Read Kahua NEHEMIA 13 Bible Online

NEHEMIA 13 - Kahua bible

NEHEMIA 13

¹Matena ga tomania raha na buka ni ramata iana o Moise tangara na enoni, ngaira ka tariha igê na agua i vi, vi na Amonita ma na Moabita ki apu ngavê tangara, vige hakunira na kariana God.

²I tâ vikana, suria na ai ni Amone me Moaba ka usi vige hagangêra hete na Isiraelita, se vige vatera na ve ke tono, matena ga hura tenia i Esipito. Ngaira ka vatevatea ma o Bileama, hanana i kuasira na Isiraelita. Ma God iamami ki urusia na kuasiha renia na korohana tangara.

³Matena na Isiraelita ka rongoa na ramata ngekê ga tomania, ngaira ka kasira hura na mahuara hato tenia na hakuta iata.

⁴O Eliasibi na mane ni vogasiha i bâsurigi na kiboru ga oga igê na marâ tanga na ruma ni rotu, ma o Tobia ni Amone karu bani hegirare arihu me.

⁵O Eliasibi ki naka tanga o Tobia na kiboru raha, tanga ma ga bêbagi igê na votovoto na koni ma na marâ i sigini koro matena ga sungigi, na marâ tanga na hagarahenga i ruma ni rotu, na votovoto tangara na mane ni vogasiha, ma na tangahuruta na koni, na vaini ma na oile ni olive tangara na mane ni hagarahenga, na enoni ni kiha i ruma ni rotu ma na mane ni anumasiha ni ruma ni rotu.

⁶Igê na matena ngekana inê kê pe oga i Jerusaleme, suria gê aporo i Babilone, hanana gê hagarongoa na maneraha o Ataseresese, i maneraha surigi noga na harisi tangahuru gi oru matara gi rua. Ki rârâ ma na maneraha ki hagamarumungeniê,

⁷kê aporo tanga i Jerusaleme. Matena gê ata vê i ngekana, inê kê tarahua, vi o Eliasibi ki naka na kiboru i ruma ni rotu tanga o Tobia. Ma inê kê obaera renia.

⁸Inê kê mangariaga ngavê ma kê kasigi hura hato na nahuninga iana o Tobia tenia na kiboru.

⁹Inê kê haribona, ka hagamatarotarogi na kiboru suria na ramata na rotu ma ka bêbagi aporo igê na marâ tanga na hagarahenga i ruma ni rotu, na votovoto na koni ma na marâ i sigini koro matena ga sungigi.

¹⁰Inê kê tarahua nikâ, vi na enoni ni kiha i ruma ni rotu ma na mane ni hagarahenga ka bani aporo tenia i Jerusaleme tangagi na mu iata, suria na enoni ka pe mahatangenigi na ngêra, hanana ge ararira vige mauri re.

¹¹Inê kê ramonira na enoni raha i hinua, suria ngaira ka hagêrahu vige bâsuria maninga na ruma ni rotu. Inê kê unira aporo me tanga na ruma ni rotu na mane ni hagarahenga ma na enoni ni kiha, hanana ga tagara aporo.

¹²Vikê na Isiraelita hato ka kahu haganega ka toregi me tangagi na kiboru i ruma ni rotu na tangahuruta na koni, na vaini ma na oile ni olive iata.

¹³Inê kê nakara na mane igê ka bâsurigi na kiboru ngaira ka no Selemia na mane ni vogasiha, o Satoke i manisingenigi na ramata, ma o Petaia na mane ni hagarahenga. O Ganane karena o Sakure ma o vesina o Matania inê kê atea, hanana i tamanira. Inê kê bani girara, vi ngaira ki asa vige hagahagabeka, matena ga votovoto na ngêra tangara na tamata ga tage tagara.

¹⁴God iaku, gu takusigi na ara ni marâ hato ngegana gê katogi tanga na ruma ni rotu iamu ma tanga na hagarahenga igê.

¹⁵I na matena ngekana inê kê bâsira tani na ai ni Juta ga rusirusi na vaini igê na tangiana ni mamaroha. Ma tani ka hagarutangira na tonki iata renigi na koni, na hungani na vaini ma na guani na apinige na fiki ma na marâ getigi, ga totora râ tanga i Jerusaleme. Inê kê vi tangara, kê vi: “Siana kamu hagavuri igê na tangiana ni mamaroha.”

¹⁶Tani na mane ni hinua i Taire ka oga i Jerusaleme. Ngaira ka migibanu i hinua na siare ma na ani mavê na marâ, hanana viga hagavuri tangara na kariamami igê na tangiana ni mamaroha.

¹⁷Inê kê ramonira na enoni raha iata na Siu ma kê vi tangara, kê vi: “Mu bagatauhami! Igamu nga kamu hagaerasia na tangiana ni mamaroha.

¹⁸Suria ngekana, tahema God ki hagaitangira na êvarimi, matena i ruhuruhua na hinua raha ikê. Igamu kamu togeaga kamu ama ni hagamangaria nga God. Na mangariaganiha iana ki page nahuira nikâ na Isiraelita, suria mu hagaerasia na tangiana ni mamaroha.”

¹⁹Tahema inê kê haribona, ka raburigi na maani para ni hinua i na ara ni tangiani ni mamaroha i nago tarana i susu na arito mataro me ki susu na arito i na tangiana i muri, ma ki hatohato na tangiana ni mamaroha. Inê kê nakara tani na kariaku surigi na maani para ni hinua, ka bâbâ, hanana vi siana na enoni ka migibanu me ta na marâ i hinua igê na tangiana ni mamaroha.

²⁰Hagetage se hagerua na enoni ni hohoronga ma ni hagavuringa ka mêru i metara i murina hura na para ni hinua igê na bungiana na rimata.

²¹Inê kê ramonira, kê vi: “Na ta kanimu migioga ikê igê na bungiana? Igamu kamu naasia hagaborâ ma na mahogotana! Mu râ! Siana kamu aporo me nikâ igê na tangiana ni mamaroha, i era ma kê rakugamu.” Haganega tenia i ngekana ngaira ka kahu pe aporo me nikâ igê na tangiana ni mamaroha.

²²Inê kê bonasira na mane ni hagarahenga, hanana ga hagamatarotarora mareta suria na ramata na rotu, ma ka râ ka anumasigi na maani para ni hinua, hanana na enoni ka hagahigasia maninga na tangiana ni mamaroha. Vikana God, gu takusiê ma ku takiê, suria na hetakiha iamu ki raha teha.

²³Igê na matena ngekana inê kê tarahua nikâ, viga rako na mane na Siu ga êragira na gete ni Asetote me Amone me Moaba.

²⁴Na apapana na kareta ka girara ma viga tamasi igê na tamasinga ni Asetote, se igê na tamasinga getigi, ma ka pe girara vige tamasi igê na tamasinga iamami maremami.

²⁵Inê kê ramonira na mane ngegana. Inê kê kuasira, kê ramusira ma kê piripirigi na varehuni na bêta. Hemuri kê katora, ka tohe renia na atana na Araha, vi ngaira se vi na kareta ki hato, vige page êragi hatarênge nikâ henira na mahuara.

²⁶Inê kê vi tangara, kê vi: “Na gete na mahuara ngaira nga kaniga hagatasia na maneraha o Salomo. Ngaia nga ki na mane i maneraha teharira na maneraha i na agua getigi. God ki takuia ma ki katoa ki maneraha iata na Isiraelita hato. Henaka, ma ngaia ki vota igê na tasi ngekana.

²⁷I hega, i ararigami vari, vigami amake surigi na bagaparongami ma kami guguruga tanga God iaka, kami auragira na gete mahuara?”

²⁸O Joiata ki no karena o Eliasibi ma ki mane ni vogasiha i teha. Na hitangita o karena o Joiata ki êragia ka karena o Sanabalata ni hinua i Bete Goroni. Tahema inê kê paia hura o Joiata tenia i Jerusaleme.

²⁹God, gu takusia, manga i he na enoni ngegana ka hagaerasirerua na tagaraha iata na mane ni vogasiha ma na suruheri, go bani naka henira na mane ni vogasiha ma ni hagarahenga.

³⁰Inê kê hagamatarotarora na enoni tenigi na ara ni marâ ga râ me tenira na mahuara. Inê kê sege so, vi manga i he na ara ni hitangita na mane ni vogasiha ma ni hagarahenga i tuguhia, vi katoa maninga na tagaraha iana.

³¹Inê kê naka, vi na ario tanga ga susu igê, ka totora nga me igê na mateni tange. Inê kê naka vi na enoni ka toregi me na nagoni na koni ma na nagoni na apinige ni ngauha tanga na ruma ni rotu. God, gu takusigi na marâ hato gê katogi ngegana, ma ku koro tangê suria vikana.