Read Kahua NEHEMIA 6 Bible Online

NEHEMIA 6 - Kahua bible

NEHEMIA 6

¹O Sanabalata ma o Tobia mo Geseme ma na merongamami getera ka rongo, vi igami kami bani hatungia na tagarahiana aporo na para ni hinua ma ki bani pungu na ara ni makeregani hato igê. Ma igami ki mamênga, vigami nakagi na purupuru igê na maani para ni hinua.

²Vikê o Sanabalata mo Geseme karu kasi tamasinga tangê, hanana vi inê kê arâ kê bâsirerua igê na hitangini na hinua i Bena Ono. Ngairerua karu uhungia vigaru rapasiê.

³Inê kê hagatorangenira na mane tora tamasinga tangarerua, kê vi: “Inê kê nahunia na tagaraha raha ma ki bara tangê vi ve so vê i ngekana. I bara vi ve pania so na tagaraha, suria ma vigê arâ kê bâsigamurua.”

⁴Hagehe ngairerua karu kasi tamasinga me tangê vikana, ma i na ara ni mateni inê kê aramirerua bê aporo nogaku vikana.

⁵Hemuri o Sanabalata ki hagatorangenia me tangê na hitangita na kariana henia na rimata na tamasinga iana. Na tamasinga ngekana ki oga igê na leta i pe purusia.

⁶Ngaia ki manga ikê: “O Geseme ki hagarongoê, vi na rongoha ki tatarê surira na enoni, vi igo ma na Siu kamu obania vigamu huhura tenia vigamu oga i ruguhana na maneraha. Tahema igamu kamu tagarahia aporo na para ni hinua. Ngaia ki vi nikâ, vi igo ko kato, vigo maneraha maremu,

⁷ma ko bani katoa na heaganariha henira tani na poropete, hanana ga tarohenigo i Jerusaleme, vi igo ko maneraha i Juta. Na maneraha i Asiria ngaia nogana ki page rongoa. Tahema inê kê takusia, vi igerua karu aretaku, hanana garu tamasia.”

⁸Inê kê aramia bê aporo, kê vi: “Na tamasinga iamu ngaia ki na hagaparuana ma. Igo ko tako kê ma maremu.”

⁹Ngaira ka uhungia ma viga hagamagusigami, hanana vigami rumakaka renia na tagaraha. Inê kê nunginungi, kê vi: “God, gu hagaramoniê!”

¹⁰Igê na ararina na matena ngekana inê kê vatugia o Semaia karena o Telaia ma o vesina o Mehetabele, i oga kunikuni i ruma. Ngaia ki vi tangê, ki vi: “Igo ma inê ki arari, vigaru arâ nga ma karu ahiahi haku igê na kiboru apuna i ruma ni rotu, ma karu raburigi na maani ruma, suria ngairerua karu page arâ me igê na ani mavê na bungiana, hanana garu nahuigo ko meme.”

¹¹Inê kê arami, kê vi: “Mareha vi na mane ni gavaniha ma ni ahiahinga kani inê. Go takusia vari vi inê kê ahiahi i ruma ni rotu, hanana vigê tahitahi? I bara! I asa be kato vikana.”

¹²Matena gê oga kê takusia, inê kê tahetara, vi God ki pe tamasi tanga o Semaia, ma o Tobia ma o Sanabalata hete kanigaru vatevatea o Semaia ki tamasi tangê vikana.

¹³Ngairerua karu vuria, hanana vi hagamagusiê ma kê tasitasi, hanana ngairerua karu girara, garu tamasi erasiê ma karu hagamakiê.

¹⁴Inê kê nunginungi, kê vi: “God, gu takusigi na bagaparongaterua o Tobia mo Sanabalata ma ku hagaitangirerua. Gu takusira ka Noatia ngekana ma na poropete hato getera ga uhungia viga hagamagusiê.”

¹⁵Na para hagenani ni hinua ki hato i raroni na tangiani tangahuru gi rima matara gi rua. Na tagaraha ki hato igê na tangahuruta gi rua matare rima na tangiana igê na hageha na Elule.

¹⁶Matena na merongamami igê na agua rihigami ka rongo vikana, ngaira ka magu ma ka maki, suria ngaira ka tahetara, vi God ki tamanigami igê na tagaraha.

¹⁷Suria na matena hagenani ngekana na enoni raha iata na Siu mo Tobia ka sege leta heri.

¹⁸Rako na enoni i Juta ka pane henia o Tobia renia na hungâna o Sekania o karena o Araga ki na Siu. Ma nikâ o Joganane o karena ki bani êragia ka karena o Mesulama o karena o Berekia.

¹⁹Na enoni ka tamasi me i maaku renigi na parongana koro hato o Tobia ma ka hagarongoa renigi na ara ni tamasinga hato iaku. Ma ngaia ki ama ni segesege leta ma me tangê hanana vi hagamagusiê.