Read Kahua NEHEMIA 8 Bible Online

NEHEMIA 8 - Kahua bible

NEHEMIA 8

¹Igê na pita na hageha na Isiraelita ka bani ogasigi aporo na hinua iata mareta. Igê na tangiana hagenago igê na hageha ngekana ngaira ka haku i Jerusaleme igê na mahera i maana na Maanipara Ve. Ngaira ka nungia o Esera na mane ni vogasiha i aitangisigi na ramata na Araha i vatea o Moise renigi tangara, ki torea me na buka ni ramata.

²Vikê o Esera ki torea me tanga na mahera ga bani haku noga igê na enoni. Ngaira ka na mane, na gete ma na kare ga arari ni rongorongo hagagara.

³Igê na mahera ngekana igê na maanipara ngaia ki tomania igê na buka ni ramata tangara, haganega igê na mahogotana tanga na ritovagana. Ngaira hato ka karinga maninga.

⁴O Esera ki ura igê na bea ga bani tagarahia renigi na apinige tanga vikana. I na apanena i otona ka ura igê o Matitia, o Sema, o Anaia, o Uria, o Gilikia ma o Maseia. Ma i na apanena i mahana ka ura igê o Petaia, o Misaele, o Malakia, o Gasumu, o Gasabatana, o Sekaria m o Mesulama.

⁵Matena o Esera ki ura igê na bea i rikikê tenira na enoni, na enoni hato ka bore rapurapu renia. Pusina ma i tangahia na buka ni ramata, ngaira hato ka ura haraga.

⁶O Esera ki vi: “Ge hagarahasia na Araha God i raramohaga hunia!” Na enoni hato ka tagere rima, ka vi: “I monari! I monari!” Ngaira ka susure ka tubê so i ano, hanana ga hagahigasia na Araha.

⁷Hemuri ngaira ka aharaga akê me ka ura igê na atohata. Na mane ni hagarahenga igê ka ramatenigi na ramata tangara. Ngaira ka no Jesua, o Bani, o Serebia, o Jamini, o Akubu, o Sabetai, o Hotia, o Maseia, o Kelita, o Asaria, o Josabata, o Ganane ma o Pelaia.

⁸Ngaira ka tamasi ka urusia na buka ni ramata iana God igê na tamasinga iata na enoni. Ngaira ka ramatenigi maninga, hanana na enoni ka rongorongo mataha renigi.

⁹Matena na enoni ka rongogi na marâ na ramata ka bonasira renigi, ngaira ka tangahurira ma ka angi. Vikê o Nehemia i bâsuria i Juta, ma o Esera na mane ni vogasiha i aitangisigi na ramata, ma na mane ni hagarahenga ga ramatenigi na ramata, ngaira ka vi tangara na enoni hato, ka vi: “I ngekê ki na tangiana apuna tanga na Araha God iami. Tahema siana ki rugurugu na obami se vigamu angiangi.

¹⁰Mu aporo ma kamu magoto. Mu meratongani renigi na ngêra ma na vaini iami na enoni i marehasira. I ngekê ki na tangiana apuna tanga na Araha. Na vagevageha i vategamu na Araha renia ki page hagaramonigamu.

¹¹Na mane ni hagarahenga ka râhira na enoni ma ka haganaku parongata. Ngaira ka vi: “Siana ki rugurugu na obami igê na tangiana apuna tanga na Araha.”

¹²Vikê na enoni hato ka aporo i pasita, ka ngêngê ma ka totono, ma ka vagevage ma ka meratongani na enoni getera na marâ iata, suria ga rongo mataha renigi na ramata ga tomanigi tangara.

¹³Igê na tangiana i muri na bêni na hagosi ninuni henira na mane ni hagarahenga ma ni vogasiha ka râ tanga o Esera, hanana viga hagesuringenigi na ramata.

¹⁴Ngaira ka tarahua, vi na buka ni ramata, na Araha i vatea o Moise renia tangara, ki bonasira na Isiraelita, hanana viga gâga igê na ruhu surigi na tangiani raha ni Ruhu.

¹⁵Vikê ngaira ka kasi tamasinga surigi i Jerusaleme ma na hinua getigi, na ani raha ma na ani sisite, ka vi: “Mu arâ igê na hungani ma kamu totora na arani na apinige, na apinige ni olive, na takasi, na geara ma na apinige vigana, hanana mu tagarahigi na ruhu renigi surigi na ramata igê na buka ni ramata.”

¹⁶Vikê na enoni ka toregi me na arani na apinige ma ka tagarahigi na ruhu renigi igê na aberaberagani na gerini na ruma iata, igê na basigu ni ruma iata, igê na beraro i maana na ruma ni rotu ma igê na mahera igê na maanipara Ve ma igê na maanipara Eparaimi.

¹⁷Na enoni hato ga bani aporo me tenia na agua ga henahuraura tanga, ngaira ka tagarahigi na ruhu ma ka ogasigi. Ngaira ka na ani ga hagenago ka katoa aporo nikâ na tarana ngekê, suria i mareha vige akê me rârâ i murina i me o Josua o karena o Nune. Na enoni hato ki koro ngavê na apeta ma ka vagevage.

¹⁸I na ara ni tangiani surigi na tangiani raha ni Ruhu, ngaira ka tomania tapanena na buka ni ramata iana God. Ngaira ka hagahigasigi na tangiani raha gi pi Ruhu ma igê na varuta na tangiana ki na hagahatungina na hagahigasiana hanana na ramata ki bani bonasira renia.