga.

²⁵I maata na mane ngegana inê kê hagararingenigi na higahigani na siliva, na golo ma na marâ getigi, na maneraha, na mane ni hagaotonga iana ma na gavumane iana ma na Isiraelita hato i Babilone ga bani mahatangenigi tanga na ruma ni rotu. Hato vikana inê kê tagarenigi tangara na mane ni vogasiha.

²⁶Na marâ gê tagarenigi tangara kani igê: na 19.500 na kilo na siliva na 100 na maani na siliva, na higahigani ka na 75 na kilo; na 3000 na kilo na golo; na 20 na kâkâ na golo, na higahigani ka na 135 na kilo; na apira bâkoro gi rua na kapa higa, na meterua ki tagenana ma henirerua na apira na golo.

²⁸Inê kê vi tangara, kê vi: “Igamu ka bani hagapunarigamu tanga na Araha God iata na êvarimi ma tagenani ma nikâ na marâ hato, na siliva ma na golo, na enoni ga bani mahatangenigi tanga na Araha.

²⁹Mu bâbâsurigi maninga mataro me kamu atata râ i ruma ni rotu. Ma i ngekana i Jerusaleme igê na kiboru iata na mane ni vogasiha mu hagararingenigi aporo igê na higahigani ma kamu tagarenigi tangara na mane ni vogasiha ma ni hagarahenga, ga raha tangara na tamata, ma tangara na meraha iata na Isiraelita.”

³⁰Ngekana na mane ni vogasiha ma ni hagarahenga ka tavogi na siliva, na golo ma na marâ ngegana, hanana ga migirâ tanga na ruma ni rotu i Jerusaleme.

³¹Igê na tangahuruta matarerua na tangiana igê na hageha hagenago igami kami pania na ve i Ahava ma kami tavoraha tanga i Jerusaleme. God iaka ki ngahisigami ma ki anumasigami, hanana siana na merongamami ma na manero ke gamorahigami.

³²Matena mi ata râ i Jerusaleme igami kami mamaro surigi na tangiani gi oru,

³³ma kami kahu banu i ruma ni rotu ma kami hagararingenigi na higahigani na siliva, na golo ma na marâ tanga na hagarahenga ma kami tagarenigi tanga o Meremote na mane ni vogasiha karena o Uria. O Eleasare karena o Pinegasi ma na mane ni hagarahenga gi rua o Josabata karena o Jesua ma o Noatia karena o Binui ka tamania o Meremote.

³⁴Ngaira ka tomanigi na ara ni marâ ma ka hagararingenigi na higahigani ma ka segegi so na ara ni marâ hato.

³⁵Hemuri na enoni hato ga bani aporo me tenia i Babilonia ka susu tanga na God iata na Isiraelita ma ka vogasia. Ngaira ka vogasia renira na 12 na puruka mane tangara na Isiraelita hato, na 96 na sipi mane ma na 12 na goti tanga na vogasiha ni bonoteniha ni tasi, hanana viga hagamatarotarora mareta. Ngaira ka susu tanga na Araha renira na ganiani hato ngegana.

³⁶Na pepa ni ramoha i vatera na maneraha i Babilone renia, ngaira ka tagarenia tangara na gavumane ga bâsuria na apanena kereso i Uparatesi. Ngekana na gavumane ngegana ka tamanira na enoni ma na hagarahenga i ruma ni rotu.