Read Kahua NEHEMIA 9 Bible Online

NEHEMIA 9 - Kahua bible

NEHEMIA 9

¹Igê na tangahuruta gi rua matare he na tangiana igê na hageha ngekana na Isiraelita ka haku ka harihari, hanana ga tangahurira renigi na tasi iata. Ngaira ka bani oga tarege râ noga tenira na mahuara. Ngaira ka gahugahu kakaga ma ka bani kuhuigi na bêta renigi na momo, na girarana vi ngaira ka tangahurira. Ngaira ka ura ma ka haganega ka visigi mataha na tasi iata ngaira ma na êvarita.

³Surigi na pepe gi oru na arito kaniga tomania igê tangara na enoni na buka ni ramata iana na Araha God iata. Ma hemuri surigi nikâ na pepe gi oru na arito na enoni ka visigi mataha igê na tasi iata ma ka rahesia na Araha God iata.

⁴Na mane ni hagarahenga o Jesua, o Bani, o Katamiele, o Sebania, o Buni, o Serebia, ma o Kenani ngaira ka ura igê na bea. Ngaira ka rahesia raha na Araha God iata.

⁵Na mane ni hagarahenga o Jesua, o Katamiele, o Bani, o Gasabaneia, o Serebia, o Hotia, o Sebania ma o Petagia, ngaira ka vi tangara na enoni ka hagarahe. Ngaira ka vi tangara, ka vi: “Ura aharaga ma kamu hagarahasia na Araha God iami. Mu hagarahasia tare ki bê ki arâ.” Ma na enoni hato ka hagarahe vikê:

⁶“Araha, igo getego ma ko Araha. Igo ko hagavoragi na vavearo ma na higu igê. Igo ko hagavoragi na marê ma na asi ma na ara ni marâ hato ga oga igê. Igo ko hagamêrira ngaira hato. Na angero hato ka tubê so, hanana ga hagahigasigo.

⁷Igo Araha God ko atea o Abaramo ma ko bêngenia hura tenia i Uru i Babilonia. Igo ko urusia na atana vi o Abarahamo.

⁸Igo ko tahetara renia vi ngaia ki toto surigo tare ma ko naka na suruheri henia. Igo ko surua, vigo haganahunia renigi na apanena iata na Kananita, na Hetita ma na Amorita, na Perisita, na Jebusita ma na Girigasita, hanana vi na raraha iana ka ogasigi. Igo ko hagamonaria na suruha iamu, suria go hagamonarigi tare na tamasinga iamu.

⁹Na êvarimami ka mamasiaga ngavê i Esipito ma igo ko takira ngavê. Igo ko aganarira, matena ga avarasigo igê na Asi Memera.

¹⁰Na maneraha i Esipito, na mane ni hagaotonga iana ma na kariana ngaira ka hagamamasiagara ngavê na kariamu. Ma igo ko hagamagusira renigi na mena. Vikana tenia na matena ngekana mataro me i ngekê na atamu ki rongo raha ngavê.

¹¹Igo ko voasia hegitigi na asi ki vora na tara mamata tangara na kariamu ka râ igê. Ngaira na merongata ga tarigenira ka tono ka me igê na rutuni. Ngaira ka kokoro vato manga na hê igê na asi i magupi hurira.

¹²Surigi na tangiani igo ko bêngenira renia na vaha, ma surigi na bungiani igo ko mavesia na tara tangara renia na gi.

¹³Igo ko so me tenia i pasimu tanga na hungana i Sinai. Igo ko tamasi tangara na kariamu ma ko vatera renigi na ramata ma na hagesuringa koro.

¹⁴Igo ko bonasira hanana ga hagahigasigi na tangiani ni mamaroha ma ko vatea o Moise na kariamu renigi na ramata tangara.

¹⁵Matena ga magê, igo ko hagangêra renia na bereti tenia i vavearo. Matena i mamata na riota igo ko hagatonomira renia na ve, i pusu me tenia na verake. Igo ko bonasira ka parênia na agua go bani suru vigo page haganahunira renia.

¹⁶Ma na êvarimami ka haganega ka paroparo ma ka guguruga tangago ma ka usi vige tê viteamu.

¹⁷Ngaira ka usi vige tê vita. Ngaira ka bonotenigi na tauhamu koro tangara, ma ka bonotenigi na mena go bani tamanira renigi. Suria ngaira ka paroparo, tahema ga atea ta na mane ki bêngenira, hanana viga aporo i Esipito, ka voravora aporo re na kare rakuraku igê.

¹⁸Ngaira ka tagarahia na nununa na puruka mane ma ka visia vi na harasita i bêngenira hura tenia i Esipito! Araha, ngaira ka erasigo ngavê.

¹⁹Ma igo ko pe kasi renira i ngekana igê na bagamasusu raha, suria igo ka na God ni hetakiha. Igo ko ama ni bêngenira nga igê na tangiani renia na vaha ma igê na bungiani renia na gi.

²⁰Suria igo ko koro teha ngavê, tahema igo ko mavesigi na aitangihata, hanana i mataha na obata. Igo ko hagangêra renia na ngêra na mana ma ko vatera na ve ka tono.

