Read Kahua NEHEMIA 5 Bible Online

NEHEMIA 5 - Kahua bible

NEHEMIA 5

¹I ta na tangiana ga rako na enoni, na mane ma na gete, ka haganega ka hagagege renira na Siu na goata ga ruruguha.

²Tani ka vi: “Igami kami nahunira na ahemata raha. Tahema igami kami obanigi na koni, hanana mi mauri re.”

³Ma tani ka vi: “Igami kami bani hagatagara igê na mu iamami, ma na pariki ni vaini ma na ruma, hanana mi nahunigi na koni ga ararigami, hanana mi pe mesi magêha.”

⁴Ma tani nikâ ka vi: “Igami kami bani tora na haga, hanana mi vuria na takesi tanga na maneraha pusigi na mu iamami ma na pariki ni vaini.

⁵Igami ka na goata nga na Siu getera ga ruruguha. I hega, na karemami ka pe koro vari mangara na kareta ngaira? Mu bâ, igami kami hagavuringenira na karemami, hanana mi mauri. Igami kami bani hagavuringenira tani na karemami. Igami kami matareha ngavê, suria ngaira ka bani nahunigi vê tenigami na mu ma na pariki ni vaini iamami.”

⁶Matena gê rongogi na hagagegeha iata, inê kê mangariaga.

⁷Vikê inê kê kato, vigê hagaotoa na tarana ngekana. Inê kê ramonira na enoni raha iata na enoni ma na mane ga bâsurira na enoni, kê vi: “Igamu kamu hagamamasiagara na goami!” Inê kê hagahakura na enoni hato, hanana gê hagaotoa na tarana ngekana.

⁸Inê kê vi: “I na ara ni mateni i pe asa tangagia vige vurira aporo me na goaka na Siu ga bani hagahagavuringenira mareta tangara na enoni mahuara, igia ka bani vurira aporo me. Mu bâ, igamu kamu tugurira na goami maremi ka hagavuringenira mareta tangagamu, igamu na goata!” Na enoni raha ka muni ma ki bara tangara vige visia ta na marâ.

⁹Hemuri inê kê vi: “Na tarana mu katoa ki pe oto. Igamu ki tuguhigamu, vigamu hagahigasia God ma kamu katoa na tarana i oto. Vikana igamu kamu pe naka na teha tangara na merongaka na ai ahuroto, hanana ga rurusigia.

¹⁰Inê kê hagamarumu tangara na enoni ka toregi na haga ma na koni teniê, ma ngaira nikâ na tamaku ma na enoni tagara iaku. Hoi, ge bonotenigi na ara ni hagaba hato tenigia.

¹¹Mu ahunigi râ na hagaba hato tenigamu, na haga, se na koni, se na vaini, se na oile ni olive, i ngekê nga. Mu vatera aporo na mu iata, na pariki ni vaini, na pariki ni olive ma na ruma!”

¹²Na enoni raha ka arami, ka vi: “I koro ma. Igami kami page vatera aporo na nahuninga iata ma ki hato vigami page naasigi na hagaba tenigami.” Inê kê unira me na mane ni hagarahenga ma kê katora na enoni raha, ka tohe i maata na mane ni hagarahenga, hanana viga hagamonaria na suruha iata.

¹³Hemuri inê kê tasia râ na gahu i kâku ma kê kangikangia. Inê kê vi: “Ikê nga na hanana God i page hagaitangigamu. Manga mu pe hagamonaria na suruha iami, God ki page toregi râ tenigamu na ruma iami ma na ara ni nahuninga iami, ma igamu ki page tatarasigamu ngavê ta na marâ.” Na enoni hato ga oga i ngekana, ka vi: “Ua, nga hanana ngekana!” Ma ngaira ka hagarahasia na Araha. Ma na enoni raha ka hagamonaria na suruha iata.

¹⁴Surigi na harisi tangahuru matarerua gê bâsuria igê i Juta, haganega igê na tangahuruta gi rua na harisi o Ataseresese i maneraha surigi, mataro me na tangahuruta gi oru matara gi rua na harisi i maneraha surigi, inê kê pe ngêngê rârâ na ngêra i oto tangê vigê ngaugi, suria gê bâsuria i Juta. Ma na kariaku nogata.

¹⁵Na ara ni mane ga bâsuria i Juta i nago taraku, ngaira ka hagamarâ apeta na enoni ma ka obanigi na maani na siliva tangahuru ge he tangagi na ngêra ma na vaini i na ara ni tangiani. Ma na kariata ka hagamamasiagara nogata na enoni. Ma na parongaku inê ki tora getea, suria gê hagahigasia God.

¹⁶Inê kê tako gatagata, hanana vigê tagarahia aporo na para ni hinua, ma ki asa be gunahia tagua na mako. Na enoni tagara hato iaku ka tamaniê igê na tagarahiana aporo.

¹⁷Inê kê hagangêra hagarako i pasiku na 150 na Siu, na enoni purua ma na enoni raha iata. Ma inê kê hagangêra nikâ na enoni ga pe Siu, ga arâ me i pasiku tenigi na agua iata.

¹⁸I na ara ni tangiani inê kê hagangêra renira na puruka gi tage, na sipi raha gi oru, ma na kua rako. Ma i na ara ni tangahuruta na tangiani inê kê vatera renigi gahu na vaini. Inê kê pe bonasira na enoni, ke vateê na ngêra, henaka i oto tangê vikana, suria gê bâsuria i Juta, suria inê kê bani giraragi na tarani ga hagamamasiagara na enoni.

¹⁹God iaku, inê kê nungigo, ko takusigi tare na korohaku tangara na enoni igê, matena go suriê.