Read Kahua ESERA 9 Bible Online

ESERA 9 - Kahua bible

ESERA 9

¹I murini na marâ hato ngegana tani na enoni raha iata na Isiraelita ka râ me ma ka hagarongoê inê o Esera, ka vi, vi na enoni, na mane ni hagarahenga ma ni vogasiha ka hakunira na enoni ahuroto i Amone, i Moaba me Esipito, ma ka hakunira nikâ na Kananita, na Hitita, na Perisita, na Jebusita ma na Amorita. Ngaira ka râ surigi na bagatauhata na enoni ahuroto ngegana.

²Na mane na Siu ka auragira na gete ga pe Siu. Vikana na kariana God, ka hetorariga henira ma ka tasi. Na ani ga erataga ngavê ka na enoni raha ma na ani igê na gavumane.

³Matena gê rongo vikana, inê kê tarisigi na tuguni iaku, suria gê gasuga renia. Inê kê piripirigi na varehuku ma na taboturiku. Inê kê oga so ma kê tugupu ngavê.

⁴Inê kê obaera ngavê. Inê kê oga so rârâ i ngekana mataro me igê na matena ni vogasiha i manurahi. Na enoni ka haganega ka aruruhiê. Ngaira ka magu ngavê, suria ngaira ka bani girara na tamasinga iana God iata na Isiraelita renigi na bagatauhata na enoni ga bani aporo me tenia i Babilonia.

⁵Igê na matena ni vogasiha i manurahi inê kê aharaga akê igê na agua gê angi igê. Henaka ga taritarisiga na tuguni iaku, ma inê kê susure kê gasigi akê na rimaku tanga na Araha God iaku. Inê kê nunginungi, kê vi:

⁶“God, i bara tangê vi ve atakê i maamu, suria gê maki ngavê. Na tasi iamami ka haripage ka akê teharigi na bêmami. Ngaigi ki tariha akê i vavearo.

⁷Haganega me tenigi na mateni iata na êvarimami mataro me i ngekê, igami kami tasi bâraha tare ngavê. Surigi na tasi iamami na maneraha i na agua getigi ka teharigami, igami, na maneraha iamami ma na mane ni vogasiha iamami. Ngaira ka mutegami, ka hanago tenigami ma ka henahuraugami. Ngaira ka hagamakigami ngavê, ma igami kami maki ngavê mênga.

⁸Hoi, Araha God iamami, igo ko koro tangagami suria na kere matena abubu, suria go nakara na hitangimami ka gavatenia na agua mi vora re igê na kare rakuraku. Igami kami oga asitatara igê na agua apuna ikê. Igo ko bani nakagami, kami gava tenia na agua mi vora re igê na kare rakuraku, ma ko haganahunigami renia na mêriha haoru.

⁹Igami kami bani vora re na kare rakuraku, ma igo ko pe nakagami mavê kami vora re igê na kare rakuraku. Igo ko katora na maneraha i Pesia, ka koro tangagami. Igo ko hagamêrigami, hanana mi tagarahia aporo na ruma ni rotu iamu, i bani aruhuruhu, ma kami oga asitatara ikê i Juta me Jerusaleme.

¹⁰God, igo ko bani koro me tangagami. Ma tangagami igami, na ta kami visia? Igami kami aharêngigi nikâ na ramata,

¹¹go bani vatera renigi na kariamu na poropete tangagami. Ngaira ka hagarongogami, vi na agua mi page parênia ki na agua ni eraha, suria na enoni ga oga igê, ka hagaerasia bâraha hagenani renigi na bagatauhata ma na tauhata ahuroto.

¹²Ngaira ka hagapêpugami, vi siana kami auragi hetarênge henira na enoni ngegana, ma vi siana kami tamanira ma kami komanira. Manga i mareha, ki asa iamami vigami vagevagesia na agua ma nikâ na raraha iamami ki asa vige heheuri ke nahunia.

¹³Na ara ni bagabevoani ga tarahugami, ka na tauhamami maremami. Ngaigi ka na hagaitangiha meni na tasi iamami ma na bagatarihamami. Ma igami kami girara, vi igo God iamami ko pe hagaitangigami ngavê, hanana vige ararigi na bagatauhamami, ma ko nakagami hete, kami tahi.

¹⁴Ma ki tanu hega kami aharêngigi aporo nikâ na ramata iamu ma kami auragi hetarênge henira na enoni erataga ngegana? Manga vi igami ma kami katokato vikana, igo ko page mangariaga ngavê ma ko page mutegami ngavê, ma ki asa ta na hitangimami vige page tahi.

¹⁵Araha God iata na Isiraelita, na suriha iamu ka oto tare. Henaka, ma igo ko hagatahigami, suria go takigami. Igami kami ranganigi na tasi iamami tangago. I pe oto tangagami, vigami gâga i maamu surigi na tasi iamami.”