Read Kahua NEHEMIA 4 Bible Online

NEHEMIA 4 - Kahua bible

NEHEMIA 4

¹Matena o Sanabalata ki rongo, vi igami na Siu kami bani haganega kami tagarahia aporo na para ni hinua, ngaia ki mangariaga bâraha ma ki rurusigami.

²I maata na tamana ma na mane ni me ni Samaria, ngaia ki visigami, ki vi: “Na ta kaniga takusia viga tagarahia na Siu na maora bêbaranga? Ngaira ka takusia vari, vi ngaira ka tagarahia aporo na hinua? Ngaira ka takusia vari viga page hatungia na tagaraha igê na tangiana gi tage, suria vi ngaira vari ka vogasi? Manga i he ka girara, viga tagarahigi na ruma na hê renigi na hê ga noro ka bagapapapa?”

³O Tobia i ura henia o Sanabalata ki tamasi nogana, ki vi: “Ga vi ngaira vari, vi na para kaniga tagarahia? Henaka na o ma ki girara i hogea!”

⁴Inê kê nunginungi, kê vi: “God, gu karingara manga i he ka rurusigami. Na rurusiha iata ke tarahura bê aporo. Gu nakara na merongata ke hanagogi na ara ni nahuninga hato iata ma ke henahuraura tanga na agua hagatê.

⁵Siana ko bonotenigi na bagaparongata ma na tasi iata, suria ga visigami bera, igami mi tagarahia aporo na para ni hinua.”

⁶Hoi, igami kami ama ni tagarahia aporo nga na para ni hinua, ma ki sugia ma vige aragupu na para, suria na enoni ka magêsia na tagaraha.

⁷O Sanabalata, o Tobia ma na me ni Arabia, ni Amone ma ni Asetote ka mangariaga ngavê, matena ga rongo, vi igami ki tavoraha bâkoro na tagarahiana aporo na para ni hinua i Jerusaleme, ma na makeregani na para ka sugi pungu.

⁸Vikê ngaira hato ka harikato, hanana viga arâ me ma ka taharia i Jerusaleme ma ka katogami kami tugupu.

⁹Ma igami kami avarasia God iamami ma kami nakara na mane ga anumasigami tenira igê na tangiani ma na bungiani.

¹⁰Na ai ni Juta ka nahunia na ringe ma ka ki vikê: “Igami ki me na apemami, suria mi tora higa. Na apapagani na hê ka haripage ma ki bara vigami ruguni râ. Mi tagarahia hega na para?”

¹¹Na merongamami ka vi ma, vi igami kami pe bâsira, se vigami pe girara na katoha iata mataro me ka hagakangigami, ka taharigami, ka mutegami ma ka hagabarasia na tagaraha iamami.

¹²Ma i na ara ni mateni na Siu ga oga i berarogata na merongamami, ka arâ me ka hagarongogami renigi na harikatoha iata na merongamami renigami.

¹³Tahema inê kê hagatangarura na enoni renigi na tatapa borahu, na ora ma na epage, ma kê nakara hehegitigi surigi na raraha iata i murina na para, ka oga tonganigi na agua i mamêngagi vige hatohato.

¹⁴Inê kê bâsira na enoni ga anumanuma. Tahema kê vi tangara ngaira ma tangara na enoni raha iata ma tangara na ani ga bâsurira, kê vi: “Siana kamu magutenira na merongaka. Mu takusia na Araha i raramohaga hunia ma ki hagamamaguraga. Mu henahunahu pusira na goami, na karemi, na gete iami ma na ruma iami.”

¹⁵Na merongamami ka rongo, vi igami kami bani girara na harikatoha iata ma ka tahetara, vi God ki bani erasigi na harikatoha iata. Hemuri igami hato kami ama ni tagarahia aporo nga nikâ na para ni hinua.

¹⁶Haganega tenia ngekana ta na apaneni me na kariaku ka tagara ma ta na apaneni me ga ura ni anumasiha. Ngaira ka tuguni renigi na tuguni ni kapa ma ka tangaru renigi na ora, na bêata ma na epage. Na enoni raha iamami ka heaganari ngavê henira na enoni

¹⁷ga tagarahia aporo na para ni hinua. Nikâ na ani ga totora me na hê tanga na para, ngaira ka tagara renigi ta rimata ma ta rimata ki taugi na tangaruha.

¹⁸Ma ngaira hato ga parapara, ngaira ka kuharenigi na tatapa boraha i kâta. Na mane tanga i uhia na ahuri ki oga heniê.

¹⁹Inê kê vi tangara na enoni ma tangara na enoni raha iata ma na ani ga bâsurira, kê vi: “Na tagaraha ki raha noga ki râ. Igia ka ura hehagatêri igê na para.

²⁰Matena mu rongoa na ahuri, mu hakuhaku me i pasiku. God iaka ki page henahunahu pusigia.”

²¹Vikê i na ara ni tangiani, i haganega igê na kakahuagana na tangiana mataro me ki bungibungi, matena ga mave na higu, na apaneni me na hitangimami ka tagarahia na para ma ta na apaneni me ka rêra ni anumasiha henigi na ora.

²²I na matena ngekana inê kê bonasira igê na mane ga bâsuria na tagaraha ma na kariata hato viga gâga i rarona i Jerusaleme suria na bungiana, hanana mi anumasia na hinua igê na bungiana ma kami tagara igê na tangiana nikâ.

²³Inê kê pe urusigi na gahu iaku igê na bungiani ma ngaira nogata na kariaku, na tamaku ma na mane ni anumasiha iaku. Na tangaruha iamami ka gâga henigami tare.