Read Kahua 1 ESETARASE 3 Bible Online

1 ESETARASE 3 - Kahua bible

1 ESETARASE 3

¹Na maneraha o Tario ki magoto tangara ngaira hato i ruguhana: ngaira hato i ruma iana ma na enoni ga tagara tanga, ngaira hato na gavumane i Pesia me Metia,

²ngaira hato na mane ga bêngenira na mane ni me iana, na mane ni segesegeha ma na mane ga bâsurigi na apaneni 127 haganega tenia i Intia tanga i Sutane.

³Matena ngaira ka ngê ma ka tono masu, ngaira ka râ, ma o Tario ki râ ki mêru. Ngaia ki hatani mêru bore ma ki kahu rite râ.

⁴Hoi, na vera oru na mane na gapu haoru, ga anumasia tare na maneraha o Tario, ngaira ka hetamatamasi, ka vi:

⁵“Na ara ni hitangika ki visia vi na ta kani takusia, vi raramohaga teha ngavê i maveta. Na maneraha ki page atea vi o ti kani tako mataha teha ki aramia na hagatanga ngekana, ma ki page vatea na votovoto bâkoro ma na mahatanga tanga na ani i teha.

⁶Na ani i teha ki page tuguni manga hanana i marisina na maneraha, ki page baraia na bêna renia na gahu siki, ma ki page nahunia na konokono na golo.

⁷Suria i nahuni takoha mataha, ngaia ki page vora re na mane ni hagaotonga iana na maneraha ma ka page visia vi na goana na maneraha.”

⁸Hoi, na ara ni hitangita ki segea so na aramiha i takusia vi i teha. Ngaia ki puruia ma ki naka i ruguhana na bêbê iana na maneraha. Ngaira ka hetamatamasi, ka vi:

⁹“Matena i riterite na maneraha, ngaira ka page vatea renigi na pepa igê na aramiha iaka. Ngaia henira na vera oru na gavumane i Pesia ka page atea na aramiha na ani i teha. Ngaira ka page vatea na ani i tehateha na mena i araria na aramiha iana.”

¹⁰Tani ki sege vikê: “I mareha rârâ ta na marâ vige raramohaga teharia na vaini.”

¹¹Tani ki sege vikê: “I mareha rârâ ta na marâ vige raramohaga teharia na maneraha.”

¹²Ma tani ki sege vikê: “I mareha rârâ ta na marâ vige raramohaga teharia na gete ma na monariha ki girara i teharigi na ara ni marâ hato.”

¹³Matena i rite na maneraha. Ngaira ka vatea renigi na pepa igê na aramiha ma ngaia ki tomanigi.

¹⁴Hemuri ngaia ki hagatorangenira na mane tora tamasinga, hanana ga unira haku me na mane ga raha igê na gavumane i Pesia me Metia, henira na mane ga bêngenira na mane ni me iana, na mane ni segesegeha ma na ani ga bâsurigi na apaneni hegitigi iana na maneraha.

¹⁵Na maneraha ki oga so igê na atohana igê na kiboru ni hekarigiana ma ki haribona, ka tomanigi raha na aramiha gi oru.

¹⁶Ngaia ki vi: “Mu torera banu me na mane gi oru na gapu haoru, hanana ge ramatenigi na aramiha iata. Hoi, ngaira ka torera banu me.

¹⁷Ngaira ka nungira ka ramatenigi hegitigi na aramiha iata. Na mane ni me i anumasia na maneraha ma ki bani sege renia na raramohana na vaini, ngaia ki tamasi hagenago.

¹⁸Ngaia ki vi: “Goaku, i monari ngavê, i mareha rârâ ta na marâ i maveta hagenani, vige raramohaga teharia na vaini. Na ara ni enoni ga tonomia ka akeki renia.

¹⁹Ngaia ki hagakirara na ara ni enoni igê na tarana i tagenana ma: naka ma na maneraha se na kare banogo, na kare rakuraku se na enoni aharupa, na enoni ni ruruguha se na enoni matareha.

²⁰Ngaia ki katora ngaira hato ka apeape ni vageha, ka ape hatara ma ka bonotenigi na mamasiaganiha ma na tagaraha iata.

²¹Ngaia ki katora ngaira hato ka hatahata manga vi ngaira ka ruruguha, ka pe botage renigi na raramohana na maneraha ma na gavumane, ma ka tamasi manga vi ngaira ka nahunia na maveta hagenani.

²²Matena na mane ka totono na vaini, ngaira ka hitenira vi o ti ka na bamane iata ma na tamata, ma ki page arihu ma ngaira ka tahuragi akê na tatapa borahu iata ma ka meraheariha renigi.

²³Hemuri, matena i kakaka râ tenira ma ka takotako bâkoro aporo, ngaira ka pe giraragi rârâ na ta kaniga bani katogi.

²⁴Goaku, manga vi na vaini kani katora na mane ka katokato vikana, ngaia ki monari, i mareha rârâ ta na mârâ i maveta, vige raramohaga teharia na vaini. Nga hanana ngekana.”