²¹Surigi na harisi tangahuru ge he ga oga surigi igê na bagamasusu raha, igo ko vatera renigi na marâ hato ga obanigi. Na gahu iata ki asa vige êvariga ma na êgata i asa vige mamanu.

²²Igo ko nakara ka henahuraura na maneraha henigi na apaneni iata, ga oga hagarangia na apanena iata mareta. Ngaira ka henahuraua i Gesibone na apanena iana o Sigone na maneraha, ma i Basani na apanena iana o Ogo na maneraha.

²³Igo ko hagarakunira igê na kareta ka rako mangagi na higu i vavearo ma ko bonasira na enata ka parênia ma ka ogasia na agua go bani surua vigo page haganahunira na êvarita renia.

²⁴Ngaira ka henahuraua i Kanani. Igo ko teharira na enoni i ngekana. Igo ko nakara na kariamu, hanana ga katora na ai ni Kanani ma na maneraha igê renigi na ani mavê na tarani ga obanigi.

²⁵Na kariamu ka henahuraugi na hinua nganganihaga, na mako koro, na ruma ga vunu renigi na ruruguha, na nonganonga ga bani karugi na enoni getera, na apinige ni olive ma na apinige ni ngauha ma na pariki ni vaini. Ngaira ka ngêngê masu tare ma ka bigabigaraga. Ngaira ka vagevagesigi na mahatanga hato iamu tangara.

²⁶Ma na kariamu ka murisigego ma ka guguruga ngavê tangago. Ngaira ka aharêngigi na ramata iamu. Ngaira ka nahuira ka me na poropete viga hagaotora hanana vige aharigo aporo. Ngaira ka ama ni erasigo nga.

²⁷Tahema igo ko nakara na merongata ka henahuraura ma ka marungira. Igê na mamasiaganiha iata ngaira ka avarasigo ngavê ma igo God ko aganarira. Igê na hetakiha raha iamu igo ko hagêrasira akê i berarogata na mane ga bêngenira, hanana ga hagatahira tenira na merongata.

²⁸Matena ga oga aporo igê na ramana, ngaira ka tasi nikâ. Ma nikâ igo ko nakara na merongata ka teharira. Ma na matena ngaira ka urisi parongata ma ka avarasigo vigo hagatahira, igo God ko aganarira ma ko hagatahira tatage, suria go hetaki ngavê.

²⁹Igo ko kanukanura, hanana viga marupegi na hagesuringa iamu. Ma ngaira ka usitenigi na ramata iamu, suria ga paroparo ngavê, henaka na marupeana na ramata iamu ki na tara tanga na mêriha mora. Ma ngaira ka usi vige tê vita, suria ngaira ka togeaga ka guguruga.

³⁰Tatage i na ara ni harisi igo ko haritagi ko kanukanura. Igo ko hagatakusira na poropete iamu ka tamasi tangara, ma na kariamu ka pe karingara. Tahema igo ko nakara na agua getigi ka teharira.

³¹Henaka, ma igo ko pe kasi renira ma ko pe mutera ngavê, suria na hetakiha iamu i raha teha. Igo ki na God go koro teha ngavê Ma ko hetaki ngavê!

³²God, God iamami, igo ko raha teha ngavê. Igo ko hagamamaguraga ma ko raramohaga hunigo. Igo ko hagamonarigi tare na suruha ni suruheri iamu. Haganega me tenia na matena na maneraha i Asiria ka hagamamasiagagami tariha me i ngekê, igami kami mamasiaga ngavê mêngamami. Na maneraha ma na enoni raha iamami, na mane ni vogasiha ma na poropete iamami, na êvarimami ma igami hato na enoni, igami hato kami mamasiaga ngavê. Gu takusigi na mamasiaganiha raha iamami.

³³Igo ko hagaitangigami oto. Igo ko hagamonaria na tamasinga iamu, naka ma igami kami tasi.

³⁴Na êvarimami ma na maneraha iamami, na enoni raha ma na mane ni vogasiha iamami ka pe marupegi na ramata iamu. Ngaira ka pe tê viteamu, matena go bonasira ma ko kanukanura.

³⁵Igo ko haganahunira na kariamu renira na maneraha. Igo ko koro tangara na kariamu, matena ga oga igê na agua i hatahata, igê na agua ni mako koro, go haganahunira renia. Ma ngaira ka usi vige kasi na bagaparongata ngaira ka usi vige toto surigo.

³⁶I ngekê igami kami vora re na kare rakuraku i na agua go haganahunigami renia, i na agua ni mako koro ma ni ngauha.

³⁷Suria igami kami tasi, tahema na marâ mi hasi igê na mako ka na anita na maneraha go kasira ka marungigami. Ngaira ka katogami, igami ma na togoha iamami, igê na ani mavê na tarani ga obanigi. Igami kami mamasiaga ngavê!”

³⁸Surigi na tarani hato ngegana igami na Isiraelita, kami hagagatagatania igê na heaganariha. Igami kami segea so ma na enoni raha iamami ma na mane ni hagarahenga ma ni vogasiha, ngaira ka segegi so na atata igê.