Read Kahua NEHEMIA 12 Bible Online

NEHEMIA 12 - Kahua bible

NEHEMIA 12

¹Na mane ni vogasiha ma ni hagarahenga, ga aporo me tenia i Babilonia henirerua o Serubabele karena o Sealatiele ma o Jesua na mane ni vogasiha i teha, kani igê.

²Na mane ni vogasiha kani igê: o Seraia, o Jirimeia ma o Esera, o Amaria, o Maluku ma o Gatusi, o Sekania, o Regumu ma o Meremote, o Ito, o Ginetoi ma o Abia, o Miamini, o Matia ma o Biliga, o Semaia, o Joiaribi ma o Jetaia, o Salu, o Amoke, o Gilikia ma o Jetaia. Ngaira ka raha tangara na mane ni vogasiha ma na tamata igê na matena iana o Jesua.

⁸Na mane ni hagarahenga kani igê: o Jesua, o Binui, o Katamiele, o Serebia, o Juta ma o Matania. O Matania ma o goana ka bêngenia na kiha tanga God.

⁹O Bakabukia ma o Uni henira na tamaterua na mane ni hagarahenga ka kiki ka ararami.

¹⁰O Jesua na mane ni vogasiha i teha ki apara o Joiakimi. O Joiakimi ki apara o Eliasibi. O Eliasibi ki apara o Joiata.

¹¹O Joiata ki apara o Joganane ma o Joganane ki apara o Jatua.

¹²Na matena o Joiakimi i mane ni vogasiha i teha igê, na mane ni vogasiha ga bêni na hagosi ninuni iata hehegitigi, kani igê: o Meraia tenia na hagosi ninuni iana o Seraia, o Ganania tenia na hagosi ninuni iana o Jirimeia, o Mesulama tenia na hagosi ninuni iana o Esera, o Joganane tenia na hagosi ninuni iana o Amaria, o Jonatane tenia na hagosi ninuni iana o Meliku, o Josepo tenia na hagosi ninuni iana o Sebania, o Atena tenia na hagosi ninuni iana o Garimi, o Gelekai tenia na hagosi ninuni iana o Meraiote, o Sekaria tenia na hagosi ninuni iana o Ito, o Mesulama tenia na hagosi ninuni iana o Ginetone, o Sikiri tenia na hagosi ninuni iana o Abia, ta na mane tenia na hagosi ninuni iana o Miniamini, o Pilitai tenia na hagosi ninuni iana o Moatia, o Samua tenia na hagosi ninuni iana o Biliga, o Jonatane tenia na hagosi ninuni iana o Semaia, o Matenai tenia na hagosi ninuni iana o Joiaribi, o Usi tenia na hagosi ninuni iana o Jetaia, o Kalai tenia na hagosi ninuni iana o Salai, o Ebere tenia na hagosi ninu(...)

²²Igê na mateni o Eliasibi, o Joiata, o Joganane ma o Jatua ga mane ni vogasiha ga teha, ka segegi so tare na bêni na hagosi ninuni iata hehegitigi na mane ni vogasiha ma ni hagarahenga mataro me igê na matena o Tario ki maneraha i Pesia.

²³Ga ama ni segegi so nga na bêni na hagosi ninuni iata hehegitigi na mane ni hagarahenga igê na buka ni sihonga mataro me igê na matena iana o Joganane. O virana ka na Eliasibi.

²⁴O Gasabia, o Serebia, o Jesua, o Binui ma o Katamiele kaniga raha tangara na mane ni hagarahenga. O goata ka no Matania, o Bakabukia ma o Obatia. Ngaira hato ka voasira so mareta ka vora gi rua, hanana ga heheuri ka kiki ka visia koro ma ka hagarahasia God surigi na ramata iana na maneraha o Tavite na kariana koro God.

²⁵O Mesulama, o Talamone ma o Akube ka na mane ni anumasiana na ruma ni rotu. Ngaira ka anumasigi na kiboru ni marâ tanga na hagarahenga hagarangigi na maanipara na ruma ni rotu.

²⁶Na mane hato ngegana ka oga igê na matena iata o Joiakimi karena o Jesua, o Nehemia na gavumane ma o Esera na mane ni vogasiha i aitangisia ngavê na buka ni ramata. O virana o Joiakimi ka no Josataka.

²⁷Tanga na hagapuana na para ni hinua i Jerusaleme ka unira me na mane ni hagarahenga hato tenigi na ani mavê na agua ga oga igê, hanana ga hagarahasia na hagapuana na para ni hinua renigi na ki ni visiha koro ma renigi na tahutahurunga ma na tarotaroha igê na gita ma na ukelele.

²⁸Na enoni ni kiha tenigi na hagosi ninuni iata na mane ni hagarahenga ka haku me tenigi na hinua ga ogasigi hagarangia i Netopa,

²⁹ma tenigi i Bete Hagilegale, i Geba me Asamavete, ma tenigi na kere hinua hagarangia i Jerusaleme.

³⁰Na mane ni vogasiha ma ni hagarahenga ka hagamatarotarora mareta ma na enoni surigi na tauha na rotu henigi na maanipara ni hinua ma na para ni hinua.

³¹Inê o Nehemia, kê hagahakura na meraha i Juta i ahaha na para ma kê voasira ka vora na apanenime ni kiha gi rua, hanana ga tavotavo uga i ahaha na para rihia na hinua, matena ga kiki ka hagarahasia God. Tani ki arigu ki râ i ahaha na para tanga na Maanipara Roro.

³²O Hosaia ki tavo uga me i murita na mane ni kiha. I murina ngaia ki râ me ta apanena na hakuta ni meraha i Juta.

³³Ngaira ka no Asaria, o Esera, o Mesulama, o Jehuta, o Beniamini, o Semaia ma o Jirimeia.

³⁵Hemuri me na mane ni vogasiha, ga uhigi na ahuri. Na ani i ura i nago tarata ka no Sekaria karena o Jonatane ma o virana ka no Semaia. Na êvarina getera ka no Matania, o Mika ma o Sakure tenia na hagosi ninuni iana o Asapa.

³⁶I murina ngaia ka râ me na tamana na mane ni vogasiha. Ngaira ka no Semaia, o Asarele, o Milalai, o Gilalai, o Maai, o Netanele, o Jehuta ma o Ganani. Ngaira hato ka têgi na marâ ni tahutahurunga ma ni tarotaroha iana na maneraha o Tavite na kariana koro God. O Esera, i aitangisia ngavê na buka apuna ki nanago tarata.

³⁷Matena ga ata râ igê na Maanipara Vebanga, ngaira ka tavo uga tagere tanga na hinua iana o Tavite, ka ri tenia na ruma raha iana o Tavite ma ka rere vato aporo tanga na para igê na Maanipara Ve bêkê na hinua.

³⁸Na ruata na apanenime ni kiha ki arigu bêrâ getea i ahaha na para. Inê ma ta na apaneni me na enoni kami mumuria. Igami kami tavo uga kami ri tenia na Bebetehe Umu tanga na Para Aberabera.

³⁹Tenia i ngekana igami kami ri tenigi na Maanipara Eparaimi, na Maanipara Bani, na Maanipara Siare, na Bebetehe Gananele, na Bebetehe Mea, tanga na Maanipara Sipi. Na tavo ugana iamami ki hato hagarangia na Maanipara Hagaitangiha tanga na ruma ni rotu.

⁴⁰Hoi, na apanenime gi rua ni kiha ngegana karu ata râ i ruma ni rotu. Henigami inê ma na meraha,

⁴¹ka oga nikâ tani na mane ni vogasiha ga uhigi na ahuri. Ngaira ka no Eliakimi, o Maseia, o Miniamini, o Migaia, o Elioenai, o Sekaria ma o Ganania.

⁴²Nikâ ngaira o Maseia, o Semaia, o Elasare, o Usi, o Joganane, o Malakia, o Elama ma o Esere. O Jisiragia ki tora ki tangara na enoni ni kiha, ga kiki raha ngavê.

⁴³Igê na hagarahasiana na tangiana ngekana ka vogasia God hagarako. Na enoni ka vagevage ngavê, suria God ki katora ka obakoro ngavê. Na gete ma na kare nikâ kani igê. Na hebungiana i Jerusaleme ki rongo hagatê era.

⁴⁴Igê na matena ngekana ka kasira tani na mane, ka bâsurigi na kiboru tangagi na marâ tanga na ruma ni rotu: na haga, na tangahuruta tenigi na ara ni marâ, na nagoni na mu ma na nagoni na guani na apinige ni ngauha. Na mane ngegana ki tuguhira, viga tavotavo na nagoni ngegana tenigi na mu hagarangigi na ani mavê na hinua raha. Ngaigi ka na votovoto tangara na mane ni vogasiha ma ni hagarahenga, manga i visia na ramata. Na enoni hato i Juta ka obakoro ngavê renira na mane ni vogasiha ma ni hagarahenga,

⁴⁵suria ga katogi maninga na hagarahenga ma na hagamatarotaroha, God i bani bonasira renigi. Na enoni ni kiha ma na mane ni anumasiana na ruma ni rotu ka katogi maninga nogata na tagaraha iata surigi na ramata iaterua na maneraha o Tavite ma o Salomo o karena.

⁴⁶Haganega me tenia i nago kere vê noga, tenia na matena iaterua na maneraha o Tavite ma o Asapa na mane ni kiha, ngaira na mane ni kiha ka totora na ki ni visiha koro ma ni visiha raha tanga God.

⁴⁷Igê na matena iaterua o Serubabele ma o Nehemia na Isiraelita hato ka mahata i na ara ni tangiani ka tamanira na enoni ni kiha ma na mane ni anumasiana na ruma ni rotu, hanana ga mauri re. Na enoni ka vatera na mane ni hagarahenga renigi na ngêra ma na ganiani tangagi na vogasiha. Ma na mane ni hagarahenga ka vatera na mane ni vogasiha na raraha iana o Arone na apaneni na vogasiha i tuguhira viga vatera renigi